Ilyo Mulebelenga Baibo Mule-elenganya Ifyo Mulebelengapo

Mu Baibo mwaliba amalyashi ayalanda pa fyacitike kale ayo twingasambililako amasambililo ayacindama. Nga tule-elenganya ilyo tulebelenga aya malyashi kuti twaumfwikisha ifyo tulebelenga kabili kuti twasambililako ifingi. Natulandeko pa fyo mwingacita pa kuti mule-elenganya ilyo mulebelenga amalyashi ya mu Baibo.

• Muleikatishako ishiwi ilyo mulebelenga. Nga muleikatishako ishiwi ilyo mulebelenga Baibo kuti mwalaelenganya bwino ifyalecitika. Nga mulebelenga Baibo pamo no lupwa lwenu kuti mwalenga ifyo mulebelenga fyalaumfwika kwati e ko mwali ilyo fyalecitika nga ca kuti bonse mu lupwa mwa-akana ifya kubelenga ukulingana na bo ilyashi lilelandapo.

• Mule-elenganya ifyalecitika. Mule-esha ukwishiba ifyo abo mulebelengapo baletontonkanya ne fyo baleumfwa. Ku ca kumwenako kuti mwayipusha amuti: ‘Cinshi uyu muntu alandiile nelyo acitiile ifi? Nga ca kuti nine ifi fyalecitikila, bushe nga natontonkenye finshi nelyo nga naumfwile shani?’

• Mulelenga ifyo mulebelengapo. Nga mulelenga ifyo mulebelengapo kuti calenga mwalaelenganya bwino no kwibukisha bwino ilyashi nangu ca kuti tamwaishiba ukulenga.