Ukulungulushiwa ku Mwenso Wacishamo
Jerilyn Ross umukalamba wa cipatala ca bakwata umwenso wacishamo atile: “Ilingi abantu bakwata umwenso wacishamo balasekwa. Lelo tacaba cintu ca kusekesha.”
UYU mwenso wacishamo waba mwenso ushili wa cine cine kabili ubimbamo ukutalalilwa. Raeann Dumont, uwaundapa abakwata umwenso wacishamo ukucila pa myaka 20, atila: “Abantu bakwata umwenso wacishamo balasengauka imibele iingi ica kuti batendeka ukuba fye mu ng’anda, nelyo ukuba na masakamika ya mutatakuya, nelyo ukucefyanyako ukusakamikwa ukupitila mu kunwa ubwalwa, ukwingaletelako fye amafya yafulilako.”
Umwenso wacishamo waba mwi bumba lya malwele yetwa ukucishamo ukusakamikwa.a Catunganishiwa ukuti amaperesenti 12 aya bakalamba mu United States bakakwata umwenso wacishamo pa nshita imo mu bumi bwabo. Abengi bakalacululuka mu bumfisolo pa myaka. Akabungwe ka Anxiety Disorders Association of America kashimika ukuti: “Ku ca bulanda mupepi ne cinabwingi ca bantu bakwata umwenso wacishamo tabafwilishiwa. Abengi abakwata umwenso wacishamo tabatemwa ukufwaya ubwafwilisho pa mulandu wa kukanafwaya ukusekwa. Bambi tabomfwikisha ico bakwata nelyo ukwa kusanga ubwafwilisho kabili bambi batiina ukundapa kwine.”
Kwaliba umwenso wacishamo uwingi uwaishibikwa, lelo incenshi shautantika mu fiputulwa fitatu. Umwenso wacishamo uwa fintu pamo ngo tushishi, inama, ukupupuka, no kuba umwaisalwa. Umwenso wacishamo uwa kuba mu fifulo fya cintubwingi ilingi wishila pamo no kutulumushiwa. Abakwata uyu mwenso wacishamo balatiina ukutulumushiwa ica kuti basengauka fye ififulo fyonse nelyo imibele umo batulumukile. Umwenso wacishamo uwa bantu waba kutiina ukuseebana mu cintubwingi, pamo ngo kulanda kwi bumba.
Natulanguluke pa mwenso wacishamo uwa bantu. Magazini wa The Washingtonian atila: “Nangu mubike pamo umwenso wacishamo uwa fintu fyonse, pamo ngo mwenso wa nsoka nelyo ukupupuka, umwenso wacishamo uwa bantu e wacilapo ukucululusha pa mwenso wacishamo uuli onse.” Bushe ici ca cine? Nge fyo cili, mulandu nshi? Natumone.
[Futunoti]
a Ukusakamikwa kwacishamo kumbi kusanshamo ukutulumushiwa kwacishamo, obsessive-compulsive disorder (ukufilwa ukulama amatontonkanyo ne ncitilo), ukukanshika kwacishamo ukwisako pa numa ya kupita mu busanso, no kusakamikwa kwacishamo ukwa fintu fimbi. Ku fyebo fyalundwapo, moneni Awake! wa February 8, 1996, umutwe uleti “Compulsive Behavior—Does It Control Your Life?” no wa June 8, 1996, “Coping With Panic Attacks.”