Cinshi Mukasosa ku MuShilamu?
1 Bushe mwalitala amushimikilapo ku muShilamu? Nga ca kuti mwalishimikilapo, nakalimo mwalishiba ukuti abaShilamu balisumina sana muli Lesa. Nangu cibe fyo, finono fye baishiba pa lwa Paradise wa pe sonde uyo wasobelwe na bakasesema ba kwa Yehova, kabili tulingile ukubashimikilako pa lwa ilyo subilo. (1 Tim. 2:3, 4) Ifyebo fyakonkapo fyalamwafwilisha ukushimikila bwino kuli bene.
2 AbaShilamu basumina muli Allah, nelyo Lesa, kabili basumina ukuti Muḥammad ni kasesema wa kwa Lesa. Icitabo cabo icashila ni Koran, kabili imipepele yabo itwa ukuti Islam, icalola mu kuti “ukunakila.” Koran ilondolola ukuti ukubepa ubufi no kupepa utulubi fyalilubana, ukuti kwaba fye Lesa umo, no kuti taba ulubali lwa buLesa Butatu. Na kabili, isambilisha ukuti umweo taufwa, ku helo kwaliba umulilo, no kuti paradise aba ku muulu. AbaShilamu basumina ukuti Baibolo Cebo ca kwa Lesa lelo batila yalyalulwa, ilintu Koran, iyo na nomba icili mu lulimi lwa iko ulwa kutendekelako, tayateululwa.
3 Beni Aba Cikuuku, Abashilimuka, Kabili Abeluka Bwangu: Pa kutendeka ukulanshanya no muShilamu, beni aba cikuuku nga nshi kabili abashilimuka. (Amapi. 25:15) Ibukisheni ukuti ifisumino fya baShilamu fyalipampamikwa nga nshi no kuti ubwingi ubwa fyene fyasambililwa fye ukupitila mu kusungila. E co, bena tababelesha ukupelulula pa fisambilisho fya mipepele no kuimwena abene icaba ukufwaya kwa kwa Lesa. (Rom. 12:2) Pa kwafwilisha abaShilamu, ukutekanya no mucetekanya filafwaikwa.—1 Kor. 9:19-23.
4 Sengaukeni ukulanda amashiwi ayengalenga umuShilamu ukutontonkanya ukuti mwaba mu Kristendomu. Mulekeni eshibe bwino ukuti te imwe baKatolika nelyo ababa mu mipepele ya ciProtestanti, lelo ukuti namuibelako. Mwebeni ukuti Baibolo Citabo ca kwa Lesa. Apantu abaShilamu tabafwaya ukumfwa nangu panono amashiwi ya kuti “Umwana wa kwa Lesa,” ilingi line cilawamapo ukukanalanda ayo mashiwi nelyo fye ukukanalanshanya pali uyu mulandu ukufikila ukulunduluka kwakwe ukwa ku mupashi kwamoneka. Nangu cibe fyo, kuti mwalanda pa lwa kwa Yesu, ukusoso kuti ni kasesema nelyo inkombe. Te kwesha ukukansana nankwe. Nga mwamona ukuti atendeka ukufulwa, ilyo line fye fumenipo mu mucinshi.
5 Caliwamishapo ukulanda fye no muntu umo ukucila ibumba. Ilingi line, calitashiwa abanakashi ukushimikila ku banakashi banabo, na baume, ku baume banabo. Kwena, te lyonse ici cibe fyo, lelo mufwile ukuba abashilimuka nga nshi. Na kabili, abaShilamu abengi balakalifiwa bwangu ilyo bamona imifwalile ne misakwile ya banakashi iyo bamona nge iishayana. Bankashi balingile ukuba abaibukila pa lwa ici.—1 Kor. 10:31-33.
6 Ifyo Mwingalandapo: Landeni pa lwa bukulu bwa kwa Lesa no kutemwa kwakwe. Mwishimunuka ukulondolola ukuti mwasumina icine, ukuti kwaba fye Lesa umo (te batatu muli umo), no kuti ukupepa utulubi kwalibipa. Landeni pa lwa bubifi buli mu calo ilelo pamo nge nkondo, ifimfulunganya, ulupato lwa mushobo, no bumbimunda bwa bantu abengi abaya ku mapepo.
7 Broshuwa uutila The Guidance of God—Our Way to Paradise akamulenga ukumfwikisha imitwe mwingabomfya pa kutendeka ukulanshanya na baShilamu. Yalembwa mu nshila ingacebusha abaShilamu abekala mu ncende umo bengayumfwa abantungwa ukusambilila Baibolo.
8 Ku kulangilila, nalimo kuti mwatila:
◼ “Ndefwaisha sana ukulanda ku baShilamu. Nalebelenga fimo pa lwa mipepele yenu kabili naishilesanga ukuti abaShilamu basumina muli Lesa umo uwa cine na muli bakasesema bonse. [Lekeni aasukepo.] Ndefwaya ukulanda na imwe pa lwa kusesema kwa kale ukwasobele ukuti isonde likaalulwa ukuba paradise. Lekeni mubelengeleko ico kasesema alembele. [Belengeni Esaya 11: 6-9.] Uku kusesema kunenga ukutontonkanya pa mashiwi yasangwa muli Koran ayayambwilwe pano muli uyu broshuwa.” Kupukuleni pe bula 9 muli broshuwa wa Guidance of God, no kubelenga amashiwi yambwilwe ayali mu filembo fyafiitisha, ayalanda pa balungama ukuti bali no kupyana icalo. Nga ca kuti atemwa, twalilileni ukulanshanya amaparagarafu 7 ukufika ku 9 pe bula likonkelepo. Mushileni broshuwa no kutantika ilyo mukabwelelako. Ku fyo mwingatendeka ukulanshanya na kumbi, moneni Ubutumikishi Bwesu Ubwa Bufumu ubwa February 1998, ibula 6, paragarafu 20.
9 Lintu mulelaalika umuntu ukumona ifyaba muli broshuwa wa Guidance of God, caliwamishapo ukusosa fye ukuti ukulanshanya, ukucila ukusosa ukuti lisambililo lya Baibolo. Umusambi akaba uwaipekanya ukusambilila broshuwa wa Cintu Lesa Afwaya nelyo icitabo ca Ukwishiba lintu mwapwisha ukulanshanya nankwe broshuwa wa Guidance of God. Impapulo shimbi ishalembelwa fye abaShilamu ni trakiti utila How to Find the Road to Paradise na katabo katila The Time for True Submission to God.
10 Ifi ifyebo twasambilila nomba pa lwa fisumino fya baShilamu ne fingabakalifya, filetwafwilisha ukumona umusango wa mpapulo tulingile ukushalika ku baShilamu kabili ne nshila tulingile ukushimikilamo kuli bene. Shi Yehova natwalilile ukupaala ukubombesha kwesu mu kwafwilisha abantu ba misango na misango ukulilila kwi shina lyakwe no kupusuka.—Imil. 2:21.