Finshi Baibolo ilanda pa kupeela?
Icasuko ca mu Baibolo
Baibolo itukoselesha ukuti tuleitemenwa ukupeelako abantu ifyo twakwata ukufuma pa nshi ya mutima. Baibolo ilanda ukuti nga tulepeela ukufuma pa nshi ya mutima, uo tulepeela alanonkelamo kabili na ifwe bene tulanonkelamo. (Amapinda 11:25; Luka 6:38) Yesu atile: “Mwaba insansa ishingi mu kupeela ukucila ishaba mu kupokelela.”—Imilimo 20:35.
Finshi tulingile ukucita ilyo tulepeela pa kuti Lesa asekelela?
Lesa alasekelela nga ca kuti tuleitemenwa ukupeela. Baibolo ilanda ukuti: “Onse acite umo apangile mu mutima wakwe, te kupeela na mutimako nangu mu kupatikishiwa, pantu Lesa atemwa uupeela ne nsansa.”—2 Abena Korinti 9:7.
Ukupeela ukufuma pa nshi ya mutima kwaba lubali lwa “mipepele” iyo Lesa atemwa. (Yakobo 1:27) Umuntu uwafwilisha abalekabila fimo alabombela pamo na Lesa, kabili ninshi aleyashimisha Yehova. (Amapinda 19:17) Baibolo ilanda ukuti Lesa umwine e ukabwesesha abafwilisha abantu banabo.—Luka 14:12-14.
Finshi fingalenga Lesa ukukanasekelela ilyo tulepeela?
Nga ca kuti tulepeela pa mulandu fye wakufwaya ukuisekesha. Moneni fimo ifingalenga Lesa ukukanasekelela ilyo tulepeela:
Nga ca kuti tulepeela pa kuti fye abantu batucindike.—Mateo 6:2.
Nga ca kuti tulepeela pa kuti na ifwe bakatupeeleko fimo.—Luka 14:12-14.
Nga ca kuti tulepeela pa kuti Lesa akatupusushe.—Amalumbo 49:6, 7.
Nga ca kuti tulepeela ku kutungilila ifyo Lesa apata. Ku ca kumwenako, te kuti cibe bwino ukupeela umuntu indalama sha kubomfya pa kuteya ifyangalo fya kushitikapo, indalama sha kushitamo imiti yabindwa, nelyo isha kushitamo ubwalwa pa kuti akolwe. (1 Abena Korinti 6:9, 10; 2 Abena Korinti 7:1) Na kabili te kuti cibe bwino ukulapeela umuntu uushifwaya ukubomba.—2 Abena Tesalonika 3:10.
Nga ca kuti twabika sana amano ku kupeela bambi ica kuti twalekelesha no lupwa lwesu. Baibolo ilanda ukuti umutwe wa lupwa afwile ukupeela aba mu lupwa lwakwe ifyo bakabila. (1 Timote 5:8) Te kuti cibe bwino nga ca kuti umutwe wa lupwa alepeela sana bambi ica kuti aba mu lupwa lwakwe batendeka ukucula. Yesu na o alikalipile abalekaana ukusakamana abafyashi babo abakalamba pantu balelanda ukuti fyonse ifyo bakwete fyali “bupe ubwapeelwa kuli Lesa.”—Marko 7:9-13.