Ifingatwafwa Ukulashimikila Bwino—Ifyo Twingasuka Umwine wa Ng’anda nga Atusasukila

Ico Cacindamina: Abantu abengi abo tusanga mu butumikishi balatwasuka fye bwino. Lelo, Yesu asobele ukuti abantu bamo bakatupata. (Yoh. 17:14) Kanshi tulingile ukulaenekela ukuti inshita shimo kuti twakumanya abantu abengatusasukila. Nga twasanga abantu bamusango yu, tulingile ukwasuka mu nshila iisuma iingalenga Yehova uo tulandilako atemwa. (Rom. 12:17-21; 1 Pet. 3:15) Nga twacita ifi tukalenga ubwafya ukukanakulilako, kabili ilyo abantu bambi na bene ba ng’anda bamona ifyo twacita, cikalenga bakafwaye ukukutika nga Inte sha kwa Yehova shabatandalila na kabili.—2 Kor. 6:3.

Ifyo Mwingacita:

Tekeni umutima kabili beni aba bucibusa. Ici cikalenga ukuti ifintu fibipa sana. Mwilamona kwati ni mwe bafulilwe. (Luk. Mil. 7:9) Nalimo icilengele ukuti bakalipe ni co nabakwata amafya, nelyo limbi ni co inshita mwabatandalilapo taiweme. Nangu twasanga ukuti tabafwaya fye ukukutika ku mbila nsuma, tulingile ukwibukisha ukuti nalimo icalenga ni co balibeba ifya bufi pali ba Nte.—2 Kor. 4:4.
Beni abafuuka pa kwasuka kabili bomfyeni amashiwi ayasuma. (Amapi. 15:1) Bushe mwacibabusha fye mu tulo nelyo bacilacita fimo ifyo mwacibapumfyanya? Nangu ca kuti tatulomba ubwelelo ukuti twaciya mu ku bashimikila, nga twamona ukuti twabapumfyanya, tulingile ukulomba ubwelelo pa kuya pa nshita iishiweme. Nga twasanga ukuti icilengele bafulwe ni co balibeba ifya bufi pa Nte sha kwa Yehova, kuti twatila: “Ca cine ico cena kuti ca mukalifya. Na lyo line, ndemona kwati nalimo abamwebele tabamulondolwelele bwino. Bushe kuti mwatemwa imulondolwele?” Nga mwamona ukuti icalenga bamusasukile ni co tabatemwa fimo ifyo twasuminamo, pamo nga ukutamfya abacita ifibi mu cilonganino nelyo ukukaana ukubikwamo umulopa, kuti mwatila: “Naumfwa icalenga mukalipe. Kwaliba na bambi abayumfwa ifyo fine. Bushe kuti mwatemwa na mulangako amalembo ayalenga tulecita ifi?”
Nga mwamona ukuti umuntu nakalipa sana, kuti cawama mwafumapo fye ukwabula ukumwasuka. Nga batila tabalefwaya Inte sha kwa Yehova ukulaisa pa mwabo, kuti mwabeba ukuti cisuma mukwai twaumfwa.

Esheniko Ukucita Ifi Uno Mweshi:

Ilyo muli pa mapepo ya lupwa pitulukeni mu fyo mwingacita nga bamusasukila ilyo muleshimikila.
Nga mwafuma pa ng’anda apo bamusasukila, lanshanyeni na uo mulebomba nankwe inshila iisuma iyo mwaciba no kwasukilamo.