IFYEBO FYALUNDWAKO C
Ifya Kutungulula Amasambililo ya Baibo Ukubomfya Ulupapulo Lutila Kuti Mwaba ne Nsansa Umuyayaya!
Bamunyinefwe balibombeshe pa kupekanya ulupapulo lutila Kuti Mwaba ne Nsansa Umuyayaya! Pa kuti mulebomfya bwino ulu lupapulo, mulecita ifyakonkapo ilyo muletungulula amasambililo ya Baibo.
Ilyo mushilatendeka ukusambilila
1. Mulepekanya sana. Ilyo mulepekanya muletontonkanya pa mafya umusambi wenu akwete e lyo ne fyo asuminamo. Muletontonkanishisha kabela pa malyashi ayengafya umusambi wenu ukumfwa nelyo pa fingamwafya ukutendeka ukulafikonka, lyena muletontonkanya pa fyo mwingamwafwa. Mulemona ifyo ifyebo fyaba apatila “Ishibilenipo na Fimbi” fingafwa umusambi wenu, kabili nga mwamona ukuti nacilinga kuti mulefibomfya ilyo mulesambilila nankwe.
Ilyo mulesambilila
2. Mulepepa ilyo mushilatendeka ukusambilila na lintu mwapwisha, kano fye umusambi nga talefwaya.
3. Mwilalandapo sana. Mulelanda fye pa fili mu lupapulo kabili muleleka umusambi alelanda ifili ku mutima.
4. Ilyo mushilatendeka icipande, mulebalilapo ukubelenga apatila ifyo mwalasambilila ifili pali ico cipande kabili mulelandapo na pa masambililo ayanono ayalimo.
5. Nga mwapwisha amasambililo ayali mu cipande cimo, mulepitulukamo no musambi ukubomfya amepusho ayaba apatila ukupituluka mu cipande. Nga mwacita ifi umusambi akulaibukisha ifyo alesambilila.
6. Mulecita ifi ilyo mulesambilila no musambi mwi sambililo limo na limo:
Mulebelenga amaparagrafu ayaba pa ntendekelo ye sambililo.
Mulebelenga amalembo yonse ayo batile “Belengeni.”
Mulebelengako na malembo yambi ayalimo nga mwamona ukuti nacilinga.
Muletamba amavidio yonse ayo balandile ukuti “Tambeni” (nga ca kuti namukwata).
Muleipusha umusambi wenu amepusho yonse.
Mulingile ukweba umusambi ukubika amano ku fikope ifiba mu lubali lutila “Sambilileni na Fimbi” e lyo no kulandapo.
Mulebomfya ifyebo fyaba mu kabokoshi akatila “Ifyo Mwingacita” ku kulenga umusambi wenu alemona ifyo alelunduluka mu fya kwa Lesa. Mulemukoselesha ukulacita ifyo bamwebele mu kabokoshi nelyo ukupanga fimbi ifyakucita. Nga alefwaya kuti alecita ifyo bamwebele mu kabokoshi e lyo apangilapo na fimbi.
Muleipusha umusambi wenu nga alitambako vidio nelyo ukubelengako icipande cimo apatila “Ishibilenipo na Fimbi” ilyo alepekanya isambililo.
Mule-esha ukupwisha isambililo mu bushiku bumo.
Nga mwapwisha ukusambilila
7. Muletwalilila ukutontonkanya pa musambi wenu. Mulepepa kuli Yehova ukuti aleafwa umusambi wenu ukulunduluka, kabili alemupeela amano pa kuti muleishiba ifyo mwingacita pa kumutungilila.