Bushe Satana Ekala Kwi?

Icasuko ca mu Baibolo

Apo Satana ni malaika, te kuti tumone uko ekala. Lelo kwena, tekela ukwaba umulilo wa pe, uko alungulusha ababifi, nge fyo bamulengele mu cikope cili muli cino cipande.

“Inkondo mu muulu”

Kwali inshita imo ilyo Satana Kaseebanya bamulekele ukulaendauka mu muulu umwaba ifibumbwa fya mipashi, kabili aleya na pa ntanshi ya kwa Lesa pamo na bamalaika ba cishinka. (Yobo 1 :6) Lelo Baibolo yasobele ukuti kwali no kubuuka “inkondo mu muulu,” kabili Satana bali no ku mutamfyamo ‘no kumupoosa pe sonde.’ (Ukusokolola 12:7-9) Ukupenda imyaka ya mu kusesema kwa mu Baibolo e lyo ne filecitika pano isonde, filanga ukuti iyi nkondo iyasobelwe yalicitika kale. Ino nshita Satana balimupoosa pano isonde kabili te kuti aye ku muulu.

Bushe ici calola mu kuti Satana alikwata icifulo cimo pano calo uko ekala? Ku ca kumwenako, Baibolo yatila mu musumba wa kale uwa Pergamo e mo ‘Satana akwatiile icipuna cakwe ica bufumu’ kabili e ‘kwaleikala Satana.’ (Ukusokolola 2:13) Aya mashiwi yafwile yapilibula ukuti muli uyu musumba, e mwafulile sana abalepapa Satana. Baibolo itila, Satana e uteka “amabufumu yonse aya bantu ba pe sonde,” kanshi takwaba icifulo ca mu kulungatika uko ekala, lelo balimupoosa pano isonde.—Luka 4:5, 6.