Imimwene Ya Baibolo

Ubucindami bwa Kuba Mweka

INSHITA IMO Yesu “aninine ulupili eka ku kupepa. Icungulo pa kwisa, aliko eka.” (Mateo 14:23) Inshita imbi nayo, “ilyo bwacele, alifumine aile mu mpanga ya matololo.” Luka 4:42) Amalembo yashinina ukuti Yesu Kristu aalefwayako inshita ya kuba eka kabili alicindamike ico.

Baibolo ilalanda pa fya kumwenako fya baume bacindamike inshita sha kuba beka, ukupala Yesu. Cali ni pa nshita kemba wa malumbo ali eka ubushiku e lintu aetetwile pa bukulu bwa kwa Kabumba Mukalamba. Nangu fye ni Yesu Kristu, pa numa fye Ukumfwa imfwa ya kwa Yohane Kabatisha, aile “ku matololo e ko bali beka.”—Mateo 14:13; Ilumbo 63:6.

Ilelo, mu bwikashi bwa muno nshiku ubwa congo, ukufwaya ukuba weka nampo nga kwa kupatikishiwa fye nelyo kwa kuitemenwa, takumonwa ngo kwacindama sana. Bushe kuti mwaibukisha inshita mwalekelesheko ukuba mweka? Umwanakashi umo uwaupwa atile: “Nshabala mbapo neka mu bumi bwandi.”

Lelo bushe ukuba mweka cine cine kulakabilwa? Nga kulakabilwa, ni shani inshita sha kuba mweka shingabomfiwa pa kuti wingamwenamo no kulambulwa? Kabili ilyo tulefwaya ukuba fweka ukukanacishamo kuti kwatwaafwa shani?

Mulandu Nshi Cacindamina Ukuba Mweka?

Baibolo itwebo kuti umuntu wa pa kale uwa kwa Lesa Isaki, aile eka “pa nshita ya cungulo . . . mu mpanga.” Mulandu nshi? Baibolo itila, “Ku kwetetula.” (Ukutendeka 24:63) Ukulingana na dikishonari umo, ukwetetula cipilibula “ukubikako amano nelyo ukutekanya pa kutontonkanya pa cintu cimo. Yaba “ni nshita yalepa iya kutontomesha pa cintu cimo mu mukoosha.” Ukwetetula kwa musango yo kwali no kulenga Isaki uwali no kutendeka umulimo ushaikulila, ukukanapumbulwa mu kutontonkanya, no kuteyanya amatontonkanyo yakwe, no kulingulula ifyali ifyacindama.

Uwasambilila ifya muntontonkanya asoso kuti ‘ukuba weka kulenga umo ukutontonkanya bwino, ukubika amano sana ku fyo alecita, cikulu fye takucilile mu cipimo.’ Abengi kuti basumina ukuti ici kuti calenga umo ukupembesulwa, ukukoshiwa, no kuba no bumi ubutuntulu.

Pa fisabo fisuma ififuma mu kwetetula paba ukutontonkanya bwino no kutekanya, iyaba mibele ikabilwa ku kubo washilimuka mu kulanda na mu ncitilo, iyo kwi pele pele ilenga abantu ukulaumfwana bwino. Ku ca kumwenako, umuntu uwaishiba ukwetetula na kabili kuti aishiba ilyo alingile ukwikala tondolo. Mu cifulo ca kulanda mu kususwa, aleshibila kabela ifingafuma mu mashiwi yakwe. Kalemba wa Baibolo uwapuutwamo aipwishe ati, “Bushe wamono muntu wa bwangukanwa mu fyebo fyakwe?” Alundapo ukuti: “Kuti waba ne cilolelo ku muwelewele ukucila kuli wene.” (Amapinda 29:20) Cinshi cingaafwa abasose fyebo fya musango yo ukwabula ukutontonkanya? Baibolo itila: “Umutima wa mulungami welenganye ca kwasuka.”—Amapinda 15:28; linganyeniko Ilumbo 49:3.

Ku Mwina Kristu, ukwetetula kwa mu mutalalila no kuba eka kwalicindama pa kuti akule lwa ku mupashi. Aya mashiwi ya mutumwa Paulo yali ayalinga, yatila: “Ube no mute ku fintu ifi, ikala muli ifyo, ukuti ukulunduluka kobe kumoneke kuli bonse.”—1 Timote 4:15.

Palamineni Kuli Lesa pa Nshita Muli Mweka

Kalemba umuNgeleshi atile: “Ukuba fweka kulalenga ukuti tulelanda na Lesa.” Limo limo, Yesu alefwaisha ukusha abantu banankwe pa kuti engalanshanya na Lesa. Ica kumwenako ca ici calilondololwa muli Baibolo ukuti: “Ulucelocelo, ku matundaca, aliimine, afumineko, aile ku matololo, e ko alapepa.”—Marko 1:35.

Libili libili, ukwetetula pali Lesa kwaliloshiwako mu Malumbo. Ilyo aalelanda kuli Yehova, Davidi atile: “Ntontonkanya imwe.” E fyaba na mashiwi ya kwa Asafi aya kuti: “Ndetontonkanyo kubomba kwenu konse, no kwetetule milimo yenu.” (Ilumbo 63:6; 77:12) E ico, ukutontonkanya pa mibele ne milimo ya bulesa kulalambula apakalamba. Kulalundako ukutesekesha Lesa, ukulenga umo ukupalamina kuli wene.—Yakobo 4:8.

Ukukanacishamo Kulakabilwa

Kwena, ukufwaya ukuba mweka takulingile ukucishamo. Ukuba mweka kuti kwalondololwa nge cifulo cisuma ica kutandalila lelo ica busanso ukwikalililamo. Ukucishamo ukuba mweka kulapinkana ne fyo abantunse bakabila sana pamo ngo kwangala, ukulanshanya, no kulango kutemwa. Ukulundapo, mu kuba mweka mulafuma ubuwelewele na bukaitemwe. Ipinda lya mu Baibolo lisoka aliti: ‘uufwayo kuba eka afwayo mwa kufwailo lubuli, apaataukila amano yonse, NW.’ (Amapinda 18:1) Pa kuti twicishamo ukufwaya ukuba fweka, tufwile ukwishiba ubusanso bwabamo.

Abena Kristu ilelo balicindamika inshita sha kuba beka, nge fyo Yesu na baume ba mu Baibolo bambi aba bu mupashi bashicindamike. Ca cine ukuti, pa mulandu ne milimo iingi ne fya kusakamana, kuti cayafya ukusange nshita ya kuba mweka ku kwetetula. Lelo, nga fintu caba na ku fintu fyonse ifyacindama, tufwile ‘ukubomfye nshita.’ (Abena Efese 5:15, 16) Lyene, kuti twasosa nga fintu kemba wa malumbo asosele ukuti: “Lekeni fibe ifyasuminishiwa ku cinso cenu ifyebo fya mu kanwa kandi na matontonkanyo ya mu mutima wandi, mwe Yehova.”—Ilumbo 19:14.