Sungeni
Ukutungulula Amasambililo ya Baibolo Ayalunduluka
Ifishinka fili muli ici ica mu kati fifumine mu fipande fyalelanda pa kutungulula amasambililo ya Baibolo ayalunduluka ifyali mu Ubutumikishi Bwesu Ubwa Bufumu. Bonse mulekoseleshiwa ukusunga ici ica mu kati kabili mulecibomfya ilyo muletungulula amasambililo ya Baibolo. Na kabili, ifishinka ukufuma muli ici ica mu kati kuti fyabomfiwa pa kukumana kwa mu mulimo wa mwi bala, kabili kangalila wa mulimo kuti abomfya iyi mitubululo mu malyashi apeela ilyo aletandalila ififulo fya masambililo ya fitabo.
Ulubali 1: Isambililo lya Baibolo Cinshi?
Nga ca kutila lyonse mulalanshanya no muntu ifyaba mu Baibolo mu nshila yatantikwa bwino nangu cingatila ni pa kashita akanono ukubomfya Baibolo nelyo ukubomfya ulupapulo ulwasuminshiwa ukusambililamo, ninshi muletungulula isambililo lya Baibolo. Isambililo kuti lyacitwa lipoti nga lyatungululwa imiku ibili pa numa ya kulangisha uyo muntu ifya kusambilila na kabili nga tulemona ukuti isambililo likatwalilila.—km 7/04 ibu. 1.
Impapulo Shasuminishiwa Ukusambililamo
◼ Cinshi Cintu Lesa Afwaya Kuli Ifwe?
◼ Ukwishiba Uko Kutungulula ku Mweo wa Muyayaya
◼ Pepeni Lesa Wine Wine Eka
◼ Kuti Mwaba Cibusa wa kwa Lesa! iyi broshuwa kuti yabomfiwa mu kutungulula isambililo na bantu abashafika apatali mu masomo ya ku sukulu nelyo abashaishibisha ukubelenga bwino.
Ulubali 2: Ukupekanishisha Libela Ukutungulula Isambililo
Tulekabila ukulanda ifyebo mu nshila ilefika umusambi pa mutima. Ici cifwaya ukuti tupekanye bwino bwino no kutontonkanya pa kukabila kwa musambi.—km 8/04 ibu. 1.
Ifya Kupekanya
◼ Taleni bebeteni umutwe we sambililo, utumitwe tunono, ne fikope ifili mu cipande nelyo isambililo.
◼ Fwayeni apali amasuko ku mepusho, kabili shileni fye pa fishinka.
◼ Saleni amalembo ya kuyabelenga pe sambililo. Lembeni amashiwi ayanono mu mbali ya citabo.
◼ Pekanyeni mu kwipifya ifyo mukapitulukamo mu fishinka fikalamba.
Tungululeni Isambililo Ukulingana no Kukabila kwa Musambi
◼ Pepeleni umusambi ne fyo alekabila.
◼ Tontonkanishisheni libela pa fishinka fingakosela umusambi ukuumfwa nelyo ukusumina.
◼ Tontonkanyeni pali ifi fipusho: ‘Finshi umusambi alekabila ukwishiba nelyo ifyo alekabila ukubombelapo pa kuti alunduluke ku mupashi? Bushe kuti namufika shani pa mutima?’
◼ Nga cilekabilwa pekanyeni icilangililo, ubulondoloshi, nelyo amepusho ayengafwa umusambi ukumfwikisha icishinka nelyo ilembo.
Ulubali 3: Ukubomfya Bwino Amalembo
Umulandu ukalamba uo tutungulwila amasambililo ya Baibolo ‘kupanga abasambi.’ Kuti twacite fyo ukupitila mu kubafwa ukwishiba no kusumina amasambilisho yaba mu Cebo ca kwa Lesa no kulayabomfya mu mikalile yabo. (Mat. 28:19, 20; 1 Tes. 2:13) E ico kanshi, ilyo tuli pe sambililo tufwile ukubomfya sana Amalembo.—km 11/04 ibu. 4.
Sambilisheni Ukufuma mu Cebo ca kwa Lesa
◼ Langeni umusambi ifya kusanga amalembo muli Baibolo wakwe.
◼ Moneni no kulanshanya Amalembo ayalondolola ifyo twasuminamo.
◼ Bomfyeni Amepusho. Mu nshita ya kuti imwe mulelondolola Amalembo ku musambi, lekeni wena amulondolwele.
◼ Angusheni. Mwilalondolola fyonse ifili mwi lembo. Londololeni fye ifilekabilwa pa kulenga icishinka ukumfwika.
◼ Mulangeni ifya kubomfya ifyebo alesambilila. Afweni umusambi ukumona ifyo amalembo yamukumine.
Ulubali 4: Ukukansha Abasambi Ukupekanya
Umusambi uupekanishisha libela no kutontonkanyapo pa fyo akasuka mu mashiwi yakwe umwine alalunduluka bwangu sana ku mupashi. Kanshi isambililo lya lyonse nga lyatantikwa, pekanishisheni isambililo pamo no musambi no kumulanga ifya kucita. Ku basambi abengi kuti cawama ukupekanya icipande conse nelyo isambililo pamo nabo.—km 12/04 ibu. 1.
Ukushila Ifyasuko no Kulemba Ifyebo mu Mbali
◼ Londololeni ifya kusanga ifyasuko fya mu kulungatika ku mepusho.
◼ Langeni umusambi icitabo cenu ico mulesambililamo umo mushilile fye fishinka.
◼ Afweni umusambi ukumona amalembo ayaloshiweko ayaletungilila icishinka mu paragrafu, kabili mulangeni ifya kulemba amashiwi ayanono mu mbali ya citabo alesambililamo.
Moneni Ifilimo Kabili Pitulukenimo
◼ Langeni umusambi ifya ukubebeta icipandwa nelyo umutwe we sambililo, utumitwe tunono, ne filangililo ifilimo ilyo ashilatendeka ukupekanya isambililo lyonse.
◼ Koselesheni umusambi ukupituluka mu fishinka fikalamba pa mpela ya kupekanya isambililo.
Ulubali 5: Ifyo Mwingeshiba Ukufula kwa Fyebo Mwalasambilila
Ubwingi bwa fyebo ifilingilwe ukusambilila fikashintilila pa kucenjela kwa kwa kasambilisha no musambi, e lyo ne fyo ifintu fili kuli bonse babili.—km 1/05 ibu. 1.
Kuuleni Icitetekelo Cakosa
◼ Calicindama sana ukuleka umusambi ukwishiba isambililo bwino bwino ukucila ukusambilila ifingi lubilo lubilo.
◼ Pooseni inshita iingakabilwa ukwafwilisha umusambi ukwishiba no kusumina ico alesambilila.
◼ Pooseni inshita ikalamba ukubelenga amalembo ayaletungilila sana ifyo mulesambilila.
Mwilapumbulwa Ilyo Mulesambilisha
◼ Nga ca kutila umusambi alitemwa ukulanda sana pa milandu imukumine, kuti mwamweba ukuti mwalalanshanya nankwe inshita imbi pa numa ye sambililo.
◼ Mwifusha ifya kulanda pe sambililo. Mwilanda sana pa fishinka fishili mwi sambililo ne fya kukumanya pantu kuti calenga umusambi ukukanaishiba bwino bwino amasambililo ya kutampilapo ukwishiba mu Baibolo.
Ulubali 6: Ifya Kucita Ilyo Umusambi Aipusha Icipusho
Nga mwatendeka ukutungulula isambilililo lya Baibolo, cilawama ukusambilisha umusambi amasambililo ya mu Baibolo mu kukokana ukucila ukulacilaukila. Nga tatulecilaukila, tukaafwa umusambi ukuba ne ntendekelo isuma iya bwishibilo bwine bwine kabili tukaafwa umusambi ukulunduluka mu fintu fya ku mupashi.—km 2/05 ibu. 6.
Muleiluka
◼ Amepusho ayalelanda pa fyo mulesambilila kuti mwayasuka apo pene fye.
◼ Amepusho ayapusene ne fyo mulesambilila nelyo ayalekabila ukufwailisha pa kuti mwasuke bwino kuti caba bwino ukwisalanshanya pa bushiku bumbi. Kuti cawama ukulemba ayo mepusho.
◼ Nga ca kuti umusambi camukosela ukusumina fimo ifyo Baibolo ilanda lanshanyeni pa fyebo fyalundwapo ifilondolola bwino bwino ifyo Baibolo ilanda pali ilyo lyashi.
◼ Nga ca kuti umusambi tashininwe pa fyo mwamweba, lekeni ilyo lyashi, mukeselandapo inshita imbi. Kabili twalilileni ne sambililo.
Muleicefya
◼ Nga tamwishibe bwino ifya kwasuka umusambi, mwiesha ukulanda fye ifyo mwaishiba.
◼ Panono panono sambilisheni umusambi ifya kusanga ifyebo alefwaya mu mpapulo.
Ulubali 7: Ukupepa pe Sambililo
Ipaalo lya kwa Yehova lilakabilwa pa kuti abasambi ba Baibolo balunduluke ku mupashi. E ico, tukabila ukwiswila no kusondwelela isambililo ne pepo.—km 3/05 ibu. 4.
Ifya Kutendeka Ukupepa
◼ Ku bantu abatemwa ifya mapepo kuti twapepa pa muku wa kubalilapo fye uwe sambililo.
◼ Ku basambi bambi, kuti twamona inshita iingalinga iya kutendeka ukupepa pe sambililo.
◼ Kuti twabelenga Amalumbo 25:4, 5 na 1 Yohane 5:14 pa kulondolwela umusambi umulandu tufwile ukupepela.
◼ Kuti twabelenga na Yohane 15:16 pa kulondolola ukuti tufwile ukupepa kuli Yehova ukupitila muli Yesu Kristu.
Ififwile Ukulumbulwa mwi Pepo
◼ Caliwama ukutasha Yehova pantu e Kasambilisha Mukalamba.
◼ Sanshenimo amashiwi ayalelanga ukuti mwalitemwa sana umusambi.
◼ Tasheni na pa kuteyanya uko Yehova alebomfya.
◼ Pepeni ukuti Yehova apaale umusambi pa fyo aleibikilishako ukukonka ifyo alesambilila.
Ulubali 8: Ukutungulula Abasambi ku Kuteyanya
Ubuyo bwesu ubwa kutungulula amasambililo ya Baibolo te kusambilisha fye ifyo twasuminamo, lelo no kwafwa abasambi ukuba ulubali lwa cilonganino ca Bwina Kristu. Cila mulungu bomfyeni amaminiti ayanono pe sambililo ukusambilishako umusambi icishinka cimo pa kuteyanya kwa kwa Yehova.—km 4/05 ibu. 8.
Ukulongana kwa pa Cilonganino
◼ Londololeni ukulongana kumo na kumo. Balaalikeni ukusangwa ku kulongana umuku uwa kubalilapo mwasambilila na bo.
◼ Bebeniko ifishinka fyapulilemo pa kulongana.
◼ Londololeni mu nshila ya kuti umusambi akafwaishe ukusangwa ku Cibukisho, ukulongana kukalamba, no kutandala kwa kwa kangalila wa muputule.
◼ Bomfyeni ifikope fyaba mu mpapulo shesu ukubafwa ukwelenganya ificitika ku kulongana.
◼ Bakoselesheni ukubelenga broshuwa wa Inte sha kwa Yehova—Ni Bani? Finshi Basuminamo?
Bomfyeni Amavidio ku Kukusha Ubuseko Bwabo mu Kuteyanya
◼ Jehovah’s Witnesses—The Organization Behind the Name
◼ Our Whole Association of Brothers
◼ United by Divine Teaching
◼ To the Ends of the Earth
Ulubali 9: Ukusambilisha Abasambi Ifya Kushimikila Ubunte bwa mu Lyashi
Lintu abasambi ba Baibolo batetekela ifyo balesambilila, balafwaisha ukwebako bambi.—5/05 ibu. 1.
Bakoselesheni Ukushimikila
◼ Bushe balikwatako ifibusa nelyo balupwa abo bengalaalika ukusangwapo lintu mulesambilila?
◼ Bushe abo babomba na bo, abo basambilila na bo, nelyo abo bangala na bo balafwaya ukusambilila?
Basambilisheni Ukwebako Bambi Ifyo Balesambilila
◼ Nga mwafika pa fishinka fimo ilyo mulesambilila, ipusheni umusambi ukuti, “Kuti mwabomfya shani Baibolo pa kulanda pa cine cintu mulesambilila ku lupwa lwenu?”
◼ Afweni umusambi ukuba uwa mucetekanya, uwa mucinshi kabili uwafuuka lintu alelanda na bambi pali Yehova Lesa no kufwaya kwakwe.
◼ Kuti babomfya broshuwa wa Inte sha kwa Yehova—Ni Bani? Finshi Basuminamo? ku kwafwa ifibusa na ba lupwa ukwishiba ifyo twasuminamo ne milimo tubomba ifyashimpwa pali Baibolo.
Ulubali 10: Ukusambilisha Abasambi Ukushimikila Abantu ku Ng’anda ne Ng’anda
Baeluda nga bamona ukuti umusambi wa Baibolo nalinga ukuba kasabankanya ushabatishiwa, e lyo umusambi engatendeka ukushimikila pamo ne cilonganino.—km 6/05 ibu. 1.
Ukupekanya Pamo Nankwe
◼ Langeni umusambi uko engasanga ifyebo engalanda pa kutendeka ukushimikila.
◼ Afweni umusambi wa Baibolo ukusale fyebo ifingamwangukila ukulanda kabili ifingalinga mu cifulo mushimikilamo.
◼ Mukoselesheni ukubomfya Baibolo ilyo ali mu mulimo.
◼ Pitulukenimo bonse pamo. Mulangeni ifya kwankula bwino ku fyo abantu abengi mu cifulo mubombelamo basosa.
Ukushimikila Capamo
◼ Lekeni umusambi amone ifyo mwalalanda ifyebo mwacipekanishisha pamo.
◼ Ilyo mulecita ifyo kuti cawama ukutontonkanya pa fyo icifyalilwa cakwe caba ne fyo engaba na maka ya kucita. Limo cilawama ukuleka umusambi ukulandapo ifinono fye.
◼ Afweni kasabankanya mupya ukupekanya ukulabombako umulimo wa kushimikila lyonse.
Ulubali 11: Ukwafwa Bakasabankanya Abapya Ukubwelela ku Bakutike
Ukupekanya icipempu ca kubwelelamo kutendekela pa fyo mwalanshenye pa kutandala kwa kubalilapo. Koselesheni umusambi ukubika sana mano ku bo alelanshanya nabo. Mulemusambilisha ukuti alekoselesha mwine ng’anda ukulanda ifyo aletontonkanya, alekutika ifyo alelanda, no kumona ifyo mwine ng’anda afwaya ukwishiba.—km 7/05 ibu. 1.
Ukupekanya Ukubwelelako
◼ Pitulukeni mu fyo alanshenye no muntu atendekelepo ukulanshanya nankwe, kabili langeni umusambi ifya kusala ifyebo filelanda pa fyo umwine wa ng’anda engatemwa ukumfwa.
◼ Pekanyeni ifyebo ifinono umwingaba ukubelenga ilembo na paragrafu imo mu lupapulo ashalike umuku wafumineko.
◼ Pekanyeni icipusho ica kwipusha umwine wa ng’anda pa mpela ya kulanshanya.
Angweni Ukubwelelako
◼ Koselesheni umusambi ukulabwelelako bwangu kuli bonse abasekelele.
◼ Afweni umusambi ukwishiba ukuti alekabila ukubwelela libili libili ku bantu abashisangwa pa mayanda.
◼ Langeni kasabankanya mupya ifyo engapangana no mwine wa ng’anda ukuti akabweleleko, kabili mwafweni ukwishiba ukuti calicindama ukubwelelako nga alaya.
Ulubali 12: Ukwafwa Abasambi Ukutendeka Amasambililo ya Baibolo no Kulayatungulula
Icacindama sana kulapashanya Yesu mu kulacita ifyo mulesosa ilyo muli mu mulimo. Ilyo umusambi wenu alemona ifyo mulebomba bwino mu butumikishi, akeshiba bwino sana ukuti icikalamba ico tupempwila abo twalanshenye na bo, kutendeka ukusambilila na bo Baibolo.—km 8/05 ibu. 1.
Ukubatambika Isambililo lya Baibolo
◼ Ebeni umusambi ukuti te fyonse fye ifyo tucita pe sambililo lya Baibolo ifyo tufwile ukulondolwela abantu.
◼ Ilingi cilawama ukubalangilila fye ifyo ciba pe sambililo ukubomfya paragrafu imo nelyo yabili mu lupapulo tubomfya pa kusambilila.
◼ Pitulukeni muli imo iya mitubululo pa fya kutendeka amasambililo ya Baibolo.—km 8/05 ibu. 8; km 1/02 ibu. 6.
Ukusambilisha Abasambi Ukuba Bakasambilisha
◼ Koselesheni abasambi ukulembesha mwi Sukulu lya Butumikishi Ilya Bulesa.
◼ Pekanyeni ukuti kasabankanya mupya amushindike ku masambililo ya Baibolo yambi uko na o engasambilishako.