Abashipa Lelo aba Mutende
1 Abantu abengi abo tushimikila nga twabepusha ifyo basumina, ifyo balanda filapusana ne cine icaba mu Baibolo. Ca cine tulingile ukushipa pa kushimikila, lelo na kabili tufwile ‘ukuba aba mutende ku bantu bonse’ kabili tatufwile ukubakalifya. (Rom. 12:18; Imil. 4:29) Bushe ilyo tulebila imbila nsuma ya Bufumu kuti twaba shani abashipa lelo aba mutende?
2 Landeni Ifyo Bonse Mwaishiba: Umuntu uufwaya umutende tafwaya ukumana na bantu bambi. Ukweba uo tulelanda nankwe pa ng’anda ukuti ifyo asumina fya bufi kuti calenga etupokelela bwino. Nga ca kuti ifyo balanda te fyo Baibolo isambilisha, nalimo mano mano kuti twalanda pa lyashi limo ilyo tulemona ukuti bonse kuti twasuminishanya. Nga ca kuti twakomaila pa fintu ifyo bonse twaishiba, kuti twalenga balamona ukuti tatwendele ukususha ifyo basumina kabili kuti bafwaya ukukutika.
3 Nga ca kutila tatwebele umuntu icine icaba mu Baibolo ilyo atweba icisambilisho ca bufi ico aishiba, bushe ninshi tuletila ifyo asumina fya cine nelyo bushe ninshi tuleti icine twasambilila tacafikapo? Awe nakalya. Umulimo wesu fwe Bena Kristu, te wa kusuusha fyonse ifyo abantu batweba ukuti e fyo baishiba, lelo wa kubila imbila nsuma ya Bufumu bwa kwa Lesa. (Mat. 24:14) Kanshi tatulingile ukulengulula ifyo abantu batweba ukuti e fyo basumina, lelo tulingile ukushukila iyo nshita nge ya kwishiba bwino ifyo baletontonkanya.—Amapi. 16:23.
4 Cindikeni Abo Muleshimikila: Inshita shimo tulingile ukushipa ilyo tuleeba abantu ukuti ifyo baishiba te fyo Baibolo isambilisha. Lelo apo ifwe tufwaya umutende, tatulengulula abantu nelyo ukulanda amashiwi ya kusuusha bonse abaishiba ifisambilisho fya bufi na basambilisha ifya bufi. Abantu tabafwaya ukuba no muntu uilanga ukuti e waishiba fyonse. Lelo nga tulebinga abantu no mucinshi kabili abaicefya, bakatemwa ukumfwa icine. Nga twacindika abo tulelandako kabili tatulesuusha ifyo baishiba bakamona ukuti natubacindika, kabili bakasumina bwangu icine ico tulebeba.
5 Umutumwa Paulo aleishibila limo ifyo abo aleshimikilako baishiba kabili alesala na mashiwi ayasuma aya kusabankanishishamo imbila isuma pa kuti baumfwa bwino bwino. (Imil. 17:22-31) Ali-itemenwe ukuba “fyonse ku ba misango yonse,” pa kutila ‘mu nshila yonse apususheko bamo.’ (1 Kor. 9:22) Na ifwe tulingile ukucita cimo cine, ukuba no mutende ilyo tulebila imbila nsuma no kushipa.