Ukutemwisha Bamalaika

“‘Bonse’ twalikwata bamalaika abatutungulula, abatulinda . . . Nga ca kuti twabaleka batutungulule kabili twaitula kuli bena , nga bana, no kubacetekela icine icine e lyo no kubatemwa kabili no kubatasha mu kuicefya, lyene bakatupeela amapaalo ayengi nga nshi. Balangala na ifwe. Balatusakamana. Balatundapa, balatukumya, balatusansamusha na maboko yashimoneka aya citemwishi, kabili lyonse balesha ukutupeela ifyo tulefwaya.” E fyasosele icitabo ca “Angel Letters.”

KUTI mwasumina ukuti mpanga yonse abantu nabatemwa ukusumina muli bamalaika. Ukulingana ne fyo bamo beta ati “bumupashi ubwishileko,” cila muntu alipeelwa malaika kabili umulimo wakwe wa kutusansamusha no kutucingilila pa kuti ifibi fitucitikila. Batila malaika wenu alikwata amaka no kutemwa. Tapinda ukuti mulemumfwila nelyo ukumupepa, kabili takatale amipingula nelyo ukumikalipila. Lyonse aba fye mupepi na imwe, uwaipelesha ukumyaafwa no kumicitila conse ico mulefwaya. Ifi e fyo abengi mu bufumacumi basumina ilelo.

Kwena, ukusumina muli bamalaika te kwa nomba. Kwalyambukila sana ifisumino fya mipepele ifya bantu ukutula fye na kale. Ifi kuti fyamonwa fye na mu fikope ne fyabaswa no kulengwa. Ifipasho fya bakerubi, ababa umusango wa bamalaika, fyayemfeshe ihema ne tempele lya baYuda ku kale. Amacalici ne fikuulwa fikalamba ifya macalici mu Kristendomu fyaliyemfiwa na bamalaika. Ifikope ne fyabaswa ifya bamalaika fyaisula mu mayanda ya babenye.

Bengi Balesumina Muli Bamalaika

Mu nshita sha ndakai, ukusumina muli bamalaika kuli mpanga yonse mu fyalo fimo. Ilingi bamalaika balabatambisha mu mafilimu nga bantu abafwile kale e lyo babwela pe sonde ku kubomba imilimo isuma. Muli filimu imo, bamalaika balyafwile bakateya ba bwangalo bwa baseball abapene bacimfiwe. Muli filimu imbi, malaika alyafwile umulumendo ukulandula pa mulandu wa kumwipaila cibusa wakwe umukashana. Kabili amaprogramu pali bamalaika bafwilisha yaleya yaleseeka pa televishoni ya ku United States.

Inyimbo shilanda pali bamalaika nashiseeka. Mu myaka ya nomba line iyapitapo, ulwimbo lumo pali 10 balimbamo malaika mu United States. Pa kati ka ba 1990, “amashitolo ya bamalaika” ukucila pali 120 e yaiswilwe ku Amerika. Aya mashitolo bashitishamo utupasho twa bamalaika, utupasho twa kukobeka, amapepala ne filembelo, kumo ne misebe ya kwangasha utunya iyakwata ifipasho fya bamalaika. Ukubungana ukwa kulanshanya ne fyebo fyalembwa fisambilisha abantu ifya kulanda na bantu abafuma ku muulu. Bamagazini, inyunshipepala, ukulanshanya kwa pa televishoni na pa filimba filanda pa lwa bantu bamonanapo na bamalaika.

Ifitabo Ifingi Nga Nshi

Kabili kwaliba ne fitabo filanda pali bamalaika. Mwi shitolo limo ilya mu New York City bashitishamo ifitabo ukucila pali 500 ifyalekanalekana ifilanda pali bamalaika, maka maka bamalaika abalinda. Ifi fitabo fitila kuti fyalanga bakabelenga ifya kukumana na bamalaika abalinda, ukubeshiba amashina, ukulanda nabo, kabili ukubalomba ukuti balebafwilisha. Ifi fitabo fyalikwata amalyashi ayengi ayalanda pa fyo bamalaika batula abantu mu bwafya, ukwimya abantu mu muulu pa kuti bebapunka kuli bamotoka, ukupoosha amalwele yabipisha, ukusansamusha abalecushiwa, no kucingilila abashilika mu nkondo. Bamalaika ba musango yo balafwilisha abantu “ukwabula ukubapinda ukuti balapile, baluke, nelyo bakonke ifisambilisho.” Lelo te lingi abaitunga ukumonana na bamalaika balula imikalile yabo. Ilingi abaitunga ukumonanapo na bamalaika batalalikwako fye umutima e pela.

Aya malyashi kuti yamoneka kwati ni mbila nsuma ku bantu ilintu kuli ukusakamikwa na macushi ilelo. Lelo bushe kuti yacetekelwa? Bushe yalicindama?

[Amashiwi pe bula 24]

Abengi batila balimonanapo na bamalaika