Mulandu Nshi Tufwile Ukupepela mwi Shina lya kwa Yesu?

Ifyo Baibolo ilanda

Tufwile ukupepela mwi shina lya kwa Yesu pantu iyi e nshila fye Lesa asuminisha nga tulefwaya ukulanda Nankwe. Yesu atile: “Nine nshila ne cine no mweo. Takuli uwisa kuli Tata kano aishila muli ine.” (Yohane 14:6) Na kabili, Yesu aebele abatumwa bakwe aba cishinka ukuti: “Ndemweba icine cine, nati, Nga mwalomba icintu conse kuli Tata, akamupeela mwi shina lyandi.”—Yohane 16:23.

Imilandu na imbi iyo tufwile ukupepela mwi shina lya kwa Yesu

• Tulanga ukuti twalicindika Yesu na Wishi, Yehova Lesa.—Abena Filipi 2:9-11.

• Tulanga ukuti tulatasha pa fyo Lesa atutumiine Yesu ukutufwila pa kuti tukapusuke.—Mateo 20:28; Imilimo 4:12.

• Ni co twalishiba umulimo waibela uo Yesu abomba pamo ngo wakupapaatilako abantu kuli Lesa.—Abahebere 7:25.

• Tulatasha pa mulimo Yesu abomba pamo nga Shimapepo Mukalamba uulenga ukuti tube ifibusa fya kwa Lesa.—AbaHebere 4:14-16.