MARCH 30–APRIL 5, 2026
ULWIMBO 76 Bushe Mumfwa Shani?
Mulelanda Amashiwi Ayasuma Ilyo Mulesambilisha Abantu Icine
“ Yehova Lesa wa cishinka.”—AMALU. 31:5.
IFYO TWALASAMBILILAPO
Twalasambilila pa fyo tulingile ukucita pa kuti tulelanda icine, na pa fyo tufwile ukucita pa kuti tulesambilisha abantu icine ca mu Baibo pa kuti cingabafwa.
1. Finshi tufwile ukulacita pa kuti twingaba mu lupwa lwa kwa Yehova?
NGA TWAMONANA no wa bwananyina pa muku wa kubalilapo, ilingi line tumwipusha atuti, “Bushe mwasambilile shani icine?” Bamo pa kwasuka batila bafyashi babo babasambilishe icine. Bambi kuti batila tapalakokola ukutula apo basambilile icine. Ico twasukila ifi, ni co tulakonka ifyo tusambilila mu Cebo ca kwa Lesa mu mikalile yesu. Mulandu nshi? Pantu twalishiba ukutila kuti twaba fye mu lupwa lwa kwa Lesa nga tulecita ifilanga ukuti twalitemwa icine, kabili nga tulekonka ifyo tusambilila. Inshila imo iyo tucitilamo ifi twalandapo, kuba aba cishinka mu fyo tulanda na mu fyo tucita.—Amalu. 15:1-3.
2. (a) Bushe Yesu abantu bamwishibe shani? (b) Bushe abantu baali no kulacita shani nga baumfwa icine ico Yesu alesambilisha?
2 Lyonse Yesu alelanda icine. Na balwani bakwe balishibe ukuti lyonse alelanda icine nangu ca kuti ifyo alelanda tabalefitemwa. (Mat. 22:16) Yesu alyebele abasambi bakwe ifyo abantu bali no kulacita nga baumfwa icine ico alesambilisha. Abebele ati: “Naisa mu kulekanya umwana umwaume na wishi, umwana mwanakashi na nyina, no mwanakashi uwaupwa na nyinafyala.” (Mat. 10:35) Yesu talefwaya ukuti abantu balecita ifi nga baumfwa icine, lelo alishibe ukuti ifi fine e fyo bali no kulacita. (Mat. 23:37) Alishibe ukuti icine ico alesambilisha cali no kulenga abantu balekana. Bamo bali no kutemwa icine, e lyo bambi bena tabali no kucitemwa.—2 Tes. 2:9-11.
3. Finshi twalasambililapo muli cino cipande?
3 Nga filya fine Yesu alecita, na ifwe bene tulesha na maka yesu yonse pa kuti tuleba aba cishinka, kabili tulelanda icine inshita yonse nangu ca kuti abantu te kuti batutemwe. Na kabili, tulabila imbila nsuma kabili tulasambilisha abantu icine ca mu Baibo. Bamo balakalipa nga twalanda icine. Bushe ici cilolele mu kuti tatulingile ukubika amano ku fyo tulanda icine ca mu Baibo na lintu tulingile ukucilanda? Awe! Muli cino cipande twalabalilapo ukwasuka icipusho icacindama ica kuti: Ni kwi twingasambilila icine? Lyena twala-asuka aya amepusho: Mulandu nshi tulingile ukulalandila icine? Ni nshila nshi tufwile ukulalandilamo icine? Ni lilali tufwile ukulalanda icine? Ifyo twala-asuka aya amepusho fyalelanga twishibe ifyo twingalasambilisha bwino abantu icine, ifya kulanda nabo ukwabula ukubakalifya ne fyo twingeshiba inshita iyo tulingile ukubasambilishishapo icine.
NI KWI TWINGASAMBILILA ICINE?
4. Cinshi twingalandila ukuti Yehova e Ntulo ya cine?
4 Yehova e Ntulo ya cine, kabili fyonse ifyo alanda fya cine. Ku ca kumwenako, alalungika nga alanda ukuti ici cisuma e lyo ici cibi. (Amalu. 19:9; 119:142, 151) Fyonse ifyo asobela filacitika. (Esa. 55:10, 11) Fyonse ifyo alaya alafikilisha. (Impe. 23:19) Na kuba, Yehova te kuti abepe! (Heb. 6:18) E co Baibo ilandila ukuti Yehova ni “Lesa wa cishinka.”—Amalu. 31:5.
5. Mulandu nshi twingalandila ukuti te kuti tufilwe ukwishiba “Lesa wa cishinka”? (Imilimo 17:27)
5 Nangu ca kuti abantu bamo batila calikosa ukwishiba Yehova “Lesa wa cishinka,” kuti twamwishiba. Kwaliba ifintu ifingi ifilanga ukuti e ko aba. (Rom. 1:20) Ilyo umutumwa Paulo alelanda na baGriki abali abasambilila sana mu musumba wa Atena, abebele ukuti Lesa afwaya twamwishiba no kuti “taba ukutali na ifwe umo umo.” (Belengeni Imilimo 17:27.) Na kuba, Yehova alalenga abantu abaicefya abafwaya ukwishiba icine pali ena baba ifibusa fyakwe.—Yoh. 6:44.
6. Finshi fimo ifyo Baibo ilandapo, kabili mulandu nshi tutashisha pa cine ca mu Baibo ico twaishiba?
6 Cimo ico twingacita pa kuti twishibe Yehova, kusambilila Baibo. Umupashi wa mushilo uwa kwa Lesa, e waletungulula abaume abalembele Baibo. (2 Pet. 1:20, 21) Kanshi fyonse ifyaba mu Baibo fya cine kabili tulingile ukuficetekela. Ku ca kumwenako, kuti twacetekela ifyo yalanda pa fyo ifintu fya mu muulu ne fya pano isonde fyaishilebako. (Ukute. 1:1, 26) Kuti twacetekela ifyo yalanda pa calenga fwe bantu tulebembuka, tulecula kabili tulefwa. (Rom. 5:12; 6:23) Kuti twacetekela ifyo Baibo yalanda ukuti Yehova ali no kubomfya Umwana wakwe pa kufumya fyonse ifyabipa pano isonde ifyo Satana “wishi wa bufi” aletapo. (Yoh. 8:44; Rom. 16:20) Na kabili kuti twacetekela ifyo Baibo ilanda ukuti Yesu ali no konaula abacita ifyabipa, akabuusha abafwa, akalenga isonde likabe Paradaise kabili akatwafwa pa kuti tukabe abapwililika. (Yoh. 11:25, 26; 1 Yoh. 3:8) Ala twalishuka pali ifi Yehova atusambilisha icine, na pa kutupeela umulimo wa kusambilisha abantu ici icine!—Mat. 28:19, 20.
ICO TULANDILA ICINE
7-8. Bushe Yehova alabika amano ku cilenga tulelanda icine? Landeniko pa ca kumwenako. (Marko 3:11, 12) (Moneni ne cikope.)
7 Nga fintu tulandile kale, pa kuti tube mu lupwa lwa kwa Yehova tufwile ukulalanda icishinka. Nomba pa kuti tulesekesha Yehova, tatulingile ukupelela fye pa kulalanda icishinka. Yehova alabika sana amano ku cilenga tulelanda icishinka. Natulandeko pali cimo icacitike ilyo Yesu alebila imbila nsuma pano isonde. (Belengeni Marko 3:11, 12.) Bushiku bumo ilyo Yesu alebila imbila nsuma mupepi na Bemba ya Galili, abantu abengi baile uko ali. Pali aba bantu pali na bali ne fibanda abailefukama pa ntanshi yakwe e lyo balabilikisha abati: “Uli Mwana wa kwa Lesa.” Cinshi ifibanda ifyali muli aba bantu fyalandiile icishinka pali Yesu? Nalimo ni co fyalefwaya abantu baficetekele, e lyo nga baficetekela baleke ukubombela Yehova. Kwena ifyo ifibanda fyalandile pali Yesu fyali fya cine. Nomba icalengele filande icine, e cabipile. Yesu alishibe icalengele filande filya pali ena kabili tatemenwe. Na kuba, alyebele ifibanda ukuti fileke ukulanda pali ena.
8 Finshi twingasambilila kuli ili lyashi? Yehova alibika sana amano ku cilenga tulelanda icine. Kanshi tulingile ukulasambilisha abantu icine pali Yehova pa mulandu wa kuti twalimutemwa, kabili nga ca kuti abantu batutasha pa mbila nsuma iyo tubila, tulingile ukuleka balalumbanya Yehova.—Mat. 5:16; Imil. 14:12-15.
9. Finshi tushilingile ukulacita, kabili mulandu nshi?
9 Natulandeko pa ca kumwenako na cimbi icilelanga ukuti tatulingile ukulafwaya abantu baletulumbanya. Tutile munyinefwe umo uwakwata imilimo iikalamba mu cilonganino atwebako ilyashi limo ilya nkaama, e lyo ifwe twayashimikilako bambi. Nga ca kuti abo twashimikilako baishiba ukuti ilyashi ilyo twabashimikileko lya cine, kuti balatontonkanya ukuti aba bwananyina abakwata imilimo iikalamba balatwebako ifingi ifya nkaama. Kwena ici kuti calenga balatumona ukuti twalicindama sana. Nomba ifi te fyo Lesa ena engalatumona. (Amapi. 11:13) Cinshi twalandila ifi? Pantu nangu ca kuti ifyo twalandile fya cine, tatwakwete insambu sha kufilanda, kabili ne co twafilandile ni co twalefwaya abantu baletumona ukuti tuleshiba ifingi ifya nkaama.
IFYO TULINGILE UKULALANDA ICINE
10. Bushe amashiwi ya kuti “amashiwi yenu yaleba ayasuma,” yalola mwi? (Abena Kolose 4:6)
10 Belengeni Abena Kolose 4:6. Umutumwa Paulo aibukisheko Abena Kristu abaleikala mu Kolose ukuti balingile ukulalanda amashiwi ayasuma. Ni mwi Paulo aloseshe? Ishiwi lya ciGriki ilyo Paulo abomfeshe pali ici cikomo, lipilibula ukuti amashiwi ayo tulanda yafwile ukukoselesha abaleumfwa, yalingile ukuba ayasuma kabili tayafwile ukukalifya abantu.
11-12. Mulandu nshi tulingile ukubela abacenjela ilyo tulesambilisha abantu icine? Langilileni. (Moneni ne fikope.)
11 Tulingile ukulalanda amashiwi ayasuma ilyo tulesambilisha abantu icine ca mu Baibo nga fintu Paulo afundile abena Kolose. Baibo ilinganya icine icabamo ku lupanga ulwatwa ululekanya ifyo twaba ne fyaba mu mitima yesu. Mu nshila imbi kuti twatila icine kuti calenga twaishiba ifyo tumfwa e lyo ne filenga tulecita ifintu fimo. (Heb. 4:12) Nomba nga tatulebomfya bwino Baibo, kuti twakalifya abantu kabili kuti twalakansana nabo napashilingile. Bushe ica musango uyu kuti cacitika shani?
12 Tutile ilyo mulebila imbila nsuma mwasanga umuntu uupepa ifimpashanya, kabili ena no lupwa lwakwe balasefya Krisimasi na Isita. Kuti twabomfya Baibo pa kumulondolwela ukuti Lesa tafwaya tulepepa ifimpashanya, no kuti Baibo yalikaanya ukusefya Krisimasi na Isita. (Esa. 44:14-20; 2 Kor. 6:14-17) Kwena nga twaeba umuntu ifi pa muku wa kubalilapo twalanshanya nankwe, ninshi twamweba ifyo Baibo ilanda, nomba ninshi tatubomfeshe bwino Icebo ca kwa Lesa.
13. Kuti twacita shani pa kuti tulelanda amashiwi ayasuma?
13 Na kabili Paulo alandile ukuti amashiwi ayo tulanda yafwile ukuba ayasuma nga filya fine ifya kulya ifyo balungilemo bwino umucele fiwama. Paulo talepilibula ukuti tulingile ukulafisa abantu icine nelyo ukulasambilisha abantu icine mu nshila ya kuti bafilwa ukwishiba ukuti ico tulebasambilisha e cine. Lelo aletukoselesha ukuti tulingile ukulalanda amashiwi ayasuma pa kuti tulekoselesha abantu ilyo tulebila imbila nsuma kuli bena. (Yobo 12:11) Kwena calikosa ukusambilisha abantu icine muli iyi nshila. Mulandu nshi cakosela? Nga filya fine caba ku fya kulya, ilingi line tutontonkanya ukuti apo ine nimfitemwa, na bambi nabo balafitemwa. Ifi fine e fyo caba na ku fyo tulanda. Kuti twalatontonkanya ukuti bonse kuti batemwa inshila tulandilamo. Nomba ifi te fyo caba. Ku ca kumwenako, abantu bamo uko bakulila, tabapita mu mbali pa kulanda na lintu balelanda na bakalamba. Lelo abantu bambi bena kuti bamona imilandile ya musango uyu ukuti tayawama kabili kuti yabakalifya no kubakalifya. Paulo alandile ukuti tufwile ukwishiba “ifya kwasuka bwino umuntu onse.” Ici cilepilibula ukuti tatufwile ukulanda fye ifyo tutemenwe nelyo ukulalanda fye ukulingana ne fyo tulanda uko twakulila, lelo tulingile ukulalanda ifyo abalekutika bengatemwa.
NI LILALI TULINGILE UKULANDA ICINE?
14. Bushe ilyo Yesu ali pano isonde alesambilisha abasambi bakwe fyonse ifyo aishibe? Londololeni.
14 Lyonse Yesu ale-eba abasambi bakwe amashiwi ayasuma kabili ali ne cikuuku kuli bena ilyo alebasambilisha ifintu ifingi. (Marko 6:34) Lelo kwali ifintu ifingi ifyo balingile ukusambilila. Nomba talebasambilisha fyonse fye ifyo aishibe. Alebalangulukilako pantu alishibe ukuti tabali no kufishiba fyonse pa muku umo. Alishibe ukuti ilya tayali ni nshita iisuma iya kubasambilisha ifintu fimo. Na kuba alandile ukuti tabali no kufyumfwa pali ilya nshita. (Yoh. 16:12) Finshi twingasambililako kuli filya Yesu alecita?
15. Bushe tufwile ukulasambilisha abasambi ba Baibo fyonse ifyo twaishiba pa muku umo? Londololeni. (Amapinda 25:11) (Moneni ne cikope.)
15 Kuli Yesu tulesambililako ukuti tatulingile ukusambilisha umuntu fyonse ifyo twaishiba pa muku umo pa mulandu fye wa kuti twalishiba icine. Kuti twapashanya shani Yesu? Tufwile ukulalangulukilako abantu. Natulande na kabili pali ulya umuntu uwatemwa ukusefya Krisimasi na Isita pamo no lupwa lwakwe. Twalishiba ukuti uku kusefya kwafuma mu mipepele ya bufi, kabili Lesa alikupata. Nomba tutile mwatendeka ukusambilisha umuntu Baibo ninshi kwashala umulungu umo nelyo ibili ukuti kube Krisimasi. Bushe kuti twatila tulelanda amashiwi ayasuma nga ca kuti twamulanga ifyo Baibo ilanda pa kusefya amaholide ayafuma mu mipepele ya bufi no kwenekela ukuti alaleka ukusefya Krisimasi ilyo line? Kwena abasambilila Baibo bamo, balangufyanya ukucita ifyo balesambilila. Nomba bambi bena palapita inshita pa kuti baaluke mu fyo batontonkanya na mu fyo bacita. Kuti twa-afwa abasambi ba Baibo ica kuti balunduluka no kulunduluka nga ca kuti tulebasambilisha icine pa nshita iyalinga, e kutila pa nshita bengomfwa ico icine.—Belengeni Amapinda 25:11.
16. Kuti twacita shani pa kuti abo tusambilisha Baibo “bale-enda mu cine”?
16 Tulaba ne nsansa nga tulesambilisha abantu icine pali Yehova. Kuti twalenga ‘balaenda mu cine’ nga tulecita ifyakonkapo: Tulecita ifintu ifingalalenga baletupashanya. (3 Yoh. 3, 4) Mulecita ifilanga ukuti mwalisumina ukutila Lesa akafikilisha ifyo atulaya mu Cebo cakwe. Mwilalanda icine pa mulandu wa kuti mulefwaya abantu balemulumbanya. Ilyo mulesambilisha abantu icine, mulelanda amashiwi ayasuma, kabili pa nshita iisuma. Na kabili, nga ca kuti abantu bamutasha, muleleka balelumbanya Yehova. Nga mulecita ifi, mukalanga ukuti mupepa Yehova, Lesa wa cine.
ULWIMBO 160 “Imbila Nsuma”!
a UBULONDOLOSHI BWA CIKOPE : Mu cikope ca kubalilapo, munyinefwe amona icililuba ca Krisimasi mu ng’anda ya muntu e lyo alamulanga icipande icilanga ukuti Krisimasi yafuma mu mipepele ya bufi. Mu cikope calenga bubili, munyinefwe umo wine alelanga uyu umwaume icipande icilanda pa fyo abaume bengacita pa kuti babe abafyashi abasuma. Ni nshila nshi pali ishi shibili iingalenga abila bwino imbila nsuma?