Umukululo wa Fipusho

◼ Kusoka nshi tufwile ukuumfwila ilyo tuleshimikila ku bafungwa?

Mu calo conse mwaba abafungwa ukucila pa mamilioni 8, bamo balafwaya ukukutika ku mbila nsuma. (1 Tim. 2:4) Iofeshi linono ilya Nte sha kwa Yehova lilapokelela amakalata nalimo 1,400 cila mweshi ukufuma ku bafungwa na kuli balupwa lwabo ukulomba impapulo nelyo ukubatandalila. Nangu line abafungwa abengi mu kufumaluka balafwaya ukusambilila, ifyacitikapo kale filanga ukuti bamo babepa fye, bafwaya ukulila abantu ba kwa Lesa amasuku pa mutwe. Pa mulandu wa ici, bonse tufwile ukuumfwila uku kusoka pa lwa kushimikila ku bafungwa.

Ilingi line abafungwa balashimikilwa ukupitila mu makalata. Tulekomailapo ukuti bankashi tabafwile kutuma kalata ku bafungwa baume, nangu line ubuyo bwabo kufwaya ukubafwa lwa ku mupashi. Uyu mulimo ulingile ukubombwa na bamunyina bafikapo epela. Bankashi bafikapo nalimo kuti baebwa ukulembeshanya na bafungwa banakashi abo mu kufumaluka balefwaya sana icine ca mu Baibolo. Indalama nelyo ubupe bumbi tafifwile ukutumwa ku bafungwa, nangu fye bamulomba ifyo fintu.

Umufungwa nga alefwaya ukusambilila, ishina lyakwe na keyala filingile ukupeelwa ku cilonganino capalamina ku cifungo. Ilingi line bamunyina baba kulya abafikapo balishiba ifya kucita na conse icacitika. Nga ca kuti tamwaishiba icilonganino, ifyebo kuti fyatumwa kwi ofeshi linono ilya Nte sha kwa Yehova.

Tacaleshiwa bamunyina bashingamwa ukutungulula ukulongana ku bafungwa pa kuti abengi bengasambilila pamo pene. Lelo, mu kubishanya kumbi uko bakasabankanya balebishanya na bafungwa takufwile ukubela mu fifungo. Kabinge, bakasabankanya tabasuminishiwa ukutandalila abafungwa ukwabula ukumfwana nabo libela nangu fye kubishanya sana na bafungwa.

Shi natube “abacenjela nge nsoka lelo aba kaele nge nkunda” pa kushimikila abafungwa imbila nsuma.—Mat. 10:16.