Bushe Helo E Cinshi? Bushe Cifulo uko Abantu Bapya mu Mulilo wa Pe?

Icasuko ca mu Baibolo

Bamo abapilibula ama Baibolo nga basanga apali ishiwi lya ciHebere ilya kuti “Sheol,” nelyo ilya ciGriki ilya kuti “Hades,” babikapo ishiwi lya kuti “helo.” Lelo aya mashiwi, Sheol na Hades yonse, yapilibula fye inshiishi. (Amalumbo 16:10; Imilimo 2:27) Abantu abengi basumina ukuti kwaliba helo nelyo icifulo ukwaba umulilo wa pe, nge fyo ici icikope cilelanga. Lelo ifi te fyo Baibolo isambilisha:

1. Ababa ku helo tabaishiba akantu nangu kamo, kanshi tabomfya ubukali. Baibolo itila, “Ku nshiishi . . . takwaba umulimo wa kubomba nangu kwelenganya nangu kwishiba nangu mano.”​—Lukala Milandu 9:10.

2. Abantu abasuma balaya ku helo. Abaume abali ne cishinka kuli Lesa, Yakobo na Yobo, balishibe ukuti bakaya ku helo.​—Ukutendeka 37:35; Yobo 14:13.

3. Icilambu ca lubembu ni mfwa, te kuya mu kupya mu mulilo. Baibolo itila, “Umuntu nga afwa, ninshi umulandu wakwe uwa lubembu wapwa.”​—Abena Roma 6:7.

4. Lesa uwa mulinganya te kuti aleoca abantu mu mulilo. (Amalango 32:4) Ilyo umuntu wa kubalilapo Adamu abembwike, Lesa amwebele ukuti ali no kufwa. Atile: “Uli lukungu, kabili ku lukungu e ko ukabwelela.” (Ukutendeka 3:19) Nga ca kuti ilyo Adamu afwile aile mu kupya mu mulilo, ninshi kuti twatila Lesa alibepele. Nomba te kuti Lesa abepe.

5. Lesa tatontonkanyanapo pa koca abantu mu mulilo. Icisambilisho ca kuti Lesa aloca abantu mu mulilo wa helo calipusana na filya Baibolo yalanda ukuti “Lesa kutemwa.”​—1 Yohane 4:8; Yeremia 7:31.