Cinshi Icuni Cingasambilisha Umufungwa?

KU ULEMBA LOLENI! MU SOUTH AFRICA

INYUNSHIPEPALA ya Sunday Tribune iya ku Durban, mu South Africa yatile, ifyuni filenasha imitima ya bafungwa ba ku cifungo ca Pollsmoor Prison. Pali nomba, abafungwa 14 bali pa balesakamana ifyuni fyalekanalekana mu fifungo fyabo.

Bushe babomba shani? Umufungwa umo na umo uusakamana ifyuni mu kalokoni kakwe alakwata mashini wa kubikamo amani ukufikila yatootwa. Umufungwa alasakamana akoni akatootwa, alaliisha aka kabumbwa kanono lyonse nga papita iawala limo nelyo yabili, akasuba no bushiku, pa milungu isano. Lyene alabika akoni muli kasalanga, na yo ine iisungilwa mu cifungo. Akoni nga kakula, balakashitisha. Abafungwa bamo balatemwa sana ifyuni fyabo ica kuti balalila ilyo fyashitishiwa.

Nangu fye ni ntalamisoka ishakunkuma shilalundulula icongwe no kunakilila pa numa ya kusakamana no kulanda ne fyuni cila bushiku. Umufungwa umo atile: “Ndateka ifyuni, lelo na fyo fyalinteka.” Umbi na o atile ifyuni fyalimusambilisha ukutekanya no kuikaanya.” Umufungwa umo umupuupu, uushalesakamana abana bakwe ilyo bashilamukaka, asosa ukuti ukusakamana icuni kwalimwafwa ukwiluka ukuti ukuba umufyashi “mulimo uukalamba.”

Ukusakamana ifi fyuni kuti kwanonsha abafungwa mu nshila na imbi. Wikus Gresse atila: “Nga bafuma mu cifungo, ifyo balesambilila kuno kuti fyabafwa ukwingila incito ku bateke ifyuni na ku bondapa inama.”