Ifingatwafwa Ukulashimikila Bwino—Ukulapeela Abantu Icitabo ca Ico Baibolo Isambilisha

Ico Cacindamina: Icitabo ca Ico Baibolo Isambilisha e citabo tubomfya sana ukwafwa abantu ukuba abasambi. Na lyo line, ilyo tatulatendeka ukusambilisha umuntu, intanshi tufwile ukumupeela ici citabo. Kanshi, ifwe bonse tulingile ukwishiba bwino ifya kushalika icitabo ca Ico Baibolo Isambilisha ilyo tulebila imbila nsuma. (Amapi. 22:29) Kwaba inshila ishingi isha kubomfya, kabili bakasabankanya kuti babomfya inshila iyo bamona ukuti e ibomba bwino ilyo baleshimikila.

Ifyo Mwingacita:

Ipusheni icipusho icingalenga mwalanga uo mwaipusha icipandwa umo mufumishe ico cipusho. Nalimo kuti mwamwipushapo icipusho cimo pa fipusho ifyaba pa kutendeka kwa cila cipandwa. Ilyo mwaumfwa ifyo uo mwipwishe ayasuka, belengeniko ilembo limo kabili mulangeni paragrafu umufumine ilyo ilembo, lyena nalimo kuti mwalanshanyako nankwe panono.
Inshila na imbi, kubomfya ifyebo fyaba pa mabuula ya kubalilapo pa kulenga uo mulelanshanya nankwe ukufwaisha ukwishibilapo na fimbi kabili mulangeni icipandwa pa kuti eshibe ifyo Baibolo isambilisha. Ku ca kumwenako, kuti mwalanda pa kayofi nelyo ubusanso ubo balandilepo nomba line pa mulabasa kabili mulondolweleni ukuti abantu abengi balafwaya ifyasuko kuli ifi fipusho fili pe buula 3. Nalimo kuti mwatila muletandalila abena mupalamano pa kuti mulanshanye nabo pa fisuma ifikacitika ku ntanshi. Lyena kuti mwabalanga ifikope ifyaba pa mabuula 4 na 5 no kubepusha ukuti, “Bushe pali aya malayo balandapo, malayo nshi mwingatemwa ukumonako yafikilishiwa?” Inshila na imbi iyo mwingabomfya kuti mwatila fye muletandalila abantu no kubafwa ukusanga ifyasuko ku fipusho ifyacindama sana. Lyena kuti mwalanga abo muleshimikilako ifipusho ifyaba pe buula 6, no kubepusha balanda icipusho ico bengatemwa ukwishiba icasuko.
Nalimo kuti mwaipusha fye uo muleshimikilako mu kulungatika nga mwingatendeka isambililo lya Baibolo nankwe. Nalimo kuti mwasosa amuti: “Tulelanga abena mupalamano icitabo ico tubomfya pa kusambilila na bantu Baibolo. Bushe mwalicimonapo? [Lekeni basuke.] Nga namukwata inshita iinono fye, kuti natemwa ukumulanga ifyo tusambilila na bantu Baibolo.”

Esheniko Ukucita Ifi Uno Mweshi:

Pa mapepo ya lupwa, mukesheko ukucita ifi twalandapo pa kupekanya ifya kupeela abantu ici citabo.
Ilyo muli mu mulimo, ebeni abo mulebomba nabo ifyo mupekenye ukulanda. (Amapi. 27:17) Kuti mwayalula ifyo mupekenye ukulanda nga mwamona ukuti tafilebomba bwino.