ABACAICE BEPUSHA UKUTI

Bushe Mfwile Ukubatishiwa?—Ulubali 1: Umo Ukubatishiwa Kwalola

Cila mwaka abacaice abengi abakulila mu ndupwa sha Nte sha kwa Yehova balabatishiwa. Bushe na iwe ulatontonkanyapo pa kubatishiwa? Nga ca kuti ulatontonkanyapo pa kubatishiwa, ninshi intanshi ufwile ukwishiba umo ukuipeela no kubatishiwa kwalola.

Bushe ukubatishiwa kwalola mwi?

Ulubatisho ulo Baibo yalandapo kutuumpika umuntu onse mu menshi—te kusansa fye umuntu amenshi—kabili ukutumpika umuntu mu menshi kupilibula icintu icacindama.

Nga bakwibisha mu menshi ninshi walanga icintubwingi ukuti tawakulabika fye amano mu kucita ifyakuisekesha.
Nga bakufumya mu menshi ninshi walanga ukuti watendeka imikalile iipya pantu nomba wa kulabika sana amano mu kucita ifilenga Lesa alesekelela.

Nga wa batishiwa ninshi walanga pa cintubwingi ukuti Yehova e wakwata insambu sha ku kweba icifwile ukuba icalungama ne calubana. Kabili ninshi walenga caishibikwa ukuti walilaya Yehova ukuti lyonse wa kulaitemenwa ukucita ifyo afwaya.

Ico ufwile ukutontonkanyapo: Mulandu nshi ulingile ukuilanga ku cintubwingi ukuti wali-ipeelesha ukulaumfwila Yehova? Belenga 1 Yohane 4:19 na Ukusokolola 4:11.

Bushe calola mwi ukuipeela kuli Yehova?

Ilyo ushilabatishiwa, ufwile ukuipeela kuli Yehova ninshi uli fye weka. Finshi ufwile ukucita pa kuipeela?

Ufwile ukupepa ipepo ninshi uli fye weka, kabili muli ilyo ipepo ufwile ukulaya Yehova ukuti wa kulamubombela mpaka fye ne mfwa no kuti wakulacita ifyo afwaya te mulandu ne fingacitika, e lyo na lintu bambi basalapo ukucita ifipusene ne fyo iwe usalilepo.

Ulubatisho e lulenga abantu baishiba ukuti wali-ipeela kuli Yehova. Lulenga abantu baishiba ukuti wali-ikaana no kuti nomba uli wa kwa Yehova.—Mateo 16:24.

Ico ufwile ukutontonkanyapo: Mulandu nshi twingalandila ukuti ifintu mu bumi filawaminako nga watendeka ukucita ifyo Yehova afwaya? Belenga Esaya 48:17, 18 na AbaHebere 11:6.

Cinshi ukubatishiwa kwacindamina?

Yesu alandile ukuti abasambi bakwe bafwile ukubatishiwa. (Mateo 28:19, 20) Kanshi na muno nshiku mwine pa kuti umuntu abe Umwina Kristu afwile ukubatishiwa. Na kuba, Baibo itila pa kuti umuntu akapusuke, afwile ukubatishiwa.—1 Petro 3:21.

Na lyo line, ukutemwa Yehova no kumutasha pa fyo akucitila e fifwile ukulenga wasalapo ukubatishiwa. Ufwile ukumfwa nga filya uwaimbile amalumbo aumfwile, uwalembele ukuti: “Cinshi ndepeela Yehova pa fisuma fyonse ifyo ancitila? . . . ndelilila kuli Yehova ukubomfya ishina lyakwe. Ndefikilisha imilapo nalapile kuli Yehova.”—Amalumbo 116:12-14.

Ico ufwile ukutontonkanyapo: Fisuma nshi ifyo Yehova akucitila, kabili finshi wingamupeela? Belenga Amalango 10:12, 13 na Abena Roma 12:1

Ifyo abanobe balandapo

“Pa kuipeela kuli Yehova tulamulaya, kabili ifyo tumulaya fyalicindama sana, kanshi taufwile ukukwangusha.Nomba nga waipeela kuli Yehova, akakupaala mu nshila ishalekana-lekana. Na kuba, Yehova alatusakamana bwino ukucila na pa fyo twingaisakamana fwe bene.”—E fyalandile Mijin.

“Yehova ali kulanga kale ukuti alikutemwa. Nga wabatishiwa ninshi na iwe walanga ukuti walimutemwa nga nshi. Ukubatishiwa lishuko icine cine kabili lipaalo ilikalamba!”—E fyalandile Ember.

“Ukusalapo ukuipeela kuli Lesa no kubatishiwa e cintu icacindamisha pa fintu fyonse ifyo umuntu engasalapo ukucita. Nomba ici tacifwile uku kutiinya. Lelo nga ca kuti nauipekanya kabili ico ulefwaila ukuipeela no kubatishiwa ni co walitemwa Yehova, nga wabatishiwa ninshi wasalapo ukucita icintu icisuma sana pali fyonse ifyo wingasalapo ukucita.”—E fyalandile Julian.

Ubufi ne cishinka

UBUFI — Abakalamba e bengafikapo fye ukubatishiwa.

ICISHINKA — Umushinku teulenga umuntu aba umukalamba mu fya kwa Lesa, lelo umuntu kuti aba umukalamba mu fya kwa Lesa nga ca kuti natemwa sana Yehova kabili alefwaisha ukulamumfwila. Yosefe, Samwele, na Yoshia balecita ifyalelanga ukuti bali bakalamba mu fya kwa Lesa ninshi bali fye abaice. Na muno nshiku mwine ifi fine e fyo abacaice abengi bacita.

Ifyo Baibo ilanda: “Umwana bamwishibila ku fyo acita, nga fyalisanguluka kabili nga fyalilungama.”—Amapinda 20:11.

UBUFI — Nga ca kuti abanobe balebatishiwa, ninshi na iwe ufwile ukubatishiwa.

ICISHINKA — We mwine niwe ufwile ukuisalilapo ukuipeela no kubatishiwa, kabili ufwile ukusalapo ukucita ifi pa mulandu wa kuti e fyo ulefwaya we mwine. Te cintu ico umuntu afwile ukucita pa mulandu wa kuti afika pa mushinku umo. Kanshi taufwile fye ukubatishiwa pa mulandu wa kuti abanobe balebatishiwa nelyo pa mulandu wa kuti abantu bale-enekela ukuti ufwile ubatishiwe.

Ifyo Baibo ilanda: “Abantu [ba kwa Lesa] bakaipeelesha abene.”—Amalumbo 110:3.

UBUFI — Nga ta wabatishiwa ninshi Lesa te kuti akupeele umulandu pali fyonse ifyo ucita.

ICISHINKA — Ukubatishishiwa te kwingalenga Yehova akupeele umulandu pa fyo ucita, lelo Yehova kuti akupeela umulandu nga ca kuti ulecita ifintu ifyo wishibe ukuti Lesa alifipata.

Ifyo Baibo ilanda: “Umuntu nga alishiba ukucita icalungama lelo tacicita, ninshi alabembuka.”—Yakobo 4:17.

IFYO WINGACITA: Nga umona ukuti ukuba Umwina Kristu uwaipeela kabili uwabatishiwa cintu icikalamba ico ushingakumanisha ukucita, kuti cawama waibebeta pa kuti wishibe icilenga ulemona ifyo, na pa kuti wishibe ifyo wingacita pa kuti uleke ukutontonkanya ifyo. Cimo ico wingacita pa kuibebeta, kubelenga Icipandwa 37 mu citabo citila Ifipusho Abacaice Bepusha—ne Fyasuko Ifingabafwa, Ibuuku 2.