Tatompweke
PA October 5, 1995, Matt Tapio, uwa myaka 14, alikwete opareshoni ya kufumya mumena muli bongobongo. Mumena aali nasanda. Yali e opareshoni ya kubalilapo pa maopareshoni ali no kukwata pa myaka ibili na hafu. Lyene babomfeshe imiti ya kwipaya insandesande ishilwani e lyo ne myengelele ku kumundapa.
Matt aleikala mu Michigan, ku Amerika, kuntu alesambilile sukulu no kusangwa ku kulongana kwa Bwina Kristu. Alishukile nshita ya kushimikila ifisumino fyakwe kuli bakafundisha na ba mu kalasi, ali no kuya ku bantu bambi mu butumikishi bwa pa cintubwingi. Ilingi ilintu aletekwa mu cipatala, ashalike ifitabo ifingi ifilanda pali Baibolo. Pa myaka ibili na hafu ilyo talafwa, atekelwe mu cipatala pa myeshi 18.
Inshita ishingi Matt alemoneka kwati tapusuke, lelo alepusuka lyonse. Inshita imo lintu balemutwala ku cipatala alifwile icipupu no kuleka ukupeema. Batendeke ukumupuputula, kabili alipuputwilwe. Lintu apuputwike, atendeke ukulila no kupunda ati: “Nalikosa! Nalikosa! Teti ncimbe!” Abantu balelanda ati ukutetekela Lesa e kwalengele ukuti Matt ekale nshiku ishingi.
Matt asukile acita cintu alefwaisha pa January 13, 1996, lintu abatishiwe ku kulangilila ukuipeela kwakwe kuli Yehova Lesa. Abatishiwilwe mu cishiba ca ku ng’anda pa kuti eyambula amalwele. Pa numa ya nshiku shinono, alile kuli opareshoni na imbi ku cipatala. Mu August 1997, Matt alilukile pa milungu iingi, lelo aliko eyefilya ilyo aile ku opareshoni na imbi.
Lyonse ili, Matt tabombomene, kabili alesekesha badokota na banasi. Tabaishibe icalelengo kuti alesekesha bwino ifi. Dokota umo amwebele ati: “Matt mba niwe, kuti nabwesha amakatani, no kuifimbilikisha ku mutwe, no kweba bonse loleni uko.”
Mu February 1998, alifumine mu cipatala no kuya ku ng’anda pa muku wa kupelako. Alitemenwe ukuba uwa mweo no kwisa ku ng’anda ica kuti lintu fye aingile mu ng’anda, atile: “Nintemwa sana! Iseni tupepe.” Lyene alipepele no kweba Yehova fintu atemenwe. Pa numa ya myeshi ibili, alisuka afwa kuli kansa pa April 19.
Pa kulongana kwa Nte sha kwa Yehova mu Ng’anda ya Bufumu balikutike kuli tepu wa fintu Matt aipushiwe ilyo talafwa. Aipushiwe ati: “Finshi wingeba fwe batuntulu pa lwa butumikishi no kulongana kwa Bwina Kristu?”
Matt ayaswike ukuti: “Bombesheni apo mwingapesha. . . . Tamwishibe ifingacitika. . . . Lelo te mulandu ne fingacitika, mwikatala amuleka ukushimikila pa lwa kwa Yehova.”