Ifikuko—Bushe Filelangilila Impela?
BUSHE ifikuko fya muno nshiku shesu filelanga ukuti ukupwa kwa calo nakupalama? Ilyo tushilayasuka ico cipusho, natulanguluke ico inumbwilo ya kuti “ukupwa kwa calo” ipilibula.
Abengi baasumina ukuti ukupwa kwa calo cipilibule fyo Lesa akonaula isonde no bumi bonse ubwabapo. Nangu cibe fyo, Icebo ca kwa Lesa cisoso kuti “[icalo] acibumbile ku kwikalwamo.” (Esaya 45:18) Imifwaile yakwe ya kwisusha uno planeti na bantu aba bumi busuma, aba nsansa abengangwa ukuteulukila ku fipimo fyakwe ifyalungama. E co ukupwa kwa calo takupilibula impela ye sonde na bekashi ba liko bonse. Mu cifulo ca ico, cipilibula impela ya micitile ya ndakai na bo abakaana ukucito kufwaya kwa kwa Lesa.
Ici calangililwe no mutumwa Petro, uwalembele ukuti: “Pano isonde apalipo lilya [mu nshiku sha kwa Noa], pa kuponenwe lyeshi, palyonaike.” Lintu icalo caonawilwe mu nshita ya kwa Noa, abalobele baali babifi. Isonde lyena lyalishele na Noa umulungami na o alishele no lupwa lwakwe. Nga fintu Petro akonkeshapo, Lesa akabombapo na kabili ku ntanshi ku kuletako “uboni bwa bantu abashipepa.”—2 Petro 3:6, 7.
Amalembo yambi aya mu Baibolo yaba fye cimo cine mu kwafwilisha iyi mimwene. Ku ca kumwenako, Amapinda 2:21, 22 yasoso kuti: “Abatambalala bakekala mu calo, na ba mpomfu bakashalamo; Lelo ababifi bakaputulwa mu calo, na bafutika bakafumpulwamo.”—Moneni kabili Ilumbo 37:9-11.
Ifyo Ifikuko Fyakuma ku Kupwa kwa Calo
Lelo ni lilali lintu ici cikacitika? Bane aba mu basambi ba kwa Yesu balimwipwishe ico cipusho. Baipwishe abati: “Cinshi iciishibilo ca kwisa kwenu, ne ca kupwa kwa pano isonde”? Yesu alyaswike ati: “Uluko lukemino luko, no bufumu bukemino bufumu; kukaba ne fipowe ne finkukuma mumo mumo.” (Mateo 24:3, 7) Mu bulondoloshi bwayampanako ubwa pali Luka 21:10, 11, Yesu alundileko ati: “Uku no ku kukabe . . . fikuko; kukaba ne fya kutiinya ne fiishibilo fikalamba mu muulu.”
Moneni ukuti Yesu taalandile ukuti ifikuko fyeka e fyali no kulango kuti impela naipalama. Mu cifulo ca ico, atantikepo ne nkondo shikalamba, ifinkukuma, ne fipowe. Mu busesemo bwakwe ubwa kulonsha ubusangwa pali Mateo 24 na 25, Marko 13, na Luka 21, Yesu asobele na fimbi ifingi ifyali no kucitika. Fyonse fyali no kucitikila capamo ilyo Lesa talabombapo ku kupwisha ububifi pe sonde. Kuli ubushininkisho bwakosa ubwa kuti nomba tuleikala muli iyo nshita.
Paradise Uuli no Kwisa
Inshita ya ku ntanshi tayakalete ukulofiwa kwa bantunse, atemwa ku cikuko nelyo ku maka ya kwa Lesa. Yehova Lesa alilaya ukwalula lino isonde ukuba paradise. (Luka 23:43) Pa kati ka fintu fimbi, akafumyapo amalwele ayapumpunta umuntunse.
Tulebekeshiwa ulwa ici lintu tulanguluka ubutumikishi bwa kwa Yesu Kristu, uwabelebeshe mu kupwililika imibele ya kwa Wishi. Pa kupeelwa amaka kuli Wishi wa ku muulu, Yesu aundepe abalemana amolu, abalemana, impofu, nelyo bacibulu. (Mateo 15:30, 31) Na kabili aposeshe abaalecushiwa ne fibashi. (Luka 17:12-14) Aposeshe umwanakashi uwalesuumo mulopa, umwaume wa kuboko kwaumina, no mwaume wakwete ulusuku. (Marko 3:3-5; 5:25-29; Luka 14:2-4) Abweseeshe ubumi busuma ku “bafunta, na ba bulebe.” (Mateo 4:24) Pa nshita shitatu abushishe fye na bafwa!—Luka 7:11-15; 8:49-56; Yohane 11:38-44.
Uku kuposha kwa mu cipesha amano kulakosha ubulayo bwa kwa Lesa ubwa kuti mu fyo aapekanya ku ntanshi, “umwikashi wa mu calo takasose, ati, Nindwala.” (Esaya 33:24) Ifikuko tafyakatale na kabili afipusula abantu ubutuntulu busuma no bumi. Fintu twaba aba kutootela ukuti Kabumba wesu uwa kutemwa akwata fyonse fibili amaka e lyo no kufwaya kwa kufumyapo umupwilapo ukulwala ne ntenda, kuli pe na pe!—Ukusokolola 21:3, 4.
[Ifikope pe bula 9]
Yesu apeelwe amaka kuli Lesa aya kundapa abalwele
[Icikope pe bula 10]
Muli Paradise wa pe sonde uuleisa, Yehova akafumyapo amalwele ne ntenda