Umukululo Wa Cipusho

◼ Ni shani fintu imilandu ilingile ukubombwapo lintu mwine ŋanda apampamina pa kuti Inte sha kwa Yehova shikatandala na kabili pa ŋanda yakwe?

Nga ca kuti twasanga icishibilo pa mwinshi ico mu kukosa cilebinda ukutandala kwa musango wa butotelo nelyo mu kulungatika calumbula Inte sha kwa Yehova, kuti cabe cawamisha ukucindika ukufwaya kwa kwa mwine ŋanda no kusengauka ukukonkonsha.

Inshita shimo tusanga icishibilo icilebinda abasulwishi nelyo abalombelesha. Apantu tulebomba umulimo wa butotelo, ico tacitukuma. Kuti caba icalinga ukutwalilila no kukonkonsha pali uyo mwinshi. Nga ca kuti mwine ŋanda akaana, kuti mu mucenjelo twalondolola umulandu tuleyumfwila ifyo ifishibilo fya musango yo tafitukuma. Nga ca kuti mwine ŋanda lyene acilengo kumfwika ukuti icibindo cilesanshamo Inte sha kwa Yehova, tukacindika ukufwaya kwakwe.

Mu milandu inono lintu twatandala pa ŋanda yakwe, mwine ŋanda kuti pambi afulwa mu kumonekesha kabili akonkomesha ukuti twikatandala na kabili. Tukomfwila uku kulomba. Icalembwa cabikwapo bushiku cilingile ukubikwa muli enifulupu wa cifulo ca kubombelamo pa kuti bakasabankanya balebombela mu cifulo ku nshita ya ku ntanshi bakasengauke ukutandala pali ilya ŋanda.

Tulingile ukusunga mu muntontonkanya, nangu cibe fyo, ukuti amayanda ya musango yo tayalingile kusengaukwa kuli pe na pe. Abaleikalamo pali nomba kuti pambi bakuuka. Kuti pambi twakumanya icilundwa cimbi ica lupwa uwaankulako bwino. Kuti cacitikako ukuti mwine ŋanda uyo twalandileko kuti ayalula umutima no kuba uwacilapo kusuminisha ifwe ukutandala. E co, pa numa ya nshita imo, ukufwailisha kwabamo mucenjelo kulingile ukucitwa ukwa baleikalamo ku kupima ukuyumfwa kwabo ukwa ndakai.

Faelo wa cifulo ca kubombelamo alingile ukupitulukwamo umuku umo mu mwaka, ukupanga umutande wa mayanda apo twaebwa ukukanatandalilapo. Pe samba lya butungulushi bwa kwa kangalila wa mulimo, bakasabankanya bamo abacenjela, ababelesha kuti bapeelwa umulimo wa kutandalila aya mayanda. Kuti calondololwa ukuti tuletandala ku kufwailisha nga ca kuti ni mwine ŋanda umo wine acili ekala palya. Kasabankanya alingile ukuba uwabeleshanya ne fyebo fya mu citabo ca Ukupelulula, amabula 15-24, ifyakwato mutwe wa kuti “Ifyo Limbi Wingankula ku Fimoneka Ukucilikilo Kulanshanya.” Nga ca kuti kuliko ukwankulako kwabamo kupelulula, ukutandala kwa ku ntanshi kuti kwacitwa mu nshila imo ine. Nga ca kuti mwine ŋanda atwalilila ukuba uwa bulwani, takuli ukutandala kwalundwapo kulingile ukucitwa ukufikila umwaka ukakonkapo. Ibumba lya baeluda ilya cikaya kuti lyapingulapo nga ca kuti imibele muli uyo mulandu ilecilenga ukuba icabamo amano ukubomba pa fintu mu nshila yapusanako.