Bushe Inte Sha Kwa Yehova Bamona Shani Ukulekana?
Tulakonka ifyo Baibo ilanda pa cupo e lyo no kulekana. Lesa afwaya abaupana batwalilila ukuba pamo mpaka ne mfwa. Umulandu umo uo Baibo yalandapo uwingalenga abaupana balekana, bucende.—Mateo 19:5, 6, 9.
Bushe Inte sha kwa Yehova balafwilisha abakwata amafya mu cupo?
Ee, kwaliba ifingi ifyo bacita pa kwafwilisha abaupana:
Impapulo. Ilingi line muli ishi mpapulo mulaba ifyebo ifingalenga abaupana balaumfwana bwino sana, ukubikako fye na bamona kwati ukulekana kwawamapo. Ku ca kumwenako, moneni ifipande fitila “Ifyo Mwingatwalilila Ukuipeelesha mu Cupo Cenu,” “Ukubelela Abena Mwenu Uluse,” na “Ifyo Mwingacita pa Kuti Mucetekele Abena Mwenu na Kabili.”
Ukulongana. Tulasambilila ifyo Baibo ilanda pa cupo ilyo tuli pa kulongana kwa pa cilonganino, ukwa muputule, e lyo no kwa citungu.
Baeluda. Ilyo baeluda baleafwa abaupana abakwete amafya, balabomfya amalembo pamo nga Abena Efese 5:22-25.
Bushe baeluda balikwata insambu sha kweba ba Nte abaupana ukuti balekane nelyo iyo?
Awe. Nangu ca kuti baeluda balasumina ukwafwa abakwete amafya mu cupo cabo, tabakwata insambu sha kweba abaupana ifya kucita. (Abena Galatia 6:5) Na lyo line, nga ca kuti umo asalapo ukupwisha icupo apabula umulandu wa mu malembo, uyo muntu ninshi takwete insambu sha kuupa nelyo ukupwa na kabili.—1 Timote 3:1, 5, 12.
Bushe Inte sha kwa Yehova bamona shani ukupaatukana?
Baibo ikoselesha abaupana ukutwalilila ukuba pamo na lintu cingabakosela ukucita ifyo. (1 Abena Korinti 7:10-16) Amafya ayengi ayo abaupana bakwata kuti yapwa nga ca kuti balepepa ukwabula ukuleka, balekonka amashinte ya mafunde ya mu Baibo, e lyo no kulacita ifilanga ukuti balitemwana.—1 Abena Korinti 13:4-8; Abena Galatia 5:22.
Na lyo line, amafya yamo yalalenga Abena Kristu basalapo ukupaatukana na bena mwabo. Amafya pamo nga:
Ukukanalasakamana aba mu lupwa ku mufulo fye.—1 Timote 5:8
Ukupuma sana abena mwakwe.—Amalumbo 11:5.
Nga ca kuti umo alecita ifingalenga bucibusa bwa bena mwakwe na Yehova bwapwa. Ku ca kumwenako, umulume nelyo umukashi nga alepatikisha umwina mwakwe ukukanakonka amafunde ya kwa Lesa, uo balepatikisha kuti asalapo ukuti bapaatukane pa kuti alenakila “Lesa ukucila ukunakila abantu.”—Imilimo 5:29.