Ipekanyeni Bwino pa Kusambilisha
1. Cinshi ico tulingile ukubikilako amano ku kwafwa umuntu ukuti alebikako amano nga tulemusambilisha Baibolo?
1 Ilyo tulesambilisha umusambi Baibolo tulingile ukupekanya bwino sana pa kuti twingamwafwa ukutampa ukulabombela Yehova. Tulingile ukubikako sana amano ku kumwafwa ukutemwa icine ca muli Baibolo. Nga amona ukuti natubikako amano akalafwaya sana ukusambilila. (Amala. 6:5; Amapi. 4:23; 1 Kor. 9:26) Kuti twacita shani pa kuti tufike pa mutima wa musambi?
2. Bushe ipepo litwafwa shani nga tulefwaya ukupekanya bwino?
2 Mulepepa pa Kupekanya: Apo ni Yehova e ulenga icine ukulimba imishila mu mutima wa muntu, kanshi pa kutampa ukupekanya ukuya mu kusambilila no muntu kuti twabala twamupepelako, mwi pepo kuti twalundamo ne fyo tulemona ukuti e fyo alebulishamo. (1 Kor. 3:6; Yako. 1:5) Ipepo lya musango uyu na ifwe kuti lyatwafwa ukumona ifyo twingamwafwa sana “ukwishiba bwino bwino” ifyo Yehova afwaya.—Kol. 1:9, 10
3. Bushe ukutontonkanya pa musambi ilyo mulepekanya kucita shani?
3 Tontonkanyeni pa Musambi: Yesu alishibe ukuti pa kusambilisha bwino kano nawishiba bwino ifyaba abantu abo ulesambilisha. Yesu balimwipwishe icipusho cimo ciine imiku ibili ica kuti: “Cinshi ningacita pa kuti nkwate ubumi bwa muyayaya?” Pa kwasuka, taleasuka fye cimo ciine. (Luka 10:25-28; 18:18-20) Ilyo tulepekanya tufwile ukulatontonkanya pa musambi na pa fyo alingile ukwishiba. Tulingile ukumona nampo nga malembo nshi twalayabelenga. Bushe tulingile ukuyasambilila ifingi nangu iyo? Fishinka nshi mwi sambililo ifyo umusambi ashingasumina nangu ifyo ashingomfwikisha? Nga ca kuti tuleenekela ukuti nalimo umusambi kuti aipusha ifipusho fya musango uyu, kuti twaipekanya ukwasuka bwino.
4. Bushe ukupekanya bwino kucita shani?
4 Pitulukeni mwi Sambililo: Nangu ca kuti ifyebo mwalaya mu kusambilisha mwalifisambilila imiku iingi, uyu walaba e muku wa kubalilapo ukusambilila no yo muntu. Nga tulefwaya ukumufika pa mutima, tulingile ukupekanya bwino isambililo limo na limo. Calola mu kuti, ifyo tukoselesha umusambi wesu ukulacita e fyo na ifwe tulingile ukulacita. Pitulukeni mu fyebo, ukubikako na malembo, tontonkanyeni na pa musambi, e lyo kabili mulingile ukushila pa fishinka fikalamba.—Rom. 2:21, 22.
5. Kuti twapashanya shani Yehova?
5 Yehova alafwaya sana ukuti umusambi wa Baibolo onse aleya pa ntanshi. (2 Pet. 3:9) Nga tulepoosapo inshita pa kupekanya isambililo limo na limo, tukalangilila ukuti na ifwe tulafwaya sana abasambi ukulaya pa ntanshi.