Bushe Baibolo Kuti Yangafwa Shani?—Ulubali 2: Ulecita Ifingalenga Watemwa Ukubelenga Baibolo

“Ukubelenga Baibolo kulomfwisha ubunang’ani nga ca kuti tawishibe bwino ifya kuibelenga.”—E fyalandile Will.

Bushe te kuti utemwe ukwishiba ifingakwafwa ukutemwa ukubelenga Baibolo? Ifili muli cino cipande fyalakwafwa.

• Ule-elenganya ifyalecitika

• Ulefwailisha

• Ifyo abanobe balanda

Ule-elenganya ifyalecitika

Ule-elenganya ukuti e ko wali ilyo ifyo ulebelengapo fyalecitika. Kuti wacita ifi:

1. Sala ilyashi ilyo ulefwaya ukubelengapo. Kuti wasala fimo ifyacitike nelyo ilyashi limo ilyaba mu mabuuku ya Mbila Nsuma, nelyo kuti waya pa jw.org/bem no kusalapo ilyashi limo pa malyashi ayaba mu kubelenga Baibolo uko babikamo ifiunda.

2. Belenga ilyashi. Kuti waibelengela nelyo kuti wabelenga mu kupongomoka ilyo uli na banobe nelyo balupwa obe. Umo kuti alebelenga apali kashimika e lyo bambi kuti balebelenga amashiwi ayo abantu balandile.

3. Eshako ne fi:

   • Kuti walenga ifyalecitika. Kuti walenga fye ifikope ifinono ukulangilila ifintu ifyo fyalecitika. Na kabili ulelembako utumashiwi utunono pali ifyo fine fikope pa kulondolola ifilecitika pa cikope.

   • Kuti walenga ifikope. Ku ca kumwenako, nga ulebelenga pa muntu umo uwali ne cishinka, kuti walengako ifikope fya mibele akwete no kufilinganya ku fikope fya mapaalo apokelele.

   • Kuti walemba ifyo ulebelenga nga filya bakalemba we lyashi balemba ilyashi. Ilyo lyashi kuti walilemba mu nshila ishalekanalekana kabili kuti wabikamo no “kwipusha” e kutila ukulemba kwati uleipusha abo ifyo ulebelengapo fyacitikile nelyo abamweneko ilyo fyalecitika.

   • Nga ca kuti umuntu umo mu lyashi ulebelenga tasalilepo bwino ifya kucita, tontonkanya pa fyo cali no kuba nga alisalile bwino. Ku ca kumwenako, kuti watontonkanyako pa fyacitikile Petro ilyo akeene Yesu. (Marko 14:66-72) Kuti wayipusha ati, bushe Petro nga acitile shani ilyo bantu balemwipusha?

   • Nga ulefwaya kuti waeshako ukulemba icangalo ukufuma mu lyashi lya mu Baibolo. Kuti wabikamo ne fyo abantu bengasambililako.—Abena Roma 15:4.

     

Ulefwailisha!

Nga ca kuti uletontonkanya sana pa fyalecitika mu fyebo ulebelenga, kuti wasangilapo icuma na cimbi pa lyashi ulebelenga. Limo ishiwi fye limo nelyo yabili kuti yalenga wasangilapo icuma na cimbi icacindama.

Ku ca kumwenako linganya ifyaba pali Mateo 28:7 ku fyaba pali Marko 16:7.

• Cinshi Marko alembeele ukuti Yesu ali no kumonekela ku basambi bakwe “na kuli Petro”?

• Ifingakwafwa ukusanga icasuko: Marko tamweneko ilyo ifi fyonse fyalecitika, uwamwebele ifi fyebo ni Petro.

• Ifyo wingasambililako: Mulandu nshi nalimo Petro aumfwilile bwino ilyo aishibe ukuti Yesu alefwaya ukumumona na kabili? (Marko 14:66-72) Bushe Yesu alangile shani ukuti ali ni cibusa wa kwa Petro? Kuti wapashanya shani Yesu?

Ilyo ulebelenga Baibolo nga ca kuti ule-enganya ifyalecitika kabili ulefwailapo ne fyebo na fimbi, ukalaumfwa bwino ilyo ulebelenga Baibolo!