Bomfya Amabroshuwa Yalekanalekana mu Butumikishi Bobe
1 Abantu ilelo balisekelela mu malyashi ayalekanalekana. Ilyo uleibimba mu mulimo wa mwi bala mu July, kuti wakwatako amabroshuwa yalekanalekana ayafulilako, ukubomfya umo uwa kulungatika uwingacebusha abantu mu cifulo ca kubombelamo. Ibukisha na kabili ukutambika icitabo ca Ukulenga Ubumi bwa Lupwa Lobe ubwa Nsansa ku bene mayanda ilyo uletambika amabroshuwa. Kuti pambi wabuulamo umutwe umo mu citabo uuleumfwana bwino na broshuwa uletambika. Nakalimo kuti watemwa ukweshako imo iya iyi mipeelele:
2 Pa kutambika broshuwa wa kuti “Kamfulumende Iikaleta Paradise,” kuti waipusho kuti:
◼ “Bushe muletontonkanya icalo kuti caba shani nga ca kuti Lesa aali e kateka fye eka? [Leka asuke.] Ukuleka Lesa ukupoka ukuteka kwe sonde e cintu mu kushininkisha tulomba lintu tupepa Ipepo lya kwa Shikulu, nelyo We Shifwe, lintu Yesu Kristu atusambilishe. [Kupukula pe bula 3, no kubelenga paragrafu wa kubalilapo, umo Mateo 6:10 ambwilwe.] Nga mwingatemwa ukwikala mu calo ca musango yo, mulingile ukubelenga uyu broshuwa.” Tambika wene.
3 Broshuwa wa “Ilyo Untu Watemwa Afwa” kuti walangisha wene muli iyi nshila:
◼ “Bushe muletontonkanya kukatala akubako ubushiku lintu kushakabe nangu umo uukalufya untu atemwa mu mfwa? [Leka asuke.] Uyu broshuwa uwalembwa mu kuyemba alisansamusha amamilioni no bulayo bwa mu Baibolo ubwashininkishiwa ubwa kuti ubushiku bwa musango yo buleisa mu nshita ya ku ntanshi iipalamishe. [Kupukula pe bula 5, no kubelenga paragrafu walenga busano, ukusanshako na 1 Abena Korinti 15:21, 22. Lyene kupukula pa cikope pe bula 30.] Pano bakalenga wa cikope baleebekesha ubuseko ubo twingakumanya mu kusengela abafwa besu abakabuuka. Lelo bushe ici ca kumoneka ca buseko cikacitikila kwi? Uyu broshuwa akamulanga icasuko ca mu Baibolo kuli ico cipusho.” Nga broshuwa apokwa, kuti pambi walundako ukuti: “Kuti natemwa ukubwela pa numa ku kwisalanshanya uyu mutwe wa lyashi mu kutwalilila.”
4 Kuti pambi walangisha broshuwa wa kuti “Moneni! Ifintu Fyonse Nafilenge Fipya,” ukubomfya iyi nshila ya kulungatika ku kutendeka isambililo lya Baibolo:
◼ “Abantu abengi balikwata ifipusho pa lwa Baibolo. Kuti pambi mwalitwishika pa lwa casuko kuli cimo ica ifi fipusho. [Kupukula pe bula 30.] Ici cipusho ca kulekeleshako calibimbula ubuseko mu bantu abengi citila: ‘Ni shani fintu wingaipekanya ku bumi bwa muyayaya muli Paradise?’” Nga ca kuti mwalanshanya amaparagrafu 57-8 pa mabula 29-30 no kubelenga Ukusokolola 21:3, 4, ninshi ukaba naubika icitendekelo ku kutampa isambililo lya Baibolo. Sondwelela pa kushalika broshuwa no kutantike cipempu ca kubwelelamo lintu mwingalanshanya ifipusho fimbi.
5 Kuti pambi wafwaya ukweshako iyi mipeelele yayanguka kuli broshuwa wa kuti “Ishina lya Bulesa Ilikatwalilila Kuli Pe na Pe”:
◼ “Cimo ica fintu fya kubalilapo nasambilile muli Baibolo cali lishina lya kwa Lesa. Bushe mwalilishiba? [Leka asuke.] Lekeni mulange. Lyaba pano muli Baibolo pa Ilumbo 83:18. [Belenga.] Uyu broshuwa alanga fintu ishina lya kwa Lesa, Yehova, limoneka mu ndimi ishingi ishalekanalekana. [Langisha umukululo pe bula 8.] Nga mwingatemwa ukusambilile fyafulilako pa lwa kwa Yehova ne mifwaile yakwe, mulingile ukubelengako uyu broshuwa.” Tambika broshuwa kuli mwine ŋanda.
6 Mu kuba no kulekanalekana kwa musango yo ukushaiwamina ukwa mabroshuwa ya kubomfya, mu cine cine twaliba abaipangasha bwino ku “ku kubile mbila nsuma ku balanda.”—Esa. 61:1.