Pashanyeni Yehova Ukupitila mu Kusakamana Bambi mu Cine Cine
1 Yehova aba e ca kumwenako cakulisha ica umo uusakamana bambi mu cine cine. Pamo nga Mulopwe wa Kubumbwa Konse, aliba uwaibukila apakalamba ku kukabila kwa bubumbo bwakwe ubwa buntunse. (1 Pet. 5:7) Yesu akoseleshe abakonshi bakwe ukuba ne mibele ya kwa Wishi, uulenga akasuba ukutula ne mfula ukulokela abalungama na bashalungama. (Mat. 5:45) Kuti mwapashanya Yehova pa kwangwako kuli bambi mu cine cine—ukuba abaipekanya ukushimikilako ubukombe bwa Bufumu kuli bonse abo mukumanya. Pa kuba ababeleshanya mu kukumanina na mabroshuwa yakabomfiwa mu butumikishi mu July, mukaba na maka ya kwafwilisha bambi lwa ku mupashi. Imitubululo ikonkelepo ilepeela imfundo shimo ishikumine ku fintu mwingapekanya ukutandala kwa kubalilapo kabili lyene ukukonkelela ubuseko mu kuba ne fipempu fya kubwelelamo ifya pa nshita yalinga.
2 Lintu muletambika broshuwa wa “Bushe Lesa mu Cituntulu Alatusakamana?” kuti mwatila:
◼ “Bushe mwalibala amwipushapo umulandu Lesa asuminishisha abantunse ukucula nga ca kuti mu cituntulu alabasakamana? [Lekeni basuke.] Uyu broshuwa alepayanya icasuko ca kwikusha kuli ici cipusho no kulangilila ukuti Lesa alilaya ukuwamya ubonaushi bonse ubo umuntu ayonaulako no konaula umushi wakwe isonde.” Belengeni paragrafu 23 pe bula 27. Langilileni icikope cili pe samba lya paragrafu, kabili belengeni Ilumbo 145:16 mu paragrafu 22. Tambikeni broshuwa. Nga apokelelwa, ipusheni icipusho ico cingasukwa pa kutandala kukonkelepo, pamo nga: “Bushe kuti mwatemwa ukwishiba fintu Lesa akapwishishisha imifwaile yakwe iya kuletela umutundu wa muntu amapaalo no kwalula isonde ukuba paradise?”
3 Lintu mulebwelela kuli abo mwashalikeko broshuwa wa “Bushe Lesa mu Cituntulu Alatusakamana?” kuti mwatendeka ukulanshanya na kumbi muli iyi nshila:
◼ “Lintu namutandalile inshita yafumako, twalanshenye ukuti Lesa mu cine cine alatusakamana no kuti caba mifwaile yakwe ukuwamya ubonaushi bonse ubo umuntu ayonaulako no konaula umushi wakwe uwa pe sonde.” Isuleni broshuwa pa cikope cili pa mabula 2-3 kabili mutile: “Mu kulanshanya kwesu twalekelesheko ne cipusho ca kuti, Ni shani fintu Lesa akapwishishisha imifwaile yakwe iya kuletela umutundu wa muntu amapaalo no kwalula isonde ukuba paradise? Muletipo shani?” [Lekeni asuke.] Isuleni pe bula 17, no kubelenga paragrafu 2 na Daniele 2:44. Pa numa ya ico, belengeni paragrafu 12 pe bula 18. Ipusheni mwine ŋanda nga engatemwa ukuti mulanshanye Ulubali 9 muli broshuwa. Nga atemwa, sambilileni na wene.
4 Pano palipo inshila iyo ingabomfiwa ku kutambika broshuwa wa “Ilyo Untu Watemwa Afwa.” Langisheni inkupo ya uko no kusoso kuti:
◼ “Ilelo tuletambika uyu broshuwa uwaleta icisansamushi ne subilo ku mamilioni ya bantu abalufya abatemwikwa babo mu mfwa. Bushe mwalibala amwipushapo pa lwe subilo lyabako ku bafwa? [Lekeni asuke.] Baibolo mu kumfwika ilondolola ubulayo bwa kwa Lesa ubwa kubuuka.” Belengeni Yohane 5:28, 29. Isuleni broshuwa no kulanda pa fishinka fili mu paragrafu wa kulekelesha pe bula 28 na paragrafu wa kubalilapo pe bula 31. Langisheni ifikope filipo. Tambikeni broshuwa. Kuti mwapekanya inshila ya ku cipempu ca kubwelelamo pa kwipusha ukuti, “Ni shani fintu twingashininkisha ukuti imfwa ikasuka ikafumishiwepo umupwilapo?”
5 Uko mwashalike broshuwa wa “Ilyo Untu Watemwa Afwa,” nakalimo kuti mwafwaya ukulandila muli iyi nshila ku cipempu ca kubwelelamo:
◼ “Lintu twalanshenye lilya naishile, twalandile pe subilo lyawamisha ilya kubuuka. Broshuwa untu namushilile alondolola umulandu twingashininkishisha ukuti imfwa ikasuka ikafumishiwepo umupwilapo. Bushe tamwasangile amalayo ya kwa Lesa ukuba aya kusansamusha kabili aya kukoselesha?” [Lekeni asuke.] Lyene alukileni kwi bula 31 ilya broshuwa, kabili belengeni paragrafu wa cibili no wa citatu, capamo na Ukusokolola 21:1-4. Komaileni pa cilolelo twakwata ica kuipakisha ubumi ukwabula ukufwapo. Ukushintilila pa buseko umuntu akwete ne mibele pali iyo nshita, kuti mwatambika isambililo lya Baibolo mu citabo ca Ukwishiba nelyo ipusheni icipusho na cimbi ku kwisula inshila ku cipempu ca kubwelelamo na cimbi.
6 Nakalimo kuti mwasosa ifikonkelepo lintu muletambika broshuwa wa “Cinshi Caba Imifwaile ya Bumi—Ni Shani Fintu Wingaisanga?”:
◼ “Abantu abengi balitwishika icaba imifwaile ya bumi. Baliipusha abene ukuti: ‘Mulandu nshi nabelapo? Ni kwi uko ndeya? Cikaba shani ku nshita ya ku ntanshi?’ Ni kwi muletontonkanya twingasanga ifyasuko? [Lekeni asuke.] Moneni cintu Baibolo isosa. [Belengeni Ilumbo 36:9.] Bushe tacilimo kupelulula ukutila Kabumba wa muntu ewingalondolola umulandu twabelapo? [Lekeni asuke.] Uyu broshuwa alangilila imifwaile yawamisha intu Lesa atukwatila.” Alukileni ku mabula 20-1, belengeni amashiwi yalelondolola icikope, kabili landeni pa cikope; lyene tambikeni broshuwa. Nga ca kuti basumina, ipusheni ukuti: “Ni shani fintu twingashininkisha ukuti Lesa acili alikwata imifwaile ya kuti abantunse bekale kuli pe na pe muli Paradise pe sonde?” Umfwaneni inshita ya kubwelelako.
7 Nga ca kuti broshuwa wa “Cinshi Caba Imifwaile ya Bumi—Ni Shani Fintu Wingaisanga?” ashalikwa, kuti mwasosa icapala ifi lintu mwabwelelako:
◼ “Lintu natandele umuku wafumako, naliipakishe mu cine cine ukulanshanya na imwe imimwene ya Baibolo iya kuti ubumi bwa muntunse mu cituntulu bwalikwata imifwaile.” Langisheni icikope pe bula 31 no kwipusha ukuti, “Ni shani fintu twingashininkisha ukuti Lesa acili alikwata imifwaile ya kuti abantunse bekale kuli pe na pe muli Paradise pe sonde?” Belengeni paragrafu 3 pe bula 20. Lanshanyeni ifishinka pe samba lya kamutwe kanono akaleti, “Icili Mifwaile ya kwa Lesa,” pe bula 21. Alukileni kwi bula lya ku numa ya broshuwa, kabili belengeni pa lwa kutambika isambililo lya Baibolo ilya mu ŋanda ilya pa fye. Tambikeni icitabo ca Ukwishiba, kabili mwebeni fyo kuti mwamulangilila fintu tucibomfya pamo nga ica kwaafwa ukusambilila Baibolo.
8 Ubutumikishi bwesu bulingile ukulangisha ubuseko bwafumaluka ubo twakwata mu kwaafwa aba mitima ya bufumacumi “ukufika ku kwishibe Cine.” (1 Tim. 2:4) E ico, paatuleniko inshita mu kutantika kwenu ukwa mu mulimo ukubwelela ku muntu umo umo uyo mwashalikako broshuwa. Ukwangwako kuli bene mu cine cine kuti kwalenga ukwaafwa abaleteta no kulila pa fya muselu fyonse ifilecitwa mu mipepele ya bufi ku kushilwa akashilwa ka kupusunsuka. (Esek. 9:4, 6) Na kabili mukaba no buseko no kwikushiwa ifyo fisako pa kwishiba ukuti mulepashanya Yehova ku kusakamana bambi mu cine cine.—Linganyeniko Abena Filipi 2:20.