Yesu “Alisambilile Icumfwila”

Lyonse Yesu alomfwila Yehova. (Yoh. 8:29) Nomba cinshi Baibo ilandila ukuti: “Alisambilile icumfwila ku fintu aculileko”?—Heb. 5:8.

Ilyo Yesu ali pano isonde, ifyamucitikile tafyatalile afimucitikilapo ilyo ali ku muulu. Ku ca kumwenako, abafyashi bakwe abamukushishe balitemenwe Yehova, nomba tabali abapwililika. (Luka 2:51) Bashimapepo na balashi ba buteko balemucusha, lelo aleshipikisha. (Mat. 26:59; Marko 15:15) Na kabili alifwile imfwa iibi sana. Baibo itila: “Ali-icefeshe kabili aishileba ne cumfwila ukufika na ku mfwa.”—Fil. 2:8.

Ifi twalandapo, fyalengele Yesu asambilile ukuba ne cumfwila ico ashasambilile ilyo ali ku muulu. E ico aishileba Imfumu iyapwililika kabili Shimapepo Mukalamba, uwingatulangulukilako. (Heb. 4:15; 5:9) Filya Yesu asambilile icumfwila ku fintu aculileko, fyalengele Yehova amutemwe sana kabili amupeele imilimo na imbi. Na ifwe bene Yehova kuti atutemwa sana kabili kuti atupeelelapo imilimo na imbi nga ca kuti twatwalilila ukuba ne cumfwila na lintu ifintu fikosele.—Yako. 1:4.