Inshita ya ku Ntanshi Iishaiwamina iya Bana Besu

UKUTULA apo Inkondo ya Calo iya 2 yapwilile, amabuteko ya mu calo yalipekanya no kusainishanya ifipangano ifingi ifya kucingilila abekala mushi ilyo kuli inkondo. Pali fyene paba ne fipangano ifisoso kuti abana bena bafwile ukupeelwa ifya kufwala, umuti ne fya kulya. Ifipangano fya fyalo fyafulilako filaya ukucingilila abana ukukanacendwa, ukulungulushiwa, no kucitwa ulukaakala. Ifipangano filabinda fye no kulemba uushilafika pa myaka 15 mu bushilika.

The State of the World’s Children 1996, lipoti wa ba United Nations Children’s Fund, alalumbilisha aya mafunde ukuti “fya kupwishishisha fikalamba” kabili alundako kuti: “Bapolitishani abaishiba ukuti kwalibako amafunde ayo bengakandilwapo nga bayatoba bakesha nga nshi ukumfwila ayo mafunde.”

Kwena, bapolitishani kabili balishiba bwino bwino ukuti mu fyalo fye fyonse takwaba uwakwata amaka kabili uufwaisha ukuti amafunde yalekonkwa. Muli fyo lipoti yasumino kuti “ukumona fintu ifi fishinte fyatobwa, tacakosa ukusuula na ya yene mafunde yapangilwe ne fyalo ifingi.”

Nomba sansheniko no bwafya bwa ndalama. Mu 1993, ifyalo 79 fyalelwa inkondo. Pali fyene ifyalo 65 fipiina. Ni kwi ifi fyalo ifipiina fyafumishe ifyanso fya kulwilako? Maka maka fyafumine ku fyalo ifikankaala. Kabili fyalo nshi fisano ifyaba pa muulu mu kushitishe fyanso ku fyalo ifipiina? Ifyalo fisano ifyaba fimembala fibelelela ifyapanga Icilye cilolekesha pa Mutende ica United Nations!

Abayangwako

Kwena, kwalibako abayangwako mu cine cine pa lwa kucula kwa bacaice mu nkondo. Abantu umo umo na mateyanyo mu kutemwa balaafwa abacaice mu nkondo. Ku ca kumwenako, Inte sha kwa Yehova, abashilwanako inkondo, balicite co. Lelo ukufumyapo ukucula kwa bana mu nshita ya nkondo mu cine cine cilepilibula ukufumyapo inkondo ine, icintu icingamoneka ifyo te kuti cicitike. Pa mulandu wa kuti abantunse ukutula fye kale na kale baikalila fye ukushenkana no kukansana, abengi basondwelela ukuti abantunse tabakatale abaletako umutende pe sonde. Pali ici, balilungika.

Abantu na kabili basondwelela ukuti Lesa takatale anyantukilamo mu milandu ya nko nelyo ukuletako umutende ubelelela kwi sonde. Pali ci pena, baliluba.

Kabumba wesu, Yehova Lesa, alasakamana nga nshi ifilecitika pe sonde. Mu Cebo cakwe, Baibolo, Yehova epusha ukuti: “Bushe ukubekwa mbekelwe mfwa ya mubifi? . . . Bushe te mu kubwela kwakwe mu mibele yakwe, no kuba no mweo, e mo mbekelwa?” Lesa ayasuka mu kwebekesha ati: “Nshibekelwa mu mfwa ya ulefwa.”—Esekiele 18:23, 32.

Elenganyeni: Nga ca kuti Kabumba wa cililishi afwaya fye na bakalamba ababipa ukulapila no kuipakisha ubumi, mu kushininkisha afwaya abana ukuba aba mweo no kuipakisha ubumi na bo bene! Lelo, Lesa wesu uwa kutemwa takatwalilile ukutekelesha ababifi. Icebo ca kwa Lesa cilayo kuti: “Incitatubi shikafitwa . . . Pashala panono, e lyo umubifi takabepo.”—Ilumbo 37:9, 10.

Yesu Kristu, uwalangishe bwino bwino imibele ya kwa Wishi wa ku muulu, alitemenwe abana kabili atile “ubufumu bwa mu muulu bwa babe fi.” (Mateo 19:14) Ukupeela abana amalambo kuli balesa ba nkondo kwa muselu kuli bonse babili Yehova Lesa no Mwana wakwe, Yesu Kristu.—Linganyeniko Amalango 18:10, 12.

Ubulayo bwa kwa Lesa Ubwa Nshita ya ku Ntanshi Iishaiwamina

Lesa alisuminisha inkondo no kucula pa myanda ya myaka iingi pa kuti icine calondololwa na kasesema Yeremia cingakoshiwa inshita yonse. Yeremia atila: “Mwe Yehova, ninjishibo kuti te kwa muntunse ukwenda kwakwe; te kwa muntu uuleya ukushikimika amatampulo yakwe.” (Yeremia 10:23) Baibolo yalayo kuti, bwangu bwangu Yehova akebela bumulopwe bwakwe ubwapulishamo ukupitila mu ‘kuputulo bulwi ukufika ku mpela ya calo.’ (Ilumbo 46:9) Kabili mu Baibolo mwasobelwa inshita lintu “[abantu bakasuka] abafule mpanga shabo shibe ifya kuliminako umushili, na mafumo yabo yabe ifya kutungwilako imiti; lukasuke uluko alubulo kusumbwilo lupanga ku luko, nangu kusambilila kabili ubulwi.”—Esaya 2:4.

Cinshi cikacitika ku baipaiwa mu nkondo? Bushe kwalibako isubilo ilili lyonse kuli bene? Yesu alaile ukubuuka kwa bafwa ukwisa pe sonde lyabulapo inkondo, ukusoso kuti: “Inshita ileisa, iyo bonse aba mu nshishi . . . [bakafumamo].” (Yohane 5:28, 29) Mu kupalako, umutumwa Paulo alondolwele mu kubamo kucetekela ukuti: “Kukabo kwima ku bafwa kwa balungama na bashalungama.”—Imilimo 24:15.

Amalayo ya kwa Lesa nangu cibe shani yakafikilishiwa. Alikwata amaka kabili alafwaya ukufikilisha imifwaile yakwe yonse. (Esaya 55:11) Lintu Yehova atila akafumyapo inkondo, ninshi talebepa iyo. Lintu alaya ukubuusha abafwa, akacicita. Nga fintu malaika Gabriele asosele, “icebo conse icifuma kuli Lesa tacakabulwe amaka.”—Luka 1:37.

[Icikope pe bula 10]

Lintu inkondo ikafumapo, abacaice bonse bakaipakisha ubumi busuma