Ukwipaila mwi Shina lya kwa Lesa

KU ULEMBA LOLENI! MU FRANCE

“TWIPAILA MWI SHINA LYA KWA LESA, KABILI TUKATWALILILA UKWIPAYA”

PE SAMBA lya mutwe wambwilwe pa muulu, International Herald Tribune yatile: “Uno mwanda wa myaka, uyo abenekela ifisuma inshita shimo shimo batemwa ukulanguluka ngo wabuutushiwa, walibiifiwa ku cibelesho ca kutiinya ica bantu ukwipayana mwi shina lya kwa Lesa ukupala imyanda ya myaka iyautangilileko.”

Kalemba alandile pa fya kumwenako fya kwipayaula kwalengwa ne mipepele mu myanda ya myaka iyabalilepo. Lyene, ukulanda pa lwa kwipayaula ukwacitika mu mwanda wa myaka uwalenga 20, asondwelele ukuti: “Cintu tumona kutwalilila kwa kutiinya ukwa kukanasuminisha ukuilumbulwila ukwa bukatu ukwa myanda ya myaka iyapita. Ukupepa na nomba kwaba e kabepesho ka lukaakala lwa bupolitiki no kucandila impanga.”

Bamo baleesha ukusanga imilandu isuma iya kulwila inkondo sha mipepele isha lelo ukupitila mu kutila Lesa alisuminishe abena Israele ba pa kale ukwipaya abena Kanaani. Lelo, uyo te mulandu abaitunga ukuba Abena Kristu bengalabalamwina inkondo ilelo. Mulandu nshi? Pantu abena Israele balikambishiwe mu kulungatika na Lesa ukumubombelako amapingushi yakwe ayalungama aya kulwisha abaalepepa ifibanda, abo ukupepa kwabo kwasanshishemo bucisenene bwa bwamba no koca abana babo nga malambo.—Amalango 7:1-5; 2 Imilandu 28:3.

Inshila sha cipesha amano isho Lesa aleyafwilamo lulya luko ukucimfya yaba bushinino bwa kuti inkondo sha Israele wa pa kale tashali kukansana kwa fye. Ku ca kumwenako, abena Israele ba pa kale inshita imo bakambishiwe ukubomfya intandala, imitondo, ne fyenge—ifishaba filwilo fya mu nkondo ya cine cine nangu panono! Pa kashita kambi bakemba balibikilwe ku ntanshi ya bashilika ba bena Israele abalolenkene no mulalo wakulisha uwa bashilika balesansa aba nko shafulilako.—Abapingushi 7:17-22; 2 Imilandu 20:10-26.

Ukulundapo, inshita shimo lintu abena Israele baleingila mu nkondo isho bashakambishiwe na Lesa, tabalepaalwa na Lesa kabili balecimfiwa. (Amalango 28:15, 25; Abapingushi 2:11-14; 1 Samwele 4:1-3, 10, 11) Kanshi, inkondo sha kwa Israele te kuti shiloshiweko ukuti e shalenga inkondo shibalamunwa mu Kristendomu ukuba ishalinga.

Mwi shina lya mipepele, abaHindu balilwishanya na baShilamu na baSikh; abaShilamu ba ciShia balilwa na baShilamu baSunni; e lyo mu Sri Lanka, abaBuddha na baHindu balipayana.

Inkondo shalangilile bwino bwino ukwipaila mwi shina lya kwa Lesa ni nkondo shalwikwe mu France mu mwanda wa myaka uwalenga 16. Inshita shafulishamo ukusuumyo mulopa mu lyashi lya kale ilya mipepele ya ciRoma Katolika ne ya ciProtestanti ku Bulaya ni nshita sha ishi nkondo. Natubebete ishi nkondo, no kumona ifyo twingasambililako.

[Abatusuminishe Ukubomfya Icikope pe bula 3]

U.S. Army Photo