Mulebomfya Icitabo Citila Kuti Mwaba ne Nsansa Umuyayaya! pa Kwafwa Umusambi Ukukosha Icitetekelo Muli Yehova na Yesu

Pa kuti abasambi balecita ifyo Yehova atemwa, balingile ukuba ne citetekelo cakosa. (Heb. 11:6) Kuti twabomfya icitabo citila Kuti Mwaba ne Nsansa Umuyayaya! pa kubafwa ukukosha icitetekelo cabo. Muli ici citabo mwaliba amalembo ayacindama, ubulondoloshi ubwayanguka ukumfwa, amepusho ayasuma, amavidio ne fikope ifisuma. Nga tulesambilisha abasambi besu ukuba ne mibele iisuma no kuba ifibusa fya kwa Lesa, ninshi tulekuula ukubomfya ifintu ifishingapya ku mulimo.—1 Kor. 3:12-15.

Abantu bamo bamona kwati te kuti babe ifibusa na Lesa uo bashimona. Kanshi tufwile ukubafwa ukwishiba Yehova no kumucetekela.

TAMBENI VIDIO ITILA, MULEKOSHA ICITETEKELO MULI YEHOVA UKUBOMFYA ULUPAPULO LUTILA “KUTI MWABA NE NSANSA UMUYAYAYA!” LYENA ASUKENI AYA MEPUSHO:

• Twaishiba shani ukuti nkashi alipekanya bwino ilyo ashilaya mu kutungulula isambililo?

• Bushe acibomfya shani bwino amepusho yambi ayo apekenye pa kulenga umusambi alanda ifyo aletontonkanya ilyo bacibelenga Esaya 41:10, 13?

• Bushe umusambi acicita shani ilyo acilatamba vidio na lintu bacilalanshanya ilembo?

Abantu abengi tabaishiba umo icilubula calola kabili tabaishiba no kuti Lesa alibapeele icilubula. (Gal. 2:20) Kanshi tulingile ukubafwa ukuba ne citetekelo mwi lambo lya cilubula ilya kwa Yesu.

TAMBENI VIDIO ITILA MULEKOSHA ICITETEKELO MULI YESU UKUBOMFYA ULUPAPULO LUTILA “KUTI MWABA NE NSANSA UMUYAYAYA!” LYENA ASUKENI AYA MEPUSHO:

• Twaishiba shani ukuti munyinefwe alipekanya bwino ilyo ashilaya mu kutungulula isambililo?

• Bushe acibomfya shani ifyaba apatila “Ishibilenipo na Fimbi” pa kwafwa umusambi?

• Mulandu nshi ukupepela pamo no musambi kwacindamina?