Bushe Inte sha kwa Yehova Balyalula Baibolo pa Kuti Ilelanda Ifyo Basumina?
Awe, tatwayalula Baibolo. Lelo nga twasanga ukuti ifyo twasumiine fyapusana ne fyo Baibolo ilanda, tulaaluka.
Kale ilyo tushilatendeka ukupulinta amaBaibolo ya Amalembo ya Calo Cipya mu 1950, twalibelengele sana ifyaba mu Baibolo. Twalibomfeshe amaBaibolo yalekanalekana pa kuti twishibe ifyo tufwile ukusumina. Moneni fimo ifyo Inte sha kwa Yehova basumina pa nshita ntali, kabili moneni nga fyalilingana ne fyo Baibolo isambilisha.
Ifyo twasumina: Muli Lesa tamwaba abene batatu. Magazini ya Zion’s Watch Tower iya mu July 1882 yatile: “Ababelenga impapulo shesu balishiba ukuti nangu ca kuti twalisumina muli Yehova na Yesu, no Mupashi wa mushilo, tatwasumina ukuti muli Lesa umo mwaba balesa batatu pantu te fyo amalembo yalanda.”
Ifyo Baibolo ilanda: “Yehova Lesa wesu ni Yehova umo.” (Amalango 6:4, The Holy Bible) “Kuli ifwe Lesa aba fye umo mpo, e Shifwe uo ifintu fyonse fyatulako, na ifwe bene tuli bakwe; kabili kwaba fye Imfumu imo fye, e Yesu Kristu uo Lesa abumbiilemo ifintu fyonse kabili e o twabeelamo abomi.” (1 Abena Korinti 8:6, The Bible in Bemba) Yesu umwine atile: “Tata mukalamba ukucila pali ine.”—Yohane 14:28, The Bible in Bemba.
Ifyo twasumina: Takwaba ukulunguluka mu mulilo wa pe. Magazini ya Zion’s Watch Tower iya mu June 1882 yakwete umutwe uwafumine pa Abena Roma 6:23 muli Baibolo ya King James Version, uwaleti: “Icilambu ca Lubembu ni Mfwa.” Iyi magazini yatile: “Aya mashiwi tayayafya ukumfwa. Lelo tulapapa ukuti abantu abengi abasumina ukuti Baibolo Cebo ca kwa Lesa batwalilila fye ukulanda ifyapusana na ya amashiwi. Batila Baibolo isambilisha ukuti icilambu ca lubembu kulunguluka mu mulilo umuyayaya, kabili ifi fine e fyo basumina.”
Ifyo Baibolo ilanda: “Umuntu uubembuka e ukafwa.” (Esekiele 18:4, 20, Baibele wa Mushilo uwa mu 1956) Lesa takalungulushe mu mulilo abakaana ukumumfwila, ‘akabonaula fye umuyayaya.’—2 Abena Tesalonika 1:9.
Ifyo twasumina: Ubufumu bwa kwa Lesa tabwaba mu mutima wa muntu, lelo buteko bwa cine cine. Magazini ya Zion’s Watch Tower iya mu December 1881 yalandile pa Bufumu bwa kwa Lesa ukuti: “Ubufumu bwa kwa Lesa bukafumyapo amabufumu yonse aya pano calo.”
Ifyo Baibolo ilanda: “Mu nshiku sha shamfumu isho, Lesa wa mu muulu akemya ubufumu ubushakonaulwe nakalya. Kabili ubo bufumu tabwakashiilwe ku bantu bambi. Bukashonaula no kupwisha aya mabufumu yonse, kabili bwena bukeminina umuyayaya.”—Daniele 2:44.
Bushe Inte sha kwa Yehova babomfya fye Baibolo ya Amalembo ya Calo Cipya pa kulanda ifyo basumina?
Awe, tulabomfya amaBaibolo yalekanalekana mu mulimo wa kushimikila. Na kuba, nangu ca kuti tulapeela abantu amaBaibolo ya Amalembo ya Calo Cipya ukwabula ukulipilisha nga balefwaya ukulasambilila Baibolo, tatukaanya abafwaya ukulabomfya amaBaibolo yambi pa kusambilila.