Balibakakile no Kubabinda

Balibakakile Pantu Balikene Ukwingila Ubushilika

Pa 19 June, 1949, ibumba lya bena Dominican ilyasendelwe muli bunkole lyalibwelele mu calo pa kuti bafumyepo Rafael Trujillo uwa lucu pali bukateka. Nangu ca kuti aya mapange baliyafulungenye bwangu bwangu, ubuteko bwa kwa Trujillo bwalekaka bonse abalekana ukwingila ubushilika, na bonse abo balemona ukuti balwani. Pali ba Nte abo babalilepo ukukaka pa mulandu wa kukaana ukwingila ubushilika pali na ba León, ba Enrique na ba Rafael Glass, pamo na ba Nte abalebomba na ba León.

Ba León balondolola ica bacitikile pamo na ba bwananyina abo balebomba nabo, batile: “Abashilika ba buteko balitwikete no kutulubulwisha. Pa numa ya kututiinya sana, balitulekele twaya, lelo papitile fye inshiku shinono balitwitile na kabili ukuti twingile ubushilika ukwabula ukukonka bwino fyonse ifyalefwaikwa. Apo twalikene ukucita ifyo batwebele, balitukakile. Mu cifungo twasangilemo na bambi ba Nte abaume bane, pali aba pali umwaice wandi no mukalamba wandi. Ilyo batufumishe, balitwikete na kabili. Ifi fine e fyo balecita, pa miku itatu, e lyo limo palepita fye inshiku shinono, batukaka na kabili. Twali mu cifungo mupepi ne myaka 7, kabili umuku wa kulekeleshako batukakile twaikelemo imyaka isano.”

Ala mwandini ukuba mu cifungo cali bwesho ubukalamba ku ba bwananyina. Abafungwa na bakalinda ba cifungo balebapumya cila bushiku. Umukalamba wa bakalinda ba cifungo ca Fort Ozama uko babakakile pa kubala atile: “Amuti muli Nte sha kwa Yehova, ilyo mukaba inte sha kwa Satana Kaseebanya, mukanjebe pa kuti nkamufumye.” Na lyo line, abalwani balifililwe ukulesha bamunyinefwe ba cishinka ukutwalilila aba kaele. Ba León balilondolwele icalengele bashipikishe, batile: ‘Lyonse Yehova aletupeela amaka ya kushipikisha kabili twalimwene ifyo aletwafwa na mu tuntu utunono sana. Na lintu baletumina ku nkonto, amembya na ku mfuti, twalishipikishe. Yehova alitupeele amaka ya kushipikisha.’

Ba Nte Bababinda

Mu ncende shimbi isha Dominican, abashalefwaya ukupepa kwa cine balecililako fye ukucusha abantu ba kwa Lesa. Nangu cali ifi, ilyo calefika mu May 1950, mu Dominican Republic mwali bakasabankanya 238, ukulunda pali bamishonari kabili pali aba, pali bapainiya 21.

Nalimo pali ilya ine nshita, tifitifi umo alembeele cilolo wa buteko ukuti: “Aba mu kabungwe ka Nte sha kwa Yehova bacili baleshimikila mu fitungu fyonse mu musumba [uwa Ciudad Trujillo].” Alundilepo no kuti: “Na kabili ndebwekeshapo ukumweba ukuti mulingile ukucenjela na ba bantu. Ifyo bashimikila ne fyo bacita filelufya abekala calo abengi sana.”

Kalemba uwalelolekesha pali bakapokola ne fyalecitika mu calo, J. Antonio Hungría, aebele munyinefwe Brandt ukulemba kalata umo ali no kulondolola ifyo ba Nte bamona ukwingila ubushilika, ukupika sulupu ku mendela no kulipila imisonko. Munyinefwe Brandt abomfeshe ifyebo fyaba mu citabo citila, “Let God Be True” (Lekeni Lesa abe uwa Cine). Na lyo line, pa 21 June, 1950, Hungría, kalemba wa mu buteko, alifumishe icipoope ica kubinda umulimo wa Nte sha kwa Yehova mu Dominican Republic. Munyinefwe Brandt balimwitile kwi ofeshi lya kwa Hungría pa kuti ayeyumfwila umwine icipoope. Ba Brandt balimwipushe nga ca kuti bamishonari bali no kufuma mu calo. Hungría atile kuti baikala cikulu fye balekonka amafunde ya calo kabili tabaleshimikila.a