Indupwa Shabula Bashibo—Icishibilo ca Nshiku sha Kulekelesha

BUSHE bwafya nshi mwingatila e bucililemo sana mu mikalile ya bantu ilelo? Mupepi na mapesenti 80 aya baipushiwe na kabungwe kafwailisha aka U.S. Gallup basosele ukuti “bwafya bwa kubula bashibo pa ng’anda.” Akabungwe ka Gallup katwalilile ukusosa ukuti, abana abakakula ukwabula bashibo ababafyele mu United States nabacila amamilioni 27, kabili iyo mpendwa ilekulilako fye. Lipoti ukufuma ku United Nations Children’s Fund itila mupepi na mapesenti 50 aya bana ba basungu abafyalilwe mu United States ukutula mu 1980 “kabili mupepi na mapesenti 80 aya bana ba bafiita e bali no kukushiwa mu lupwa lwa mufyashi umushimbe.” Ico e calengele magazini wa USA Today ukusosa ukuti United States “e calo cikwatishe indupwa shabula bashibo pano isonde ponse.”

Nangu cibe fyo, icipande ca muli The Atlantic Monthly calondolola ukuti: “Indupwa shabula bashibo te mu Amerika fye mweka shifulile. Na mu fyalo fye fyonse ifyakwatisha ifyuma e mo shili, ukusanshako ne calo ca Japan.” Nangu ca kuti tacayanguka ukulonganika ifipendo ukufuma mu fyalo ifipiina, cilemoneka kwati na fyo fine fileshingwana no bwafya bumo bwine. Magazini wa World Watch alondolwele ukuti “icilenga sana abaume [ba mu fyalo ifipiina] ukusha abakashi na bana mulandu wa kwafya kwa mikalile.” Ca cine, ukufwailisha kwa mu calo ca Caribbean kwasokolwele ukuti amapesenti fye 22 aya bashibo abakwata abana aba myaka 8 e baleikala pamo na bana babo.

Nangu ni lintu Baibolo yalelembwa abana babulwa bashibo balifulile. (Amalango 27:19; Amalumbo 94:6) Lelo, icalelenga sana ukuti kuleba abana babulwa bashibo muli ilya nshita ni mfwa ya bashibo. Kalemba David Blankenhorn atila, “Ilelo, icilenga sana ukuti kube abana babulwa bashibo mulekelesha wa bashibo.” Kwena, nga fintu twalamona, ukufulilako kwa bana babula bashibo cili cishibilo ca kuti tuleikala mu nshita umo abengi ilelo bali “abaumalala.” Ukulingana na Baibolo, ici cishibilo na cimbi icilangilila ukuti tuleikala mu “nshiku sha kulekelesha.”—2 Timote 3:1-3.

Lelo, ku bana abanono, ukukanakwata bashibo mu bumi bwabo kulufya kukalamba nga nshi. Cibalenga ukubipilwa no kuba aba nkumbabulili ifyo fingabaletela amafya ubumi bwabo bonse. E co, muli ifi fipande fikonkene twalalanshanya pali ubu bwafya bumoneka ukukanapwa, ukwabula ukufuupula bakabelenga, lelo ukubapayanishisha fye ifyebo fingabaafwa ukucincintila ubu bwafya bwabipisha.