Ubuntungwa bwa Kushimikila

Trujillo Bamwipaya

Ilyo calefika mu 1960, ifyalo ifingi fyalesuusha imitekele ya kwa kateka Trujillo iya lucu kabili na bana calo nabo bene tabatemenwe imitekele yakwe. Pali iyi yine inshita, e lyo ba Milton Henschel abafumine ku maofeshi yakalamba aya Nte sha kwa Yehova batandalile icalo ca Dominican Republic kabili balisangilwe na ku kulongana ukwa nshiku shitatu ukwaliko mu January 1961. Abantu 957 e basangilwe pali kulya kulongana kabili 27 balibatishiwe. Pali iyi nshita, ba Henschel balyafwile aba bwananyina ifya kuteyanya cipya cipya umulimo wa kushimikila ne fya kwakanya icifulo ca kubombelamo.

Bakangalila ba muputule babili, ba Enrique Glass na ba Julián López balibapeele umulimo wa kulabombela ifilonganino. Ba Julián batile, “Mu muputule wandi, nalebombela ifilonganino fyonse ifyali ku kapinda ka ku kuso na fibili ifya ku kabanga. Ba Enrique bena balebombela ifilonganino ifyashala ifyali ku kabanga na fyonse ifyali ku kapinda ka ku kulyo.” Ifi bakangalila balebombela ifilonganino calengele ifilonganino filelanshanya na ba ku maofeshi yakalamba kabili aba bwananyina balikoseleshiwe nga nshi.

Mu 1961, ba Salvino na ba Helen Ferrari abapwishishe Isukulu lya Gileadi mwi kalasi lyalenga bubili balifikile. Ifyo babombele bumishonari ku Cuba fyalibafwile ukubomba bwino umulimo wa kulobolola kukalamba ukwali mu Dominican Republic. Mu kuya kwa nshita, ba Salvino balibombeleko na muli Komiti ya Musambo mpaka ilyo bafwile mu 1997. Ba Hellen bena balibomba mu mulimo wa nshita yonse imyaka 79, kabili imyaka iingi babomba bumishonari.

Tapakokwele ilyo ba Ferrari na bena mwabo bafikile, mu nshita ya bushiku, imitekele ya kwa Trujillo iya lucu yalipwile lintu bamwipeye ne mfuti muli motoka yakwe pa 30 May, 1961. Nangu ca kuti Trujillo balimwipeye, mu calo mwena tamwali umutende; ifimfulunganya fyalitwalilile pa myaka iingi.

Umulimo wa Kushimikila Walunduluka

Ilyo ifi fyonse fyalecitika, bamishonari na bambi balifikile mu calo. Ba William Dingman na bena mwabo ba Estelle abapwishishe Isukulu lya Gileadi mwi kalasi lya kubalilapo e lyo na ba Thelma Critz na ba Flossie Coroneos balibakuushishe ku Dominican Republic ukufuma ku musambo wa Puerto Rico ninshi papitile fye inshiku shibili ukutula apo Trujillo bamwipaile. Ba William batile, “Ilyo twafikile, mu calo mwali ifimfulunganya sana, abashilika bali fye konse konse kabili balepikita bonse abalepita mu musebo. Abantu baletiina sana ibumba ilyaimine ubuteko. Abashilika baletwimika pa fipekeni ifingi kabili ponse balepikita mu fyola fyesu. Balefumya fyonse mu fyola ukubikako fye no tuntu utunono.” Ala calyafishe nga nshi ukushimikila mu calo umwa kuti inshita fye iili yonse ifimfulunganya kuti fyaima!

Na kabili, ba William batile, “Ilyo Trujillo aleteka, abantu abengi baishibe ukuti ba Nte baali ni ba komyunisti kabili bantu ababipa sana. . . Lelo, panono panono twaile tulepwisha ulu ulupato.” Ici calengele ukuti abantu abengi aba mitima ya bufumacumi balekutika ku mbila nsuma iya Bufumu. Ilyo umwaka wa mulimo uwa 1961 walepwa, mu Dominican Republic mwali bapainiya baibela 33.