ABACAICE BEPUSHA UKUTI
Finshi Ningacita pa Kuti Nsale Bwino abo Ningalapashanya?
“Ilyo nali ku sukulu, nga ca kuti nakwata amafya, naletontonkanya pa muntu uwalekwata amafya ayapalana na yo nalekwata, kabili nale-esha ukumupashanya. Ukucita ifi kwalengafwa sana. Ifi nakwete uo nalepashanya calengele canyangukila ukushipikisha amafya.”—E fyalandile Haley.
Ukukwata umuntu uo wingapashanya kuti kwalenga wilacita ifingakuletelela kabili kuti kwalenga wafikilisha ifyo wapanga ukucita. Nomba ufwile ukusala bwino abo ulingile ukulapashanya.
Cinshi ufwile ukusalila bwino abo ulingile ukulapashanya?
Abo usala ukulapashanya kuti balenga walacita ifisuma nelyo ifyabipa.
Baibo ikoselesha Abena Kristu ukulapashanya abantu ababa ne mibele iisuma, itila: “Nga mwamona ifisuma ififuma mu fyo bacita, mulepashanya icitetekelo cabo.”—AbaHebere 13:7.
Ifyo wingacita: Apo abo usala ukulapashanya kuti balenga walacita ifintu ifisuma nelyo ifyabipa, ufwile ukusala abantu ababa ne mibele iisuma. Taufwile ukulapashanya umuntu pa mulandu fye wa kuti alilumbuka nelyo pa mulandu wa kuti mwalilingana umushinku.
“Nalisambilileko ifintu ifingi kuli Adam Umwina Kristu munandi. Nalisambilileko ku fyo aba e lyo na ku fyo alecita ifintu. Na pali ino inshita ncili ndebukisha ifyo alelanda e lyo ne fyo alecita. Ala alingafwa icine cine!”—E fyalandile Collin.
Abo usala ukulapashanya kuti balenga wa-aluka mu fyo utontonkanya e lyo na mu fyo umona ifintu.
Baibo itila: “Mwilufiwa. Ukwampana pamo na bantu babipa kulonaula imibele isuma.”—1 Abena Korinti 15:33.
Ifyo wingacita: Ulepashanya abantu ababa ne mibele iisuma, wilapashanya abantu pa mulandu fye wa kuti balamoneka bwino. Nga tausalile bwino abo ulingile ukulapashanya kuti walaumfwa sana ububi nelyo ukufuupuka.
“Nga ca kuti uleipashanya ku bantu abalumbuka, kuti watendeka ukuimona kwati tawacindama nelyo kwati uli mubi.” —E fyalandile Tamara.
Ifyo ulingile ukutontonkanyapo: Finshi fingacitika nga ca kuti wasalapo ukulapashanya abantu abalumbuka sana?
Abo usala ukulapashanya kuti balenga wafikilisha ifyo wapanga ukucita nelyo iyo.
Baibo ilanda ukuti: “Uule-enda na ba mano akaba uwa mano.”—Amapinda 13:20.
Ifyo wingacita: Ulepashanya abantu ababa ne mibele iisuma iyo wingatemwa ukukwata. Nga ulebika amano ku fyo bacita, kuti wasambililako ifingalenga wafikilisha ifyo wapanga ukucita.
“Mu cifulo ca kupanga fye ukuti ‘ndefwaya ukulabika sana amano ku fintu,’ kuti wapanga ukuti, ‘ndefwaya ukulabika sana amano ku fintu nga filya Jane acita. Alakonka inshita kabili alabika amano ku milimo iyo bamupeela.’”—E fyalandile Miriam.
Icishinka ca kuti: Nga wasala bwino uo wingalapashanya, ukalacita ifintu ifisuma.
Nga wasala bwino abo ulingile ukulapashanya kuti wafikilisha bwangu ifyo wapanga ukucita
Ifyo wingacita pa kuti ulesala bwino abo ulingile ukulapashanya
Pa kuti usale bwino abo ulingile ukulapashanya, kuti wacita ifyakonkapo.
Kuti wasala imibele imo iyo ulefwaya ukukwata, e lyo wafwaya uwakwata iyo ine imibele, uo wingalapashanya.
Kuti wasala uo ulefwaya ukulapashanya, e lyo wasalapo imibele imo iyo akwata iyo na iwe wingatemwa ukukwatako.
Pa mpela ya cino cipande pali apo wingalemba fimo ifingakwafwa ukusala bwino abo wingalapashanya.
Pa bo wingalapashanya kuti paba:
Abanobe. “Umunandi uo natemwa sana e o mfwaya ukulapashanya. Alabika amano ku bantu, nangu ca kuti nakwata ifya kucita ifingi. Mwaice pali ine, lelo alikwata imibele iyo ine nshakwata, kabili ici cilalenga ndefwaya ukulamupashanya.”—E fyalandile Miriam.
Abakalamba. Kuti walapashanya abafyashi bobe nelyo abakalamba bambi Inte sha kwa Yehova. “Ukwabula no kutwishika, ba mayo na batata baba pa bantu abo mpashanya. Balikwata imibele iisuma. Inshita shimo balalufyanya, lelo balitwalilila ukuba aba cishinka. Nga nakula, ndefwaya na ine abantu bakalelanda ifisuma pali ine.”—E fyalandile Annette.
Abalembwa mu Baibo. “Nalisala ababomfi ba kwa Yehova abengi abalembwa mu Baibo abo mfwaya ukulapashanya. Ndafwaya ukulapashanya Timote, Ruti, Yobo, Petro no mukashana umwina Israele. Aba bonse balikwete imibele iyo mfwaya ukukwata. Nga nasambilila ifingi pa bantu abalembwa mu Baibo, ndacetekela sana ukuti eko baali. Ndomfwa bwino sana nga ndeisambilisha ukubomfya icitabo citila Pashanyeni Icitetekelo Cabo e lyo na patila ‘Apali abo Wingapashanya’ mu citabo citila Ifipusho Abacaice Bepusha, ne Fyasuko Ifingabafwa ibuuku 1 na 2.”—E fyalandile Melinda.
Ifyo wingacita: Wilasala fye umuntu umo uo wingalapashanya. Umutumwa Paulo aebele Abena Kristu banankwe ati: “Mulelolekesha abale-enda ukulingana ne ca kumwenako cesu.”—Abena Filipi 3:17.
ICO UFWILE UKWISHIBA! Na iwe wine abantu bambi kuti balakupashanya! Baibo itila: “Ube ica kumwenako ku babombela Lesa kabili abamutetekela, mu milandile, mu myendele, mu kutemwa, mu citetekelo, na mu kusanguluka.”—1 Timote 4:12.
“Nangu ca kuti kwaliba imibele imo iyo ufwaisha ukukwata, abantu bambi kuti balakupashanya mu fyo ucitamo bwino. Tatwishiba abamona ifyo tucita, kabili ifyo tulanda kuti fyalenga abantu bambi ba-aluka.”—E fyalandile Kiana.