Ifyebo Ififumine mu Mpapulo Shili mu Akatabo ka Imikalile no Mulimo Tubomba
© 2024 Watch Tower Bible and Tract Society of Pennsylvania
JANUARY 6-12
ICUMA ICABA MU CEBO CA KWA LESA AMALUMBO 127-134
Mwe Bafyashi, Twalilileni Ukusakamana Abana Benu
Mulemona Umulimo Mubomba mu Lupwa lwa kwa Yehova Ukuti Walicindama
9 Yehova abumbile abantunse na maka ya kukwata abana, kabili alibapeela no mulimo wa kulabasambilisha ukumutemwa no kulamubombela. Nga muli bafyashi, bushe mulatasha pali ubu bupe ubwaibela? Nangu ca kuti bamalaika balicila abantunse amaka na mano, Yehova tabapeelako amaka ya kukwata abana. Kanshi nga muli bafyashi, mufwile ukulatasha pe shuko mwakwata ilya kukusha abana. Abafyashi balipeelwa umulimo uwacindama uwa kukusha abana babo “ukulingana no kusalapula kwa kwa Yehova no kukonkomesha kwakwe.” (Efes. 6:4; Amala. 6:5-7; Amalu. 127:3) Pa kwafwa abafyashi ukulakusha bwino abana, icilonganino ca kwa Lesa calipekanya impapulo ishilanda pali Baibolo pamo nga ifitabo, amavidio, inyimbo, ne fipande fya pa webusaiti yesu. Ukwabula no kutwishika, Shifwe wa ku muulu no Mwana wakwe balitemwa sana abana. (Luka 18:15-17) Abafyashi nga bashintilila pali Yehova kabili bale-esha apo bengapesha ukukusha bwino abana babo, Yehova alatemwa nga nshi. Na kabili abafyashi nga balekusha bwino abana, balalenga baba ne subilo lya kuba mu lupwa lwa kwa Yehova umuyayaya!
Mwe Bafyashi, Mulesambilisha Abana Benu Ukutemwa Yehova
20 Mulingile ukwishiba bwino abana benu. Baibolo mu Amalumbo 127 yapashanya abana ku mifwi. (Belengeni Amalumbo 127:4.) Filya fine imifwi baipangila ne fintu ifyapusanapusana, kabili filya fine imo iba iikulu e lyo imbi iinono, e fyo na bana bapusana. Kanshi abafyashi balingile ukwishiba ifya kusambilisha umwana umo na umo. Abaupana bamo abekala ku Israel balilandile pa cabafwile ukukusha bwino abana no kubafwa ukulabombela Yehova. Batile: “Twaletungulula isambililo lya Baibolo ku mwana umo umo.” Kwena, imitwe ya ndupwa e bafwile ukusalapo nampo nga kuti babomfya iyi inshila pa kusambilisha abana nelyo iyo.
Ukufwayafwaya Icuma Icaba mu Cebo ca kwa Lesa
it-1-E ibu. 543
Ifimuti Ifyo Baibo Yalandapo
Uwambile amalumbo ya mu Baibo alandile pa fyo icimuti ca muolife caba ilyo alaile abatiina Yehova ati: “Abana bobe bakashinguluka itebulo lyobe nga filya utumisambo tumena ukushinguluka umuolife.” (Amalu. 128:1-3) Ilingi line utumisambo uto baleputula ku cimuti ca muolife icikalamba, baletulimba pa kuti tukamene tukabe ifimuti. Na kabili ifimuti fya miolife ifikalamba fyalemesha utumisambo ku mishila ya fiko. Nga filya utumisambo tushinguluka icimuti ca muolife, e fyo abana nabo bashinguluka shibo, kabili ifi fyaba pa filenga ulupwa luleba ne nsansa.
JANUARY 13-19
ICUMA ICABA MU CEBO CA KWA LESA AMALUMBO 135-137
“Shikulwifwe Alicila Tulesa Tonse”
it-2-E ibu. 661 amapara. 4-5
Amaka, Ifya Maka Ifyo Acita
Ifyo Lesa atungulula ifibumbwa fyali-ibela. Pa kuti Yehova alange ukuti ni Lesa wa cine, limo kuti abantu balafwaya alange ukuti alikwata amaka ya kutungulula ifyabumbwa ifya maka, kabili afwile ukucita ifi mu nshila yaibela iyakuma ubupilibulo bwe shina lyakwe. (Amalu. 135:5, 6) Apo akasuba, umweshi, amaplaneti ne ntanda fipita mulya mwine lyonse fipita, apo ifyo isonde lyakwata (ifilenga kwaba umwela, imfula ne fintu fimbi) filakonka amafunde ayafitungulula, apo makanta ne fyuni filafuma ku cifulo cimo fyaya ku cifulo cimbi, ninshi ifi twalandapo e lyo na fimbi ifingi ificitika te kuti filenge ishina lya kwa Lesa libe ilya mushilo nga kuli abalelipontela kabili kuli no kupepa kwa bufi.
Na lyo line, Yehova kuti alenga ifyo abumba fyacita ifyo taficita pa kuti afikilishe ukufwaya kwakwe, kabili ifi kuti fyalanga ukuti ni Lesa wa maka, kabili ilingi line acita ifi pa nshita iyo alefwaya ficitikilepo. Na lintu ifintu fimo pamo nga, icilala, imfula iikalamba iya mwela ne fintu fimbi, tafyali ifyaibela, filya Yehova afibomfeshe pa kufikilisha ukufwaya kwakwe calengele fyaba ifyaibela. (Linganyeniko 1 Isha. 17:1; 18:1, 2, 41-45) Nomba ilingi ilyo ifi fyacitike, fyali ifyaibela pantu fyali ifikalamba sana. (Ukufu. 9:24) Nelyo pantu fyacitike mu nshila iyo abantu bashale-enekela, nelyo tafyabalile aficitikapo, nangu pantu fyacitike pa nshita ilyo abantu bashale-enekela ukuti fyalacitika.—Ukufu. 34:10; 1 Sam. 12:16-18.
Ifyo Munonkelamo mu Kutemwa Ukushipwa Ukwa kwa Yehova
16 Nga twacetekela Yehova ukuti e cubo cesu, tulomfwa ukuti natucingililwa. Na lyo line, inshita shimo kuti tuleumfwa ububi. Bushe Yehova kuti atwafwa shani nga tuleumfwa ububi? (Belengeni Amalumbo 136:23.) Yehova akabika amaboko yakwe mwi samba lyesu no kutwimya pa kuti tuleke ukumfwa ububi. (Amalu. 28:9; 94:18) Ifyo tunonkelamo: Ukwishiba ukutila kuti twashintilila pali Lesa kulatwafwa mu nshila shibili. Inshila ya kubalilapo, tuleshiba ukuti Yehova kuti aba icubo cesu te mulandu no ko twikala. Inshila yalenga bubili, tuleshiba ukuti Shifwe wa ku muulu uwatutemwa alitubikako sana amano.
Ukufwayafwaya Icuma Icaba mu Cebo ca kwa Lesa
it-1-E ibu. 1248
Jah
Ishiwi lya kuti Jah, ilingi line balibomfya pa kulumbanya Lesa mu nyimbo, mu mapepo na mu mapepo ya kupaapaata, kabili ilingi line ili ishiwi lyaba pa mashiwi abantu balebomfya nga balesekelela pa fyo bacimfishe abalwani babo na pa fyo Lesa abapuswishe, nelyo ilyo baletasha Lesa pa kuboko kwakwe ukwa maka na pa fyo aba na maka nga nshi. Kwaliba amalembo ayengi umo babomfya sana ili ishiwi. Amashiwi ya kuti, “Lumbanyeni Jah!” (Aleluya), mashiwi ya kulumbanya Lesa ayaba mu Amalumbo. Ayakubalilapo yaba pa Amalumbo 104:35. Mu malumbo yamo aya amashiwi yaba fye pa ntendekelo. (Amalu. 111; 112) Limo limo yaba mu kati ka malumbo (135:3), inshita shimo yaba fye pa mpela. (Amalu. 104; 105; 115–117) Nomba ilingi line yaba pa ntendekelo na pa mpela. (Amalu. 106; 113; 135; 146–150) Mwi buuku lya Ukusokolola, ifibumbwa fya ku muulu filabwekesha bwekeshapo aya amashiwi ilyo filelumbanya Yehova.—Ukus. 19:1-6.
Ishiwi lya kuti “Jah” lyaliba na mu nyimbo sha kusekelela isho baleimba pa kulumbanya Yehova na mu mapepo ya kumupaapaata. Ili ishiwi emo lyaba mu lwimbo lwa kupususha ulo Mose ashikile. (Ukufu. 15:2) Mu fyo Esaya alembele, alibomfeshe amashina yonse yabili aya kuti “Jah Yehova” pa kuti akomaile pa co alelandapo. (Esa. 12:2; 26:4) Mu mashiwi ya mushikakulo ayo Hisekia alembele pa numa Yehova amundepe mu cipesha amano ilyo ali mupepi no kufwa, alilandile pa fyo aleumfwa mwi pepo apepele kuli Jah. (Esa. 38:9, 11) Ili ishiwi balilibomfya na pa kulanda pa bupusano bwaba pa bantu abafwa, abashingalumbanya Jah, na bantu aba mweo abafwaisha ukulamulumbanya mu mikalile yabo. (Amalu. 115:17, 18; 118:17-19) Na kabili mu malumbo yamo mwaba amapepo ya kutasha pa fyo Jah apuswishe abantu, pa fyo abacingilile na pa fyo abalungike.—Amalu. 94:12; 118:5, 14.
JANUARY 20-26
ICUMA ICABA MU CEBO CA KWA LESA AMALUMBO 138-139
Mwilaleka Umwenso Walenga Mwafilwa Ukulumbanya Yehova Ilyo Muli pa Kulongana
Mulelumbanya Yehova mu Cilonganino
10 Bushe mulakwata mutunta ilyo mushilaimya no kuboko? Nga mulakwata mutunta, te imwe mweka mumfwa ifi. Ukulanda fye icishinka, bonse tulomfwa umwenso ilyo tuleasukapo. Pa kuti mwilatiina ukwasukapo, mulingile ukwishiba ifilenga muletiina. Bushe ico mutiinina ni co mumona ukuti mwalalaba ifyo mulefwaya ukusosa nelyo ni co mumona kwati mwalalanda ifishili fya cine? Bushe ico mufililwa ukwasukapo ni co mumona kwati te kuti mwasuke nge fyo aba bwananyina bambi basuka? Kwena caliba fye bwino ukumfwa ifi, pantu filanga ukuti mwaliicefya kabili mumona ukuti aba bwananyina bambi balimucila. Yehova alitemwa abantu abaicefya. (Amalu. 138:6; Fil. 2:3) Na lyo line, Yehova afwaya ukuti mulemulumbanya kabili mulekoselesha aba bwananyina ilyo mulelongana. (1 Tes. 5:11) Yehova alimutemwa kabili akamwafwa pa kuti mukashipe.
Mulekoseleshanya Ilyo Muli pa Kulongana
7 Cimo icingamwafwa, kupituluka mu fipande fimo ifyafumine mu Ulupungu lwa kwa Kalinda. Ku ca kumwenako, mulepekanya bwino. (Amapi. 21:5) Nga ca kuti mwaishiba bwino ifyo mukaya mu kusambililapo, tamwakaleumfwa umwenso wa kwasukapo. Na kabili, muleasuka ifyasuko ifipi. (Amapi. 15:23; 17:27) Tamwakaleumfwa umwenso nga ca kuti mupekenye ukuya-asuka icasuko icipi. Icasuko icipi umuli amashiwi ayanono kuti ca-angukila aba bwananyina ukumfwa ifyo mulelandapo ukucila icasuko icitali umo mulefwaya ukulanda pa fintu ifingi. Nga mwa-asuka icasuko icipi mu mashiwi yenu, mukalanga ukuti namupekanya bwino kabili namumfwikisha ne fyo mulesambililapo.
Ukufwayafwaya Icuma Icaba mu Cebo ca kwa Lesa
it-1-E ibu. 862 para. 4
Ukwelela
Ukwelela abatulufyanya, te mulandu ne miku batulufyanya, cintu ico Umwina Kristu onse afwile ukulacita. (Luka 17:3, 4; Efes. 4:32; Kol. 3:13) Lesa telela abakaana ukwelela abantu banabo. (Mat. 6:14, 15) Na lyo line, na lintu umuntu “uucita ifyabipa” bamufumya mu cilonganino ca Bena Kristu pa mulandu wa kuti alicita imembu ishikalamba, mu kupita kwa nshita kuti bamwelela nga ca kuti alanga ukuti nalapila icine cine. Nga caba ifi, aba mu cilonganino bonse bafwile ukumulanga ukuti balimutemwa. (1 Kor. 5:13; 2 Kor. 2:6-11) Na lyo line, Abena Kristu tabafwile ukwelela umuntu uucita imembu ishabipisha ku mufulo fye kabili uushilapila. Abacita ifi balaba abalwani ba kwa Lesa.—Heb. 10:26-31; Amalu. 139:21, 22.
JANUARY 27–FEBRUARY 2
ICUMA ICABA MU CEBO CA KWA LESA AMALUMBO 140-143
Mulecita Ifintu Ukulingana ne fyo Mulepepelapo
‘Muleumfwa Ifilelanda Aba Mano’
13 Mulemona ukuti nga bamufunda ninshi Lesa alimutemwa. Yehova afwaya ukuti ifintu filetuwamina. (Amapi. 4:20-22) E ico nga atulungika ukubomfya Icebo Cakwe, ulupapulo ululanda pa fya mu Baibolo nelyo Umwina Kristu umukalamba mu fya kwa Lesa ninshi aletulanga fye ukuti alitutemwa. Baibolo pa AbaHebere 12:9, 10 itila: “Alatufunda pa kuti cituwamine.”
14 Mulebika amano ku fyo bamufunda te nshila bamufundilamo. Inshita shimo kuti twamona kwati inshila bacitufundilamo tayaciwama. Ca cine ukuti uulefunda umuntu afwile ukumufunda mu nshila ya kuti camwangukila ukukonka ifyo balemweba. (Gal. 6:1) Nomba nga ni fwe balefunda tufwile ukubika amano ku fyo batufunda nangu ca kuti tuletontonkanya ukuti tabatufundile bwino. Tufwile ukutontonkanya ukuti: ‘Nangu ca kuti nshacitemwa inshila bacimfundilamo, bushe kuliko fimo ifyo ningasambililako ku fyo bacimfunda? Bushe kuti nasuulako fye ku filubo ifyo uwacilamfunda acicita no kusambilila ku fyo acimfunda?’ Tulingile ukulabika sana amano ku fyo twingasambilila ku fyo bacitufunda.—Amapi. 15:31.
Twalilileni Ukuba ne ‘Mitima Iyasanguluka’ Muli Shino Nshita Ishayafya
Abantu ba kwa Lesa bamo balakwata amafya pa mulandu wa bantu ababakaanya ukupepa, na pa mulandu wa kubulwa indalama, e lyo na pa mulandu wa malwele ayakalamba ayo bakwata. Inshita shimo abantu ba kwa Lesa balaba na masakamika. Nangu fye ni Mfumu Davidi yalikwete amasakamika ya musango yu. Yatile: “Umupashi wandi uuli muli ine wanaka; umutima wandi mu nda watalala.” (Amalu. 143:4) Cinshi calengele iyi mfumu ukushipikisha? Davidi aibukishe ifyo Lesa asakamana ababomfi Bakwe ne fyo na o bamupuswishe. Aletontonkanya pa fyo Yehova acitile pa mulandu we shina Lyakwe ilikalamba. Davidi abikile sana umutima pa fyo Lesa acita. (Amalu. 143:5) Na ifwe bene nga tuletontonkanya pali Kabumba wesu na pali fyonse ifyo atucitila na pa fyo atwalilila ukutucitila, cikatwafwa na lintu tuli mu bwafya.
Bushe Ifunde lya Kuupa Nelyo Ukuupilwa “Muli Shikulu Epela” Licili Lyalicindama?
Inshita shimo kuti mwaumfwa nga filya Davidi uwaimbile amalumbo aumfwile, atile: “Shi angufyanyeni, njasukeni, mwe Yehova. Umupashi wandi wafika ku mpela. Mwifisa icinso cenu kuli ine.” (Amalu. 143:5-7, 10) Pali utu tushita, mufwile ukulolela pali Shinwe wa ku muulu ukuti amulange ifyo afwaya. Ilyo mulelolela pali ena mufwile ukulabelenga Icebo cakwe no kulatontonkanya pa fyo mulebelenga. Mukeshiba amafunde ya kwa Lesa e lyo ne fyo ayafwile abantu bakwe aba ku kale. Nga mulekutika kuli ena, mukalamona ubusuma bwaba mu kumfwila Lesa.
Ukufwayafwaya Icuma Icaba mu Cebo ca kwa Lesa
it-2-E ibu. 1151
Ubusungu
Ifyo Balibomfya mu Mampalanya. Ifya bufi ifyo umuntu uucita ifyabipa alanda pa muntu umbi, ifyonawila uyo muntu ishina, bafipashanya ku busungu bwa nsoka ubwipaya. (Amalu. 58:3, 4) Baibo ilanda pa bantu abalanda ifyabipa ifyonawila umuntu ishina ukuti, “Ubusungu bwe fwafwa bwaba mu milomo yabo” (nelyo, “ku numa ya milomo yabo”), nga filya fine ubusungu bwa nsoka bufuma ku numa ya meno ya iko. (Amalu. 140:3; Rom. 3:13) Umuntu nga alebomfya ululimi lwakwe mu kulanda ifyabipa pa muntu umbi, mu kucita ulwambo, mu kusambilisha ifya bufi, nelyo mu kulanda ifyabipa fimbi, ninshi ulo lulimi “lwaisulamo ubusungu ubwipaya.”—Yako. 3:8.
FEBRUARY 3-9
ICUMA ICABA MU CEBO CA KWA LESA AMALUMBO 144-146
“Ba Nsansa Abantu Abo Yehova E Lesa Wabo!”
Amepusho Ukufuma Ku Babelenga
2. Natulande pa fikomo fimbi ifyaba muli ili lumbo. Ifi mu cikomo 12 muli Baibolo bapitulukamo babomfya ishiwi lya kuti “lyena” ninshi amapaalo ayaba mu fikomo 12 ukufika ku 14 yalanda pa balungama e kutila abalelomba ‘ukubalubula no kubapokolola’ kuli bambi bambi abo icikomo 11 calandapo. Na mu cikomo 15 icilanda pa bantu bamo bene, babomfya ishiwi lya kuti “balipaalwa” imiku ibili ukulosha ku “bantu abo Yehova e Lesa wabo!”
3. Ubu bupilibulo bwalilingana no bulayo bwaba mu fikomo fimbi ifya mu Baibolo ifilanda pa fyo Lesa akapaala abantu bakwe aba cishinka. Ili lumbo lilanda pe subilo ilyo Davidi akwete ilya kuti Lesa nga alubula abena Israele ku balwani babo, ali no kulenga abantu bakwe baba ne nsansa kabili bakwata ifintu ifingi. (Lebi 26:9, 10; Amala. 7:13; Amalu. 128:1-6) Ku ca kumwenako, pa Amalango 28:4 patila: “Bakapaalwa abakafyalwa kuli imwe ne fikafuma mu mushili wenu ne fikafyala ifitekwa fyenu, abana ba ng’ombe shenu na bana ba mpaanga shenu.” Ilyo Solomone umwana wa kwa Davidi aleteka, abena Israele baleikala umutende kabili balikwete ifintu ifingi. Na kuba fimo ifyalecitika ilyo Solomone aleteka fyalelanga ifyo ifintu fikaba ilyo Mesia akalateka.—1 Isha. 4:20, 21; Amalu. 72:1-20.
Muletwalilila Ukuba ne Subilo lya Bwina Kristu Ilyakosa
16 Isubilo lya kwikala umuyayaya bupe ubusuma ubo Lesa atupeela. Tulalolela ifintu ifisuma ifyo atulaya ku ntanshi, ifyo twacetekela ukuti fikacitika. Isubilo lyaba kwati ni nanga, lilalenga tulekwata amaka ya kushipikisha amafya, ukulashipikisha ilyo baletucusha e lyo tatutiina no kufwa. Na kabili isubilo lyaba kwati cisote, lilacingilila ifyo tutontonkanya pa kuti tulekaana ukucita ifyabipa no kulacita ifyalungama. Ili isubilo ilyo Baibolo ilandapo lilalenga twaishiba bwino Lesa kabili lilalenga twaishiba ne fyo atutemwa. Tulapaalwa nga nshi nga twalenga isubilo lyesu ukuba ilyakosa.
17 Muli kalata umutumwa Paulo alembeele abena Roma abakoseleshe ukuti: “Sekeleleni mwi subilo.” (Rom. 12:12) Paulo alesekelela pantu alishibe ukuti nga atwalilila ukuba uwa cishinka, ali no kwikala umuyayaya ku muulu. Na ifwe kuti twasekelela pa mulandu ne subilo twakwata, pantu twalicetekela ukuti Yehova akafikilisha ifyo atulaya. Uwaimbile amalumbo alembele ukuti: “Alipaalwa uo Lesa wa kwa Yakobo e kaafwa wakwe, Uwaba ne subilo muli Yehova Lesa wakwe uwa cishinka umuyayaya.”—Amalu. 146:5,6.
Kutemwa Nshi Kwingalenga Twaba ne Nsansa sha Cine Cine?
19 Icalo ca kwa Satana calilenga abantu bacula pa myaka nalimo 6,000, lelo cili mu kupwa. Mwi sonde mwaba abantu bakaitemwe, abatemwa indalama, kabili abatemwa ukwangala. Batontonkanya fye pa fyo bengakwata kabili babika fye amano kufingabawamina. Abantu ba musango uyu te kuti babe ne nsansa sha cine cine. Lelo uwaimbile amalumbo atile: “Alipaalwa uo Lesa wa kwa Yakobo e kaafwa wakwe, uwaba ne subilo muli Yehova Lesa wakwe.”—Amalu. 146:5.
20 Abantu ba kwa Yehova balamutemenwako kabili cila mwaka abantu abengi balamwishiba no kumutemwa. Ici cilanga ukuti Ubufumu bwa kwa Lesa buleteka kabili nomba line buli no kulenga abantu bakapaalwe nga nshi. Kuti twaba ne nsansa isha cine cine nga tulecita ifyo Lesa afwaya, no kwishiba ukuti tulecita ifilenga Uwapulamo alesekelela. Na kabili abatemwa Yehova bakaba ne nsansa umuyayaya! Mu cipande cikonkelepo, tukasambilila pa mibele imo iyabipa iyo abantu bakwata pa mulandu wa bukaitemwe, kabili tukasambilila ifyo iyi mibele yapusana ne mibele iisuma iyo ababomfi ba kwa Yehova bakwata.
Ukufwayafwaya Icuma Icaba mu Cebo ca kwa Lesa
it-1-E ibu 111 para. 9
Inama
Baibo yalandile ukuti abantu bafwile ukuba no mulinganya e lyo no luse ku nama. Yehova alanda ukuti eupela ifya mweo fyonse ifyo fikabila. (Amapi. 12:10; Amalu. 145:15, 16) Amafunde ya kwa Mose yaebele abantu ukulasunga bwino ifitekwa. Ifunde lyalandile ukuti inama nga nailuba uwaisanga alingile ukuicingilila no kuibweseshamo ku mwine; nga ili ne cipe icafina alingile ukuikakula. (Ukufu. 23:4, 5) Kabili balingile ukulasunga bwino inama lintu shilebomba imilimo. (Amala. 22:10; 25:4) Nga filya fine cali ku bantu, inama nasho shalingile ukutuusha pa bushiku bwe Sabata. (Ukufu. 20:10; 23:12; Amala. 5:14) Inama ishingaleta ubusanso balingile ukushisunga bwino nelyo ukushipaya. (Ukute. 9:5; Ukufu. 21:28, 29) Na kabili tabalingile ukuleka ifitekwa ifya misango ibili ukulatamfyanya.—Lebi 19:19.
FEBRUARY 10-16
ICUMA ICABA MU CEBO CA KWA LESA AMALUMBO 147-150
Twalikwata Ifintu Ifingi Ifya Kulumbanishishapo Jah
Mulandu nshi Tulingile ‘Ukulalumbanishisha Yehova?’
5 Yehova tasansamwishe fye abena Israele nge bumba lelo alisansamwishe na umuntu umo umo. Na pali lelo e fyo acita. Uwaimbile amalumbo alembele pali Lesa ati: “Ondapa aba nkumbabulili, no kubakakila pa filonda fyabo.” (Amalu. 147:3) Cine cine Yehova alasakamana bonse abakwata amafya. Muno nshiku Yehova alafwaisha ukutusansamusha ilyo tuli na mafya. (Amalu. 34:18; Esa. 57:15) Alatupeela amano na maka pa kuti tuleshipikisha amafya ayo tukwata.—Yako. 1:5.
6 Lyena uwaimbile amalumbo atendeke ukulanda pa fya mu muulu kabili alandile ati Yehova ‘alapenda intanda; shonse fye alashiita na mashina ya shiko.’ (Amalu. 147:4) Mulandu nshi alekele ukulanda pa fyo alelandapo no kutendeka ukulanda pa fya mu muulu? Tontonkanyeni pali ifi: Uwaimbile amalumbo alemona intanda lelo taishibe impendwa ya shiko. Pa myaka iingi iyapitapo, intanda shalifulilako. Abantu bamo batontonkanya ukuti mu cipinda bushiku cimo mwaba amabilioni ya ntanda. Na kabili mu muulu nalimo mwaba ifipinda bushiku ifingi nga nshi! Ukupenda intanda kwandwa. Lelo Kabumba ena alinika cila lutanda ishina. Ici cipilibula ukuti Yehova amona ukuti cila lutanda lwaliibela. (1 Kor. 15:41) Inga bantu aba pano isonde? Nga filya fine Lesa eshiba apo cila lutanda luli pa nshita imo, e fyo eshiba na apo muli, ifyo muleumfwa ne fyo mulekabila pali iyo nshita!
Mulandu nshi Tulingile ‘Ukulalumbanishisha Yehova?’
7Yehova tabika fye amano ku muntu umo umo lelo alikwata na maka kabili alacitapo cimo ku kutwafwa ilyo tuli na mafya. (Belengeni Amalumbo 147:5.) Inshita shimo kuti mwalamona ukuti ubwafya mukwete bukalamba kabili te kuti mushipikishe. Lesa aleshiba amafya ayo mushingashipikisha pantu ‘alebukisha ukuti muli lukungu.’ (Amalu. 103:14) Apo tatwapwililika, tulacita ifilubo fimo fine imiku iingi. Tulomfwa ububi nga twaipununa mu kulanda, nga twacita ifyatwafya ukuleka, nelyo nga tuli no lunkumbwa lwa kufwaya ukukwata ifyo bambi bakwata! Yehova tacita ifi twalandapo lelo alishiba bwino ifyo tumfwa!—Esa. 40:28.
w17.07 ibu. 21 para 18
Mulandu nshi Tulingile ‘Ukulalumbanishisha Yehova?’
18 Uwaimbile amalumbo alishibe ifyo Lesa atemenwe abantu bakwe aba ku kale. Bali e luko fye lweka ulo Lesa apeele “icebo cakwe” ne “fipope fyakwe no bupingushi bwakwe.” (Belengeni Amalumbo 147:19, 20.) Muno nshiku Lesa alitupaala pantu ni fwe fye ainika ishina lyakwe. Tuli fibusa fyakwe pantu twalimwishiba kabili tulakonka ifyo Icebo cakwe cilanda. Nga filya fine fyacitile uwaimbile Amalumbo 147, ukwabula no kutwishika kwaliba ifingi ifingalenga mwalasosa amuti, “Lumbanyeni Jah!” no kulakoselesha bambi ukulamulumbanya!
Ukufwayafwaya Icuma Icaba mu Cebo ca kwa Lesa
it-1-E ibu. 316
Ifyuni
Kemba wa malumbo aebele “ifyuni” ukuti filumbanye Yehova. (Amalu. 148:1, 10) Inshila imo iyo ifyuni filumbanishishamo Yehova ni fintu fyapangwa mu musango uwa kupapa. Icuni cimo kuti cakwata amasako ukutendekela pali 1,000 ukufika kuli 20,000 no kucilapo. Kabili isako limo lyalikwata ako beta ukuti shaft umufuma tumbi utwingi utupanga isako uto beta ukuti barbs kabili muli utu mulafuma utumasako na tumbi utwa mu kati utwingi nga nshi, kabili na to twine tulafumya utumasako tumbi utunono sana pa kuti isako lipangike. Isako lya nkunda limo ilyalepa fye amainci ayali 6 elyo balanda ukuti lyakwata nalimo utumasako utunono uto beta ukuti utuma barbules utwingi nga nshi kabili nato twalikwata utumasako tumbi uto beta ukuti utuma barbicels ukufika kuma milion ayengi. Inshila amapindo ya fyuni e lyo no mubili wa fiko fyapangilwamo yalicila pa fyo amapindo ya ndeke sha muno nshiku yapangwa na pa fyo yabomba. Na kabili ifyo amafupa ya fyuni yapangwa filalenga filafina sana, e calenga ukuti amafupa ya cuni beta ukuti frigate icilepa amamita yabili nga cilepupuka cilefina fye amagramu 110. Amafupa yamo ayakulu aya fyuni fimo ifipampaila yalakwata utumafupa na tumbi ututungilila amapindo nga filya fine na mapindo ya ndeke bayapanga.
FEBRUARY 17-23
ICUMA ICABA MU CEBO CA KWA LESA AMAPINDA 1
Mwe Misepela—Nani Mulingile Ukulaumfwila?
Mwilaleka Icintu Nangu Cimo Cikalenge Mukafilwe Ukupokelela Icilambu
16 Finshi wingacita nga ca kuti uli wacaice kabili umfwa kwati abafyashi bobe balikosha amafunde kabili tabaishiba ifyo umfwa? Nga ulekalipa kuti walatwishika nga ca kuti mu kubombela Yehova mwaliba ubusuma. Nga waleka ukubombela Yehova, ukaimwena ukuti takuli nangu umo uwa kubikako amano ukucila pa fyo abafyashi bobe abatemwa Lesa ne fyo aba mu cilonganino bakubikako amano.
17 Abafyashi bobe nga tabalekulungika, bushe kuti watila balikutemwa? (Heb. 12:8) Nalimo ico ushatemwa ni nshila abafyashi bobe bakusalapwilamo. Mu cifulo ca kulakalipa pa nshila abafyashi bobe bakusalapwilamo, uleishiba ukuti kwaliba ifilenga balekusalapwila muli iyo nshila. Kanshi uletekanya kabili wilafulwa bwangu nga bakukalipila. Icebo ca kwa Lesa citila: “Onse uulama ululimi lwakwe alicenjela, no wiluka aba no mutima uwatekanya.” (Amapi. 17:27) Uleesha na maka yonse ukukanafulwa ilyo balekufunda, kabili ulekonka ifyo bakufunda ukucila ukusakamana sana pa nshila bakufundilamo. (Amapi. 1:8) Nga walikwata abafyashi abatemwa Yehova ninshi walipaalwa. Bakakwafwa pa kuti ukapokelele icilambu ca mweo wa muyayaya.
w05 2/15 19-ibu. 20 amapara. 11-12
Ukubakilila Ubukristu Bwesu
11 Fwayeni ukutemuna Lesa, te kutemuna bantu iyo. Kwena ca cifyalilwa fye ukufwaya ukuikuminisha kwi bumba limo ilya bantu. Bonse tulakabila ifibusa, kabili ilyo twapokelelwa kuli bambi tulomfwa bwino sana. Mu nshita ya bwaice e lyo na mu bukalamba mwine, abanensu kuti batutitikisha sana, ukutulenga ukufwaya ukubapashanya atemwa ukubatemuna. Lelo ifibusa fyesu te lyonse fifwaya ukuti ifintu fituwamine. Limo limo bafwaya fye ukuba na bamo ilyo balecita icalubana. (Amapinda 1:11-19) Umwina Kristu nga anakilako ku fibusa fyalubana, ninshi alefisa ubuKristu bwakwe. (Amalumbo 26:4) Umutumwa Paulo asokele ukuti: ‘Mwilapashanya imisango ya ba pano nse.’ (Abena Roma 12:2, Diocese of Mbala Bible) Yehova alatupeela ubukose ubo tukabila pa kulwisha amatunko ya banensu aya kuti tube nga bene.—AbaHebere 13:6.
12 Ilyo abantu bambi batupatikisha ukucita icalubana, tufwile ukwibukisho kuti bucishinka bwesu kuli Lesa bwalicilapo kucindama pa fyo icinabwingi baletontonkanya. Pa Ukufuma 23:2 paba icishinte icisuma icitucingilila. Patila: “Wilakonka cinabwingi ku fibi.” Ilyo icinabwingi ca bena Israele banankwe batwishike amaka ya kwa Yehova aya kufikilisha amalayo Yakwe, Kalebu mu kushangila akeene ukukonke cinabwingi. Alishininkishe ukuti amalayo ya kwa Lesa kuti yacetekelwa, kabili alipaalilwe apakalamba pa kushangila kwakwe. (Impendwa 13:30; Yoshua 14:6-11) Bushe na imwe ukupala Kalebu muli abaitemenwa ukukaana ifilefwaya icinabwingi pa kubakilila bucibusa bwenu na Lesa?
Ukufwayafwaya Icuma Icaba mu Cebo ca kwa Lesa
it-1-E ibu. 846
Umuwelewele
Mu Baibo nga balanda pa “muwelewele” ninshi tabalelanda pa muntu uushitontonkanya bwino, lelo ninshi balelanda pa muntu uushikonka nelyo uusuula amafunde ya kwa Lesa ayalungama. Amashiwi ayengi aya ciHebere yalanda pa muntu wa musango uyu kuti ni kesilʹ (‘uwatumpa nelyo umuwelewele’; Amapi. 1:22), ʼewilʹ (“umuwelewele”; Amapi. 12:15), na·valʹ (“umuwelewele”; Amapi. 17:7), na lets (“cintomfwa”; Amapi. 13:1). Ishiwi lya ciGriki ilya kuti aʹphron lilosha ku muntu “umuwelewele” (Luka 12:20), ishiwi a·noʹe·tos lilosha ku muntu “impelwa mano” (Gal. 3:1), lyena ilya kuti mo·rosʹ nalyo lilosha ku “muwelewele” (Mat. 23:17; 25:2).
FEBRUARY 24–MARCH 2
ICUMA ICABA MU CEBO CA KWA LESA AMAPINDA 2
Mulandu Nshi Mulingile Ukubikila Amano ku Kuisambilisha?
Twalilileni Ukwenda mu Cine
16 Bamo tatwatemwa ukubelenga no kuisambilisha. Lelo Yehova atweba ukuti ‘tulefwayafwaya’ icine, pa kuti tucishibe bwino. (Belengeni Amapinda 2:4-6.) Nga tuleibikilishako ukufwayafwaya icine, tulanonkelamo. Ba Corey batile nga balebelenga Baibolo balabika sana amano ku cikomo cimo na cimo. Batile: “Ndabelenga amafutunoti yonse, Amalembo yonse ayo balosesheko, e lyo kabili ndafwailapo ifyebo na fimbi. . . . Nga ndecita ifi pa kubelenga, ndasambilila ifingi.” Nampo nga tuisambilisha nga ifi ba Corey baisambilisha, nelyo twalikwata inshila imbi iyo tuisambilishishamo, icacindama ca kuti tulingile ukusangako inshita iya kuisambilisha Baibolo. Pantu nga tulecita ifi ninshi tulelanga ukuti tulatasha pa cine.—Amalu. 1:1-3.
Amano ya Cine Yalabilikisha
3 Kuti twatila amano, maka twakwata aya kubomfya ifyo twaishiba ilyo tulepingula pa fintu. Lelo amano ya cine cine yena yalicila pali ifi twalanda. Baibolo itila: “Akatiina ka kuli Yehova e kutendeka kwa mano, no kwishiba Uwa Mushilo Nga Nshi e mucetekanya.” (Amapi. 9:10) Kanshi nga tulefwaya ukupingulapo ifya kucita, intanshi tufwile “ukwishiba uwa Mushilo” e kutila ukwishiba ifyo Yehova atontonkanya. Kuti twacita ifi nga tulebelenga mu Baibolo nelyo mu mpapulo shilanda pali Baibolo. Nga tulecita ifi, ninshi tulelanga ukuti twaliba na mano ya cine cine.—Amapi. 2:5-7.
4 Yehova fye e wingatupeela amano ya cine cine. (Rom. 16:27) Mulandu nshi twingalandila ukuti amano ya cine cine yafuma fye kuli Lesa? Ica kubalilapo, Yehova ni Kabumba kabili alishiba fyonse pa fyo abumba. (Amalu. 104:24) Icalenga bubili, fyonse ifyo Yehova acita filanga fye ukuti wa mano. (Rom. 11:33) Icalenga butatu, ifyo Yehova atupanda amano, lyonse filawamina bonse abafikonka. (Amapi. 2:10-12) Kanshi nga tulefwaya ukuba na mano ya cine cine, tufwile ukulaibukisha ifi ifishinka fitatu ifyo twalandapo, ilyo tulepingulapo ifya kucita.
Mwe Bacaice, Kuti Mwakosha Shani Icitetekelo Cenu?
2 Nga ca kuti uli wacaice kabili e lyo ulesambilila pali Yehova nelyo nga uli mubomfi wakwe, bushe umona ukuti na iwe ulingile ukusumina ukuti ifintu fyasangwike fye? Ifi nga e fyo umona, kwaliba ifyo wingacita pa kuti icitetekelo cobe cibe icakosa. Cimo ico wingacita kubomfya amaka ya kulingulula ayo Lesa akupeela ku ‘kukucingilila.’ Ukulingulula ku kakucingilila ku fyo abantu basambilisha ifingonaula icitetekelo cobe.—Belengeni Amapinda 2:10-12.
3 Kuti waba fye ne citetekelo cakosa nga waishiba bwino bwino Lesa. (1 Tim. 2:4) Kanshi ilyo ulebelenga Icebo ca kwa Lesa ne mpapulo shesu, taulingile ukulabelenga lubilo lubilo. Ulelingulula pa kuti ‘uleiluka’ ifyo ulebelenga. (Mat. 13:23) Natulande pa fyo ukulingulula kwingakwafwa ukutetekela sana ukuti Lesa ni Kabumba no kucetekela ifyaba mu Baibolo.—Heb. 11:1.
Ukufwayafwaya Icuma Icaba mu Cebo ca kwa Lesa
it-1-E ibu 1211 para. 4
Ukuba uwa Kaele
Pa kuti umuntu abe uwa kaele, talingile ukushintilila pa mano nelyo amaka yakwe, lelo afwile ukuba ne citetekelo icakosa no kucetekela sana amaka ya kwa Yehova. (Amalu. 25:21) Lesa alilaya ukuti ni “nkwela” kabili ‘alacingilila’ inshila umwenda aba kaele. (Amapi. 2:6-8; 10:29; Amalu. 41:12) Ifyo babombesha pa kuti Yehova abatemwe filalenga baletwalilila ukulaenda mu nshila ya balungama. (Amalu. 26:1-3; Amapi. 11:5; 28:18) Nangu ca kuti Yobo alisakamikwe ukuti ali no kucula nelyo ukufwila pamo na bantu ababipa, Yehova alilanda ukuti alishiba kabili alamona fyonse ifyo aba kaele bacita kabili alilaya ukuti abantu ba musango uyu ubupyani bwabo bukatwalilila, bakekala umutende ku ntanshi kabili bakapyana ifisuma. (Yobo 9:20-22; Amalu. 37:18, 19, 37; 84:11; Amapi. 28:10) Nga filya cali kuli Yobo, icilenga umuntu ukuba uwa kaele te kukwata ifyuma, pantu ifyuma te kuti filenge umuntu ukucindikwa. (Amapi. 19:1; 28:6) Abana abakwata abafyashi aba kaele balaba ne nsansa (Amapi. 20:7), pantu balakwata ifintu ifisuma pa mulandu ne fyo abafyashi babo balecita kabili balakwata ne shina ilisuma no mucinshi uo abafyashi babo banonka.