‘Muleba aba Mutende ku Bantu Bonse’
1. Mashiwi nshi aya mu Baibolo ayo tulingile ukukonka abo tuleshimikila nga bakalipa?
1 Abantu ba kwa Yehova balitemwa umutende kabili bashimikila imbila nsuma iya mutende. (Esa. 52:7) Lelo inshita shimo tulasanga abantu abakalipa pa mulandu wa kuti twaya pa mwabo mu kushimikila. Cinshi icikatwafwa ukuba aba mutende nga twasanga abantu ba musango uyu?—Rom. 12:18.
2. Cinshi tufwile ukulaibukisha abo tuleshimikila nga bakalipa?
2 Muleiluka: Bamo balakalipa nga twaya mu kubashimikila pantu tabatemwa icine, lelo bambi bena kulaba fye fimbi ifilenga ukuti bakalipe. Nalimo kuti inshita twailapo mu kubashimikila, e ishili bwino. Umwine wa ng’anda nalimo kuti nakalipa pa mulandu wa mafya akwete. Ca cine ukuti bamo balakalipa ilyo tulefwaya ukubashimikila pantu tabafwaya ukukutika ku mbila nsuma. Na lyo line, tulingile ukwishiba ukuti icalenga ukuti bakalipe nalimo ni co abantu balibeba ifya bufi pali ifwe. (2 Kor. 4:4) Nga tuleiluka tatwakomfwe ububi no kumona kwati ni fwe twalenga umwine wa ng’anda ukukalipa.—Amapi. 19:11.
3. Kuti twalanga shani ukuti twalicindika abene ba ng’anda?
3 Langeni Ukuti Mwalicindika Abantu Bambi: Abantu abengi abo tushimikila imbila nsuma balikwata ifisumino ifyo bacindika sana. (2 Kor. 10:4) Balikwata insambu sha kukutika ku fyo tulebashimikila nelyo ukukaana. Tatulingile ukulasuula ifyo abene ba ng’anda basuminamo nelyo ukuilanga ukuti ni fwe twaishiba fyonse. Nga batweba ukufuma pa ng’anda yabo, tufwile ukufumapo mu mucinshi.
4. Bushe calola mwi ukuba ne milandile iisuma?
4 Imilandile Yesu Ilingile Ukuba Iisuma: Abo tulelanda nabo nangu balande ifyabipa kuli ifwe, tatufwile ukwasuka mu bukali lelo tufwile ukuba abafuuka ne milandile yesu ifwile ukuba iisuma. (Kol. 4:6; 1 Pet. 2:23) Mu nshita ya kutendeka ukuumana nabo, kuti cawama mwalandako pa fintu fimo ifyo mwingasuminishanya. Nalimo kuti mwabepusha bwino bwino ico bashifwaila ukukutika ku mbila nsuma. Lelo inshita shimo cilawama ukuleka fye ukulanda no muntu nga akalipa pa kuti ekalipa sana.—Amapi. 9:7; 17:14.
5. Busuma nshi bwaba mu kuba aba mutende ilyo tuleshimikila?
5 Nga tuli aba mutende, abene ba ng’anda nalimo kuti baisakutika ilyo Nte umbi akabatandalila. (Rom. 12:20, 21) Nangu ca kuti pali ino nshita tabafwaya nangu panono ukukutika ku mbila nsuma, nalimo ku ntanshi kuti baisaba Inte ya kwa Yehova. (Gal. 1:13, 14) Na lyo line, nangu tabasambilile icine, ifwe nga tuleilama no kuba aba mutende ilyo tuleshimikila, tulacindika Yehova no kuyemfya isambilisho lyesu.—2 Kor. 6:3.