Inshila ka Kubwelelamo ku Paradise

PA MULANDU wa kufulukisha Paradise ukwa muntu no kwesha kukalamba no kunono ukwa kubwesha yene, kuti watila ino nshita isonde kuti lyaba paradise mwine mwine. Lelo te fyo lyaba.

Mu cifulo ca ico, umuntunse atangishako ubufunushi, ubo ilingi line ubulama ukwabula ukusakamana ne fyashingulukako ne fya mweo fyabamo ifyalekanalekana. Pa kusumino kuti icuma cili no kucimfya, abantu abengi balileka ukusubila mu kuti lino isonde kasuba kamo likasangulwa ukuba paradise wapala Edene. Ukucila, balolesha ku bumi bwa pa numa ya mfwa mu muulu ukuti e subilo lyeka fye ilya Paradise. Ukutontonkanya kwa musango yu kupilibula, intanshi, ukuti ukufulukisha kwesu ukwa buntunse ukwa Edene takwakatale akwisa ne ca cibili, ukuti Lesa alilekelesha uno planeti ukuti onaulwe ku bupumbu bwa muntunse no bufunushi. Bushe e fyo caba? Bushe cinshi cikacitika ku ntanshi? Kabili bushe iyo nshita ya ku ntanshi ni kwi ikabela?

Paradise—Bushe ni ku Muulu Atemwa pe Sonde?

Mupepi ne myaka yapitapo 2,000, ilyo alelanda ku mupupu walapile aapoopelwe lubali na wene, Yesu Kristu atile: “Uli no kuba na ine mu Paradise.” (Luka 23:43, NW) Bushe Yesu apilibwile ukuti ulya mupupu ali no kuya ku muulu nankwe? Iyo.

Ulya ncitatubi nga tatontonkenyepo ne fyo. Mulandu nshi? Pantu napamo alibeleshenye ne mikululo mu Amalembo ya ciHebere, ayaliko pali ilya nshita, pamo ngo lubali lwa kubalilapo ulwa Ilumbo 37:29 apatila: “Abalungama bakapyaninine calo.” Yesu asambilishe icine cimo cine, ukubilisha ukuti: “Balishuka abafuuka; pantu bakakwate calo.” (Mateo 5:5) Ili lembo lilomfwana bwino ne liitwa mu munsaunte ati Ipepo lya kwa Shikulu, ililondolola ati: “Ukufwaya kwenu kucitwe pano nse nga mu muulu.”—Mateo 6:9, 10.

Baibolo isambilisha ukuti Lesa abumbile icalo ukuti abantunse baleikalapo, te muulu iyo. Icebo cakwe cilondolola ukuti “[icalo] tacilengele cimfulumfulu,” lelo “acibumbile ku kwikalwamo.” (Esaya 45:18) Pa butali bwaba shani? “Mwatekele pano isonde pa fya kulimbapo fya pako ukuti pekatelentenshiwa umuyayaya umuyayaya.” (Ilumbo 104:5) Ee, “icalo caiminina umuyayaya.”—Lukala Milandu 1:4.

Imifwaile ya kwa Lesa ya kuti icinabwingi abalemubombela bakalenge lino isonde ukuba umushi wabo pe na pe. Moneni cintu Icebo ca kwa Lesa, Baibolo, cilandapo pa lwa ici. Ilumbo 37:11 lisobela ukuti: “Abalanda bakapyaninine calo, no kuilemeno bwingi bwa mutende.” Pa butali bwaba shani? Ilumbo 37:29 litila: “Abalungama bakapyaninine calo, no kwikalamo inshiku pe.” Pali ilya nshita ilembo likafikilishiwa ni lilya ilibilisha ati: “Ni mwe [Lesa] mufumbatule minwe yenu, no kwikusha conse ica mweo ifyo cilefwaya,” e kuti ukupeela ifyo cilefwaya ifyumfwana no kufwaya kwa kwa Lesa.—Ilumbo 145:16.

Lelo ni shani pa lwa bashifwaya ukucita ukufwaya kwa kwa Lesa? Amapinda 2:21, 22 yabilisha ati: “Abatambalala bakekala mu calo, na ba mpomfu bakashalamo; Lelo ababifi bakaputulwa mu calo, na bafutika bakafumpulwamo.”

Paradise Abweshiwa

Nomba line fye, Lesa akabomfya amapingushi yakwe ukulwisha cino calo icibifi. (Mateo 24:3-14; 2 Timote 3:1-5, 13) Lelo Lesa akabakilila “ibumba likalamba” ilya bantu ukupula mu bonaushi buleisa ukwingila mu calo cipya ico akapanga.—Ukusokolola 7:9-17.

Lyene, Lesa akatungulula umulimo wa kulenga insansa uyo abatekwa bakwe abantunse bakakwata uwa kwalula isonde lyonse ukuba umushi wa paradise uwa kwikalamo umutundu wa muntu. Baibolo yalaya ati: “Fisekelele amatololo ne mpanga iyaumisha, ifiswebebe fyange no kupuuka nga cananika . . . Pantu mu matololo e mwalepuka mwatula amenshi, ne milonga yafuma mu fiswebebe.”—Esaya 35:1, 6.

Muli ulya Paradise ukalatanunuka, tamwakabe kabili insala, ubupiina, amayanda ya babusu, ababulwa amayanda, nelyo incende shaisulamo imisoka. “[Mukaba] ukupaka kwa ngano mu calo.” (Ilumbo 72:16) “Umuti wa mpanga ukapeele fisabo fya uko, no mushili ukafumyo bulimi bwa uko.” (Esekiele 34:27) “Bakakuula amayanda no kwikalamo, bakalima na mabala ya myangashi no kulye fisabo fya yako; tabakakuule na bambi abekalamo, tabakalime na bambi abalyako.” (Esaya 65:21, 22) “Bakekalo muntu onse mwi samba lya mwangashi wakwe, kabili mwi samba lya mukunyu wakwe, tapakabe na wa kututumya.”—Mika 4:4.

Umulandu Bamo Baila ku Muulu

Abengi napamo kuti basumina ukuti balafulukisha paradise wa pe sonde. Ca cifyalilwa ico, pantu Lesa tatalile alimba mu muntu ukufulukisha umuulu; te kuti belenganye fye no kwelenganya fintu ubumi bwa ku muulu bwaba. Ku ca kumwenako, ilyo alelanshanya na minista wa mwi calici lya Church of England, Pat, nangu ca kuti aali uwaipeelesha uwa mu calici, atile: “Nshatala ntontonkanyapo ulwa kuya ku muulu. Nshilefwaya nkayeko, e lyo nangu naya cinshi nkayacitako?”—Linganyeniko Ilumbo 115:16.

Ca cine, Baibolo isambilisha ukuti impendwa fye iyapimwa iya bantunse, 144,000, e baya ku muulu. (Ukusokolola 14:1, 4) Na kabili ilondolola umulandu bailako ati: “Mwabacita kuli Lesa wesu ukube shamfumu kabili bashimapepo, kabili bakaba no bufumu pe sonde.” (Ukusokolola 5:9, 10) Capamo ne Mfumu yabo, Yesu Kristu, aba bapango “bufumu,” ubuteko bupya ubwe sonde ubukalateka ukufuma mu muulu, ubo Abena Kristu bapepela. Ubu buteko bukalaangalila ukupindululwa kwakumanina ukwe sonde no mutundu wa muntu.—Daniele 2:44; 2 Petro 3:13.

Nangu cibe fyo, apantu ukufwaisha kwa kwikala ku muulu te kwa cifyalilwa ku bantunse, imibombele yaibela iya mupashi wa kwa Lesa ‘ilashimiko bunte’ kuli ba 144,000 pa kuti bengeshiba ubu “bwite bwa mu muulu” ubwaibela. (Abena Roma 8:16, 17; Abena Filipi 3:14) Nangu ni fyo, ukwabulo kutwishika, takwaba imibombele ya musango yo iya mupashi wa mushilo iikabilwa ku bashala aba mutundu wa muntu pantu umushi wabo uwa ciyayaya uli no kuba pe sonde ilikaba paradise.

Paradise wa ku Mupashi Apekanya Inshila

Ni shani fintu umo engafikapo ukwisaikala ku ciyayaya muli Paradise wa pe sonde? “Awe uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu.” (Yohane 17:3) Pa kwampanya ukubishanya kwa mutende ukwa bantunse ku kwishiba Lesa, Esaya 11:9 alondololo kuti: “Tafyakacite bubi, kabili tafyakonaule, mu lupili lwandi lwa mushilo monse; pantu icalo cikesulamo ukwishiba Yehova, ifyo amenshi yafimba pali bemba.”—Linganyeniko Esaya 48:18.

Uku kwishiba, kwena, te kwishiba fye kwa ku mutwe. Kulasonga ubuntu bwa umo kabili kulakusha imibele ya bukapepa, pamo ngo “kutemwa, ukusekelela, umutende, ukutekanya, icongwe, ubusuma, icishinka, ukunakilila, ukuteko mutima.” (Abena Galatia 5:22, 23) Inte sha kwa Yehova balatukuta ukulundulula iyi mibele, na muli fyo, nelyo fye ni nomba, balaipakisha paradise wa ku mupashi uutuntulu.—Esaya 65:13, 14.

Fintu imibele yabo iya ku mupashi yapusana ne ya calo, icileya fye ciletotobela mu kucilamo mu kubulwa bukapepa no kubotelela! Nangu cibe fyo, nomba line fye, ino micitile ya fintu iibifi ikonaulwa kuli Lesa. Pali ino nshita, Inte sha kwa Yehova shilemulaalika ukuyamona—ee, ukubebeta—paradise wa ku mupashi uo shiipakisha. Imweneni mwe bene ukuti ino ine nshita Yesu, Imfumu ishimoneka iya ku muulu, mu mutalalila iletungulula abali no kwisaba abekashi ba cilya calo cipya ukuya mu nshila ya kamfyemfye iya kuli Paradise wa pe sonde no bumi bwa ciyayaya!—Mateo 7:13, 14; Ukusokolola 7:17; 21:3, 4.

[Icikope pe bula 8, 9]

Abakapusuka impela ya cino calo bakaipakisha ukusangulako lino isonde ukuba paradise