Akayofi ka Mfwa sha Bacaice

Johanna, uwa myaka 18, uuli mu mwaka wa kubalilapo pa yuniversiti, ku Connecticut, mu United States of America atile: “Ntontonkanya ukuti inkulo yesu ileloba.”

BAKAPOKOLA bamwene ifya kutiinya pe farmu ku nse ya Hobart, umusumba wa bwangalishi uwa Tasmania, uwaba cishi ca Australia. Mu ng’anda mwali abakashana bane aba myaka ukufuma kuli 10 ukufika ku 18. Bonse bali nabafwa, baipaiwe kuli shibo, uwailashile imfuti mu mutwe no kufwila mupepi na po bafwilile. Aiputwile ukuboko kwakwe ukwa ku kulyo na kasembe. Uku kwipaya no kuipaya kwakalifye abantu bonse aba mu Tasmania. Kabili icipusho cakosa ico bonse bakwete cali ca kuti—Mulandu nshi? Mulandu nshi abakashana bane aba kaele baipaiwilwe?

Abena Belgium bacili balikalipa pa lwa fyafumine mu kucenda abakashana 6 no kwipayapo bane kuli mwikata kama uwafumine mu cifungo. Kabili bonse baipwishe icipusho cimo cine—Mulandu nshi? Mu Argentina banyina bamo basumina ukuti abantu 30,000, abengi abali bana babo abaume na banakashi, baliloba mu co nomba beta inkondo yakowela.a Bamo pali aba bana basheme balilungulushiwe no kupooswa muli bemba ukufuma mu ndeke. Abengi balepooswa abatuntulu. Mulandu nshi bafwilile? Banyinabo bacili balelolela ifyasuko.

Mu 1955 akabungwe ka World Congress of Mothers kasenwike inkondo akati tamwaba mano no kusosa ukuti akabungwe ka congress kali “kusoka ukufuma ku banakashi abaleshomboka ukucingilila abana babo, abakalamba na banono, ku fibi fifuma mu nkondo na mu kupekanishisha inkondo.” Mu kupusanako, impendwa ya bacaice abafwila mu bulwi ukutula lintu aka kabungwe kapangilwe ilekulilako mu calo conse—ukulufya abengi aba mu nkulo iyo pambi nga yafyele abana abalamuka mu fyalekanalekana.

Abacaice ni Kale Batendeka Ukufwa

Ukutula kale iminshipendwa ya bacaice balipaiwa. Na mu mwanda wesu uwa myaka uwalenga 20, umo batila mwaba ukulunduluka, ukukansana kwa mushobo ne mitundu kwalenga abacaice ukufwilapo. Cimoneka kwati abacaice bafwile ukufwilapo pa filubo na mapange ya bakalamba.

Magazini wa The New Republic ashimika ukuti: Mu calo cimo ica mu Afrika, ibumba lya bapungwe ba mipepele abaita nga Lord’s Resistance Army balibepwa ukuti tabengalaswa ku mpoolopoolo. E mulandu wine icipande cakwatila umutwe wa kuti “Abapungwe Bashaikushiwa”! E co, nga fintu twingenekela indupwa shafwilwa abana baume na banakashi abo impoolopoolo shishingatunamo shipusha ukuti: Mulandu nshi abacaice besu bafwilile? Bushe fyonse fi fyakwata imifwaile nshi?

Impendwa ileingilishiwako iya bacaice baleipaya ilelunda kuli uku kucululuka konse.

[Futunoti]