Afweni Bambi Ukusanga Icisansamushi
1 Abantu abengi nabatendwa ukuumfwa pa lwa tuyofi, inkondo, imisoka, no kucula. Icisansamushi, nangu cingati calimonekesha ukuti tacilumbulwa mu malyashi ya lelo, e cintu umuntu akabila. Ukusansamusha cipilibula “ukukosha umo no kumwaafwa ukusubila” na “ukwilululako [umbi] ku kucula nelyo ku mafya.” Pamo nga Inte sha kwa Yehova, twaliipangasha ku kwaafwa abantu muli iyi nshila. (2 Kor. 1:3, 4) Amabroshuwa yesu ayashimpwa pali Baibolo ayo tukalatambika mu July na August yakwatamo ubukombe bwa kusansamusha ubwa cine. (Rom. 15:4) Pano palipo imitubululo imo intu twingayatambikilamo mu nshila shalekanalekana.
2 Ilyashi lya bulanda kuti lyamwaafwa ukushimikila no kusansamusha bambi, nakalimo ilyo mwalanda icapala ici:
◼ “Lintu ifintu fya musango yu fyacitika, bamo balatwishika nampo nga Lesa cine cine eko aba kabili, nga eko aba, nampo nga alatusakamana. Muletontonkanyapo shani? [Lekeni asuke.] Inshila imo iya kwishibilamo nampo nga Lesa eko aba kubomfya icishinte caimikwa bwino.” Belengeni AbaHebere 3:4. Londololeni ifintu fimbi ifyatushinguluka ifyo ukwabula ukutwishika fyakabile kapanga. Lyene twalilileni ukuti: “Ninkwata broshuwa uyo mwalamona ukuti wa kusansamusha. Ali no mutwe wa kuti Bushe Lesa mu Cituntulu Alatusakamana? [Belengeni ifipusho pa nkupo.] Mwaba ubushinino bwakosa ubwa kuti Lesa eko aba kabili mu kwangufyanya akafumyapo imibele ya lufyengo iyo tulolenkana na yo ilelo. Bushe kuti mwatemwa ukumubelenga?” Panganeni ubushiku bwa kubwelelako.
3 Pa cipempu ca kubwelelamo, kuti mwatila:
◼ “Twalelanda pa lwa bushinino bwa kuti Lesa eko aba lintu namushilile broshuwa wa Bushe Lesa mu Cituntulu Alatusakamana? Nakalimo mwalimwene ici cishinka pe bula 7. [Langeni icikope no kusupawila paragrafu 15.] Ici ca kumwenako fye cimo icilelanga ukuti Lesa uusakamana afwile cine cine eko aba. [Belengeni paragrafu 27 pe bula 9.] Ukusambilila Baibolo pa lwandi kwalingafwa ukwishiba ifya kwikala na mafya ya bumi aya cila bushiku pantu ilondolola fintu Lesa amona ifintu.” Ipusheni nga kuti mwalangilila isambililo.
4 Kuti mwashimikila pali lamya ukubomfya broshuwa wa kuti “Cinshi Caba Imifwaile ya Bumi—Ni Shani Fintu Wingaisanga?” Kuti mwailondolola no kusoso kuti:
◼ “Namutumina lamya ne lyashi ilyacindama pantu te kuti nkumanishe ukwisa mu kumumona.” Belengeni paragrafu wa kubalilapo pe bula 4 muli broshuwa, ukubelenga mu cifyalilwa, kwati nalimo mulelanshanya no muntu untu mulemona. Mwipusheni fintu aletontonkanya, kabili lekeni asuke. “Ninjisula Baibolo wandi pali Esaya 45:18. Ici cikomo cilanga ukuti isonde lyabumbiilwe fye ifwe. Bushe kuti namubelengelapo?” Pa numa ya ico, londololeni imifwaile ya broshuwa, kabili ipusheni inshila mwingamutwalila.
5 Pa kutuma lamya wa mbwekesha, kuti mwabomfya iyi nshila ku kutendeka isambililo:
◼ “Kuti natemwa ukutendekela pa fyo twalanshenye inshita yalekelesheko pa kumulangilila uwingatweba imifwaile ya bumi. [Supawileni amaparagrafu 1 na 2 pe bula 6 muli broshuwa wa Imifwaile ya Bumi.] Ukusokolola 4:11 kulondolola ukuti Yehova Lesa e Kabumba wesu. [Belengeni.] Mu kushininkisha afwile alishibe ico atubumbile. Abantu abafwaya ukufwailisha pa lwa ico balisambilila Icebo ca kwa Lesa icalembwa, Baibolo. Kuti natemwa ukusambilila na imwe.” Londololeni fintu kosi wesu uwe sambililo lya Baibolo ilya mu ng’anda atungululwa, kabili tantikeni ku kutendeka ukusambilila.
6 Iyi nshila isuma kuti yasansamusha abo umutemwikwa wabo afwa:
◼ “Ndebombela abantu abali bonse abo abakwatapo abatemwikwa abafwa. Apantu ici kuti caba cintu cakosesha ico uuli onse engabala apitamo, uyu broshuwa, Ilyo Untu Watemwa Afwa, alipekanishiwa. Alyaafwa amamilioni ya bantu. Kuti natemwa ukumulanga fintu asosa pa lwa bulayo bwa kucincimusha ubwalaile Yesu Kristu. [Belengeni paragrafu walenga 5 pe bula 26, ukusanshako na Yohane 5:21, 28, 29.] Moneni ici cikope pe bula 29 icilelangilila Ilandwe lya kwa Yesu mu cine cine alebuusha Lasaro ku bafwa. Nga kuti mwatemwa ukubelenga uyu broshuwa wa kusansamusha, kuti natemwa ukumushila.”
7 Lintu mwabwelelako, na kabili kuti mwalanga icikope pe bula 29 muli uyu broshuwa “Ilyo Untu Watemwa Afwa” no kusoso kuti:
◼ “Muleibukisha inshita yafumako twalanshenye pa fintu Kristu abuushishe Lasaro. [Belengeni amashiwi yalelondolola icikope pe bula 28, kabili lanshanyeni ifyebo pe samba lya kamutwe kanono akaleti “Bushe mu Cituntulu Calicitike?”] Nga ca kuti mu mutima wenu mulefwaisha ukusumina ukuti mu kushininkisha mukamona na kabili umutemwikwa wenu uwafwa, kuti namwaafwilisha pa kuti na imwe mwasubila mu kubuuka.” Ipusheni pa lwe sambililo lya Baibolo ilya mu ng’anda.
8 Shi natubombeshe mu myeshi ileisa ukupashanya Yesu ku “kusansamusha bonse abaloosha.”—Esa. 61:2.