“Ubu e Bupyani bwa Babomfi ba kwa Yehova.”—Esa. 54:17.

ABABOMFI ba kwa Yehova mu Georgia balabombesha nga nshi mu mulimo wa kubila imbila nsuma kabili Yehova alabapaala pa fyo babombesha. Ifyo babombesha fyalilenga abantu abengi mu calo ukukutika ku mbila nsuma.

Mu myaka ya nomba line, bakasabankanya abacincila na bapainiya babika amano ku kubila imbila nsuma mu fifulo ifishibombelwamo sana. Pa kuti bayebila imbila nsuma mu mishi iinono umwaba sana impili, kano nabakwata motoka iingenda muli ishi incende nelyo utumamotoka utwendela ku ntambo mu mpili.

Cila mwaka ukutendekela mu 2009, umusambo wa ku Georgia ulatuma umutande wa fifulo ifishabombelwamo ku filonganino no kukoselesha bamunyinefwe ukulabila imbila nsuma muli ifi fifulo. Abengi baliipeelesha ukwalulako fimo mu mikalile yabo pa kuti babombeleko muli ifi fifulo.

Ilyo ba Temuri na ba Ana Bliadze baupene fye, baishileishiba ukuti bakasabankanya ba kubila imbila nsuma balicepele ku citungu ca mpili ica Ajaria. Pali iyi inshita e lyo bashitile fye impanga apo bali no kukuula ing’anda. Nomba balikwete ishuko lya kubombesha mu mulimo wa kubila imbila nsuma.

Babalilepo ukwikala mu citungu ca Ajaria pa mulungu umo. Ilyo ba Temuri baleibukisha ifyacitike pa muku wa kubalilapo bafikile kuli ici cifulo, batile: “Bakasabankanya twasangile baleenda intamfu ishitali pa kuti fye bayebila imbila nsuma mu mishi iinono. Twalikwete motoka kabili lilya line namwene ukuti yali no kulatwafwa sana kuli cilya cifulo.”

Ba Ana balandile no kuti: “Calitukosele ukukukila kuli ici cifulo pantu twalitemenwe sana icilonganino twalimo e lyo na balupwa lwesu abo twali no kusha.” Ukucila pa myaka itatu, ba Temuri na ba Ana balafwilisha ibumba mwi tauni lya Keda ilyabela mu citungu ca Ajaria.

Bapainiya Abalebombesha

Bapainiya baibela aba pa nshita iinono balibombeshe ukubila imbila nsuma mu ncende ishali ukutali sana. Ilyo inshita bali no kubombela kuli ici cifulo yapwile, bapainiya abengi bapingwilepo ukukanafumako pa kuti bengatwalilila ukutungulula amasambililo ya Baibolo ayo batendeke.

Bankashi babili bapainiya, abakwete ishina limo line ilya Khatuna, babatumine ukuya mu kubombela mwi tauni ilisuma sana ilya Manglisi. Nangu ca kuti muli ili itauni tamwali ba Nte, bankashi balebomba bwino umulimo wa kubila imbila nsuma. Mu mweshi wa kubalilapo baletungulula amasambililo ya Baibolo 9, umweshi uwakonkelepo 12, umweshi umbi uwakonkelepo 15, lyena na pa kulekelesha baishilekwata amasambililo 18. Pa kuti bengatwalilila ukwafwa abasambi babo aba Baibolo, bapingwilepo ukulaikala mu Manglisi.

Pa kuti balesanga umwakuliila, aba bankashi balingile ukulabombesha. Abengi abatandala ku Manglisi balatasha ukumona ifintu ifisuma ifyo bapanga ukubomfya ifitwala ku milemu ifyaishibikwa ukuti fisuma ku bumi bwa muntu. Pa kubala, aba bankashi basendele ifitwala ku milemu ifya grini no kupangilamo ifintu ifisuma ifyo baleshitisha pa maliketi. Nomba kwali fimbi ifyo bashaleenekela ifyo bali no kulacita pa kukwata indalama.

Bushiku bumo, umuntu balesambilisha Baibolo abaleteele utwana twa nkoko. Alondolwele ukuti inkoko yakwe yalebikila amani apafisama kabili ilyo yatotele yaishile no twana pa ng’anda. Uyu mwanakashi alefwaya ukupeela abalemusambilisha Baibolo utu twana twa nkoko uto ashaleenekela. Umo pali aba bankashi bapainiya alitekelepo inkoko, kanshi balitendeke ukuteka inkoko pa kuti balesangamo indalama sha kubomfya.

Nkashi umo atile: “Apo Yehova, bamunyinefwe e lyo na abo twalesambilisha Baibolo baletwafwa, twalikeele ku Manglisi pa myaka 5.” Pali ino nshita ku Manglisi kwaliba ibumba lya bamunyina na bankashi abacincila ukubombela Yehova.

Balebomba Bupainiya mu Ndimi sha ku Fyalo Fimbi

Mu myaka ya nomba line, mu Georgia mwaliba abantu abengi abafuma ku fyalo fimbi. Bapainiya abengi balilwike ukuti bali no kukwata abantu na bambi aba kubilako imbila nsuma. Kanshi batendeke ukusambilila indimi pamo nga iciArabic, iciAzerbaijani, iciChinese, iciNgeleshi, iciPersian e lyo ne ciTurkish.

Bapainiya abengi balitendeke ukulongana mu filonganino na mu mabumba ayabomfya ululimi lwa ku fyalo fimbi, bambi bakukiile ku fyalo fimbi uko aba kubila imbila nsuma bacepele. Ba Giorgi na ba Gela baile mu kubombela ukwali ukukabila ku calo cimbi ninshi bali fye abaice. Ba Giorgi batile: “Twalefwaya ukubombela sana Yehova kabili ukukukila ku calo cimbi kwalitwafwile ukubombela sana Yehova.”

Ilyo ba Gela batontonkenye pa fyo balebombela Yehova ku calo cimbi, batile: “Ukubomba bueluda kuli ici cifulo kwalinsambilishe ifintu ifingi nga nshi. Kulaba ukumfwa bwino sana nga Yehova alekubomfya ukwafwa ‘utwana utwa mpaanga.’”—Yoh. 21:17.

Ba Giorgi balandile no kuti: “Twalikwete amafya ayengi, lelo twalebika amano ku mulimo kabili tatwalefwaya ukulatontonkanya na pa fintu fimbi. Twalishibe ukuti ifyo twalecita e fyo twalingile fye ukucita.”

Munyina umbi uo ishina lyakwe ni Gela, alibombeeleko ku Turkey pa myaka iinono. Atile: “Pa kubala, nshaleba sana ne nsansa mu mulimo wa kubila imbila nsuma pantu calingafishe ukusambilila ukulanda ululimi abantu balelanda kuli ici calo. Na lyo line, naleba sana ne nsansa ilyo natendeke ukulanshanya na babwananyina e lyo na bantu aba mu cifulo twalebombela mu lulimi lwabo.”

Ba Nino ababomba bupainiya ukucila pa myaka 10 mu Istanbul ku Turkey balandile ifyo baleumfwa pa mulimo balebomba kabili batile: “Nalimwene uko Yehova alengafwa ukutula fye apo nailile kuli ici calo. Ukubombela ku calo cimbi kulalenga wakwata ifingi ifya kushimika nga filya tubelenga mu citabo ca Ilyashi lya Nte sha kwa Yehova.”