Bilisheni Imbila Nsuma iya Bufumu Ukubomfya AmaBroshuwa

¹ Fintu caba buseko ukwishiba icine no kuba pa kati ka abo balebilisha imbila nsuma mu kupimpa! Abantu baba ku nse ya kuteyanya kwa kwa Lesa mu kupelelwa balekabila ukumfwa imbila nsuma iya Bufumu. Icine pa lwa Bufumu calilondololwa mu kwanguka mu mabroshuwa ya Ipakishe Ubumi pe Sonde kuli Pe na Pe!, Kamfulumende Iikaleta Paradise na “Moneni! Ifintu Fyonse Nafilenge Fipya.” Amabroshuwa mu kumonekesha yalangisha ubumi pe sonde pe samba lya Bufumu bwa kwa Lesa, kabili yatungulula kabelenga ku fya cine cine ifya Bufumu ifyo fyalondololwa mu Cebo ca kwa Lesa. Kwena, ukushalika broshuwa ku muntu ulesekelela kwaba fye e kutendeka kwa mulimo wesu. (1 Kor. 9:23) Natwangufyanye ukukonkelela abo twashileko amabroshuwa, mu kuba no buyo bwa kutambika isambililo mu citabo ca Ukwishiba Uko Kutungulula ku Mweo wa Muyayaya. Ni shani fintu twingapwishishisha ici mu August?

² Broshuwa wa “Ipakishe Ubumi pe Sonde kuli Pe na Pe!” kuti atambikwa mu kuba na mashiwi ayepi nga nshi. Ilyo mulelangisha inkupo ya uko, nakalimo kuti mwatila:

◼ “Kuti natemwa ukumulanga icintu cimo icakwata ubukombe bwawamisha.” Isuleni broshuwa wa Ubumi pe Sonde, kabili belengeni paragrafu wa kubalilapo uwa mitendekele. Lyene twalilileni ukuti: “Na kabili alasuka ici cipusho [alukileni ku mutwe uli pa muulu wa cikope calenga 8] icitila: ‘Mulandu nshi umuntu afwila?’ Mukasekelamo ukusambilila ifikope no kubelenga amalembo ayali muli uyu broshuwa. Nga ca kuti mulefwaya ukucita ifyo, kuti mwapokako uyu broshuwa.”

³ Cinshi mukasosa lintu muleya ku cipempu ca kubwelelamo uko mwashile broshuwa wa “Ubumi pe Sonde”? Kuti mwabomfya iyi nshila:

◼ Langeni icikope calenga 49 muli broshuwa wa Ubumi pe Sonde kabili ipusheni ukuti, “Bushe ici tacili cikope cayemba? [Lekeni asuke.] Cili muli ulya broshuwa namushilile umuku nalekelesheko ukutandala. Kuti natemwa ukumwipusha icipusho pe bula lyakonkapo.” Alukileni ku cikope calenga 50 kabili belengeni icipusho cileti: “‘Bushe ulafwaya ukwikala kuli pe na pe muli ulya paradise wayemba?’ [Lekeni asuke.] Nga ca kuti ifyo e fintu mufwaya, umfweni cintu broshuwa atila mufwile ukucita: ‘Lyene sambilila ifyafula pa lwa cintu Lesa asosa.’ [Belengeni Yohane 17:3.] Kuti natemwa ukusambilila Baibolo na imwe apa fye. Bushe kuti mwatemwa ifyo?” Panganeni ubushiku bwashininkishiwa ubwa kubwelelako.

⁴ Lintu muletambika broshuwa wa “Moneni! Ifintu Fyonse Nafilenge Fipya,” nakalimo kuti mwatendekela pa kulangisha icikope ca nkupo yonse no kwipusha ukuti:

◼ “Cinshi muletontonkanya cingakabilwa pa kulenga isonde lyonse ukumoneka nge fi?” Lekeni asuke. Londololeni imbali shimo isha cikope, ishashimikwa pe bula 3. Lyene mutile: “Abantu abengi batontonkanya ukuti icalo tacakatale acibe fi. Lelo calyanguka kuli Lesa ukucita. [Lanshanyeni ifishinka mu paragrafu 43; lyene belengeni Esaya 9:6, 7.] Lesa alilaya ukuletako icalo cipya umo abantu ukufuma mu nko shonse bakaipakisha paradise wawamisha. Kuti natemwa ukuti mwabelenga uyu broshuwa. Akalanga fintu imwe no lupwa lwenu mwingaipakisha inshita ya ku ntanshi iya kusungusha iyo Lesa akaletako.”

⁵ Pa cipempu ca kubwelelamo, kuti mwabomfya broshuwa wa “Moneni!” ku kulondolola umulandu kwabelako ukukabila kwa kusambilila ifingi pa lwa Baibolo. Nakalimo langeni icikope ca nkupo na kabili no kusoso kuti:

◼ “Lintu namulangile ici cikope pa kubalilapo, twalisuminishenye ifyo kuti twatemwa ukwikala mu calo cawamisha ica musango yu. Pa kuti ici cingacitika, kuliko icintu cimo ico ifwe bonse tulekabila ukucita.” Isuleni broshuwa wa “Moneni!” paragrafu 52; belengeni paragrafu ne lembo pali Yohane 17:3. Ampanyeni ifyebo ku cilangililo cili mu paragrafu 53 pa lwa masomo ya Baibolo ayalinga, kabili londololeni ukuti Inte sha kwa Yehova balatambika ukufunda kwa musango yo apa fye mu ŋanda. Bepusheni nga kuti mwabalangilila inshila yesu iya kusambililamo, ukubomfya icitabo ca Ukwishiba.

⁶ Lintu muletambika broshuwa wa “Kamfulumende Iikaleta Paradise,” nakalimo kuti mwaesha ukulandila muli iyi nshila:

◼ “Nalyumfwa abantu abengi baleti kuti batemwa ukutekwa na kamfulumende uyo mu cituntulu engapikulula amafya yakalamba ayo tulolenkana na yo ilelo. [Lumbuleni amafya ya mu cifulo cenu pamo nga ukubulwa incito, imisoka ileingilishiwako, nelyo ukubomfya imiti ikola.] Ifi fintu fitulenga ukuyumfya abashacingililwa pa lwa nshita ya ku ntanshi fwe bene na batemwikwa besu. Bushe muletontonkanya ukuti kukatala akuba kamfulumende uukapikulula aya mafya? [Lekeni asuke.] Nakalimo mwalipepapo Ipepo lya kwa Shikulu. Nga mwalipepapo, bushe mwalishibe ukuti mu cine cine mulepepela kamfulumende walungama?” Alukileni kwi bula 3 muli broshuwa wa Kamfulumende, kabili belengeni amaparagrafu yabili aya kubalilapo. Tambikeni broshuwa.

⁷ Nga ca kuti broshuwa wa “Kamfulumende Iikaleta Paradise,” e washalikwe, kuti mwatendeka ukulanshanya pa cipempu ca kubwelelamo pa kusosa ukuti:

◼ “Lilya naishile twalanshenye ukukabila kwa kamfulumende walungama uyo wingapikulula amafya ya muntu. Broshuwa untu namushilile asonta ku Bufumu bwa kwa Lesa ukuti e subilo lyesu lyeka fye. Abantu abengi balatwishika cintu uyo kamfulumende engacita ku kuwamya imibele yesu iya bumi. Baibolo ilanga ukuti Kristu kale kale alishininkisha ukuti akatunguluka umo intungulushi sha buntunse shafilwa.” Isuleni broshuwa wa Kamfulumende pe bula 29, kabili belengeni amaparagrafu ya kulekeleshako yane. Lyene mutile: “Bushe iyo taili ni nshita ya ku ntanshi iyawamisha? Bushe kuti mwatemwa ukuimona?” Lekeni asuke. Belengeni Yohane 17:3. Koselesheni ukusambilisha ifyafulilako ukupitila mwi sambililo lya Baibolo ilya mu ŋanda.

⁸ Nga ca kuti mulebomfya amabroshuwa yambi, kuti mwapekanya inshila shenu isha kulandilamo, ukubomfya ishitubulwilwe pa muulu nge sha kukonka. Pekanyeni bwino no kulomba ipaalo lya kwa Yehova ilyo mulebilisha imbila nsuma iya Bufumu.