UBULONDOLOSHI BWA FIKOMO FYA MU BAIBOLO
Mateo 6:33—“Kutala Mulefwayo Bufumu Bwakwa Lesa”
“E ico, intanshi mulefwaya ubufumu no bulungami bwakwe, na fyonse ifi ifyo mukabila akamupeela.”—Amalumbo 83:18, Amalembo ya Calo Cipya.
“Kanshi kutala mulefwayo bufumu bwakwa Lesa no kulungika ukwali, elyo nefyo fyonse bakamubiikilapo fye.”—Mateo 6:33, Baibolo ya Diocese of mbala.
Umwalola Amashiwi Yaba Pali Mateo 6:33
Ubufumu bwa kwa Lesa buteko bwa ku muulu ubukalenga ukufwaya kwa kwa Lesa ukucitwa pe sonde. (Mateo 6:9, 10) Ukufwaya Ubufumu intanshi calola mu kuti, umuntu afwile ukulacita ifintu ifilanga ukuti ubufumu e bwacindama mu bumi bwakwe.a Ici cilolele na mu kuti umuntu alingile ukulafwaisha sana ukulasambilila pali ubu Bufumu e lyo no kulaebako abantu bambi pa fisuma ifyo bukacita. (Mateo 24:14) Na kabili, nga ca kuti tulefwaya Ubufumu intanshi, twakulapepa ukuti bwise.—Luka 11:2.
Ubulungami bwa kwa Lesa cipilibula ukwishiba ifyo Lesa amona ukuti fisuma nelyo ifibi. (Amalumbo 119:172) Kanshi ukufwaya ubulungami bwa kwa Lesa kulakonka amafunde yakwe ayalanda pa mibele iisuma ayalenga ukuti ifintu filetuwamina.—Esaya 48:17.
Amashiwi ya kuti fyonse ifi ifyo mukabila akamupeela, yaba bulayo bwa kwa Lesa ubwa kuti akulasakamana abafwaya Ubufumu intanshi no bulungami bwakwe.—Mateo 6:31, 32.
Amashiwi Yambi Ayaba pa Fikomo Fimbi Pali Mateo Icipandwa 6:33
Yesu alandile aya amashiwi mu Lyashi lya pa Lupili ilyalembwa muli Mateo icipandwa 5 ukufika ku cipandwa 7. Abengi abali mwi bumba ilyo Yesu alelandako bali bapiina. Nalimo baletontonkanya ukuti balingile ukubika sana amano ku kufwaya umwa kwikalila, icali no kulenga balefilwa ukukwata inshita ya kufwaya Ubufumu. Lelo Yesu abakoseleshe ukumona ifyo Lesa asakamana ifilimwa ne nama. Lesa alilaya ukuti akulasakamana bonse abafwaya Ubufumu bwakwe intanshi.—Mateo 6:25-30.
Ubufi Ubo Abantu Balanda Pali Mateo 6:33
Ubufi: Umuntu nga alefwaya Ubufumu akakwata indalama ishingi.
Icine: Yesu atile bonse abafwaya Ubufumu bwa kwa Lesa intanshi bakakwata ifyo bakabila pamo nga, ifya kulya ne fya kufwala. (Mateo 6:25, 31, 32) Kanshi Yesu taloseshe mu kuti abantu abafwaya Ubufumu intanshi bakakwata ifintu ifingi ne fyo bashikabila sana mu bumi, kabili taloseshe na mu kuti umuntu nga akwata ifyuma ninshi cilepilibula ukuti Lesa alimupaala. Na kuba Yesu alisokele abalekutika kuli e na ukukanafwaisha ukuba ne fyuma, pantu ukucita ifi, kuti kwalenga cabakosela ukufwaya Ubufumu intanshi. (Mateo 6:19, 20, 24) Umutumwa Paulo alebombesha ukutungilila Ubufumu bwa kwa Lesa, lelo inshita shimo talekwata fyonse ifyo alekabila. Nga filya fine Yesu acitile, nao wine alisokele abantu ububi bwaba mu kufwaisha ifyuma.—Abena Filipi 4:11, 12; 1 Timote 6:6-10.
Ubufi: Abena Kristu tabafwile ukubomba incito pa kusanga umwakulila.
Icine: Baibolo itila Abena Kristu bafwile ukubomba incito pa kuisakamana no kusakamana indupwa shabo. (1 Abena Tesalonika 4:11, 12; 2 Abena Tesalonika 3:10; 1 Timote 5:8) Yesu tatile abasambi bakwe bafwile ukulafwaya Ubufumu epela, lelo atile bafwile ukulafwaya Ubufumu intanshi.
Bonse abafwaya Ubufumu bwa kwa Lesa intanshi kabili balaitemenwa no kubomba incito pa kuti baleisakama, bafwile no kucetekela ukuti Lesa akulabafwa ukukwata ifyo bakabila.—1 Timote 6:17-19.
a Ishiwi lya kuti “mulefwaya” lyafuma kwi shiwi lya ciGriki ilipilibula ukutwalilila ukucita icintu cimo. Kabili ili ishiwi kuti lyapilibula no kuti “ukutwalilila ukufwaya.” Kanshi tufwile ukutwalilila ukufwaya Ubufumu.