Bushe Mulalanda pa fya Mapepo?
“Natwalule ilyashi. Ifintu fibili ifyo nshifwaya kulandapo fya mapepo na mapolitiki!”
“Nashiila ifya mapepo ku bakashi na bana.”
“Nshilefwaya kulanda pa fya mapepo ino nshita. E lyo nafika fye ukufuma ku calici.”
BUSHE aya mashiwi yaumfwika ayakaya? Bamo tabafwaya kulanda pa mipepele pantu batontonkanya ukuti mulandu wabo na Lesa. Yesu umwine atile: “Ilyo ulepepa, ingila mu muputule obe uwa mu kati ka ng’anda, isalako ne ciibi cobe, no kupepa kuli Wiso uuli mu bumfisolo, na Wiso uumona mu bumfisolo, akakulambula.”—Mateo 6:6.
Lubali lumbi, Yesu na basambi bakwe tabayumfwile ukuti imbali shonse isha kupepa shilingile ukufiswa. Balelanda amalyashi ya ku mupashi ayalekanalekana mu kukakuka kabili pa lwalaala, ica kuti ifisambilisho fyabo fyalisalanganishiwe mu calo conse. (Imilimo 1:8; Abena Kolose 1:23) Nangu ni fyo, te bonse bafwaile ukulanda na bo, kabili bamo abalandile na bo baletwishika.
Nangu fye ilelo, imibele yalipusanapusana ku bantu ne ntambi ukulosha ku kulanda pa mipepele. Ku ca kumwenako, ku fyalo fya basungu ifingi, abantu bamoneka ukupoosesha amano ku fya ku calo pamo nga amasomo, incito, ifyangalo, bakompyuta, TV, ne fyapalako. Mu fyalo fimbi, abantu balitemwa ukulanda pa lwa fisumino fyabo. Lelo, te mulandu ne fikulilo fyabo, ifibaponena mu bumi filalenga bamo abashatemenwe imipepele ukulanguluka pa fintu fya ku mupashi bakabila.
Ukupusana Kulafuupula Abengi
Abakaana ukulanda pa lwa mipepele kuti balimona nelyo ukusangwa pa kulanshanya ukwafuminemo ukuumana kwabipisha. Injishikweba yaishibikwa yatile, “ukupusana kwa mipepele kufyala ukuumana ukwingi ukucila ukupusana kwa mu mapolitiki.” Richard M. Johnson, uwali kale inkonkani ya kwa kateka wa mu Amerika na o wine atile: “Ukupimpa mu fya mapepo kubalamuna impatila shakosesha isha muntontonkanya wa buntunse; kabili lintu kwatungululwa bubi bubi, kubalamuna ukuyumfwa kwabipisha ukwa cifyalilwa no kubepekesho kuti tulebombela Lesa.”
Bushe camupapusha ukuti ifisambilisho fya mu Baibolo ifyakwata amaka ya kuwamishako imibele pamo kuti fyabomfiwa bubi bubi ku kutuninkisha ukupusana, bumano kuikwatila, no lupato? Na kuba, te fisambilisho fya mu Baibolo ifibifya imipepele ku bengi. Lelo kulufyanya fyene e kulenga abengi ukumona imipepele ukuti ibi. Ica kumwenako, tontonkanya pa Bwina Kristu.
Katendeka wa buKristu, Yesu Kristu akoseleshe ukutemwa Lesa na banensu mu fyo alelanda ne fyo alecita, te kupusana na bunkosamutwe. Inshila Kristu na bakonshi bakwe babomfeshe mu butumikishi shali kupeelulula no kunashanasha. (Mateo 22:41-46; Imilimo 17:2; 19:8) Kabili balepepela na balwani babo na balebalamata.—Mateo 5:44; Imilimo 7:59, 60.
Ukupepa kwa cine kulasanikila amano no mutima, no kwikatanya abantu. E ico, ukulanshanya kwa mucinshi ukwa mipepele kulanonsha abafwaya icine abafumaluka, nga fintu twalamona.
[Akabokoshi pe bula 3]
Cintu Abantu Baishibikwa Balanda
Profesa wa bukabila pa Columbia Theological Seminary Ben Johnson atile: “Nga Yesu e nshila ya kuli Lesa, cili ce pamfya ku bakonshi ba kwa Yesu ukwananya ili lyashi kuli bambi.”
Intungulushi ya Southern Baptist Center for Church Growth Kenneth S. Hemphill yatile: “Yesu asambilishe abasambi bakwe ukutwala ilandwe ku bantu. Umulimo Wakulisha ufwaya ukuti tuye mu calo conse. Shikulu akambishe abakonshi bakwe ukuya konse fye.”
Papa John Paul II atile: “Nga tatuli nte te kuti tube Abena Kristu bene bene. . . . Umwina Kristu onse afwile ukwitwa mishonari kabili inte.”
Kalemba wa mikululo, Cal Thomas atile: “Bashimapepo abengi . . . batemwa sana ukupanga ifilonganino ifikulu no kukuula amacalici no kulolela uko bakatumwa mu kukakonkapo ukucila ukushimikila pa lwa bukombe bushingaalulwa kabili ubushaanguka ubwaba mwi Landwe.”
Shikofu wa baKatolika Thomas V. Daily alandile ukuti: “Tufwile ukukonkonsha pa minshi . . . Tufwile ukuya kulya no kushimikila Ilandwe lya kwa Yesu Kristu ukupala Inte (sha kwa Yehova) na bambi bamo bamo.”