Ukushimikila Abafungwa
1 Twalipokelela amashiwi ya kuti umulimo usuma ulebombwa na bamunyinefwe uwa kushimikila abafungwa mu fifungo fyalekanalekana, ukwafwa bamo ukuwamya imikalile yabo lwa ku mupashi. Mu fifungo fimo mulaba no kulongana kabili abafungwa bamo balisambilila ukufika na kukuipeela no kubatishiwa. Ukwaluka fye kwabo mu mikalile kwaba bunte bwine bwine kuli bambi.
2 Ku fifungo fimbi na ko, abafungwa balyafwiwa na bamunyinefwe abo balelembeshanya na bo amakalata inshita shimo. Lelo kuli ubwafya bumo ubo tulefwaya ukusokapo. Abafungwa bamo balasumina ukulembeshanya na bo amakalata, ukubepekesha fye kwati balefwaya ukusambilila icine, kanshi ico balefwaya fye fintu fyesu. Ico abafungwa bamo bacitila ica musango yu ku bantu ba kwa Yehova ni co balishiba ukuti baliba no kutemwa, icikuuku na bukapekape. Nga kwaba ukulembeshanya no mufungwa, te kuti cibe bwino ukutendeka ukumutumina indalama nelyo ifipe fimbi ifyo alelomba. Lelo, ico afwile ukulembela kumusambilisha no kumukoselesha lwa ku mupashi pa kuti alekonka ifishinte fya mafunde ya mu Baibolo.—Amapi. 14:15.
3 Apo te cisuma bankashi ukulembeshanya amakalata na bafungwa abaume, kuti cawama bamunyinefwe abafikapo e balelembeshanya na bo. Te cisuma ku baba mu cilonganino ukutandalila icifungo libili libili no kubishanya sana na bafungwa.
4 Ilyo kuli abafungwa abalefwaya icine, kuti cawama ukupeela amashina na keyala kabo ku cilonganino capalama kuli co cifungo, kabili lekeni bamunyinefwe abafikapo bayemonana na bo no kupekanya ukutampa ukusambilila na bo nga kuti babasuminisha. Ilingi line bamunyinefwe ba musango yo baleshiba ifya kucita kabili balapeelwa insambu shaibela isha kwingila mu fifungo. Kuti caba fye bwino aba bamunyinefwe nga bapekanya ukuti ibumba lya bafungwa balelongana pamo pa kuti amasambililo ayengi yaletungululwa pa muku umo. Te cisuma ukupekanya ukubungana kwaibela mu cifungo ukwa kuti mwalaalikako na bakasabankanya ukuya ku kutobenkana na bafungwa. Tulesubila abafungwa kuti basambilila ifingi nga balelongana fye ukulongana kwa cila mulungu ukwa lyonse nga ca kuti intungulushi sha cifungo cabo shabasuminisha ukucite co. E co, abafungwa abaipeela nelyo abalefwaya ukusambilila icine kuti baleliishiwa ica kulya ca ku mupashi cimo cine ne co abantu ba kwa Yehova abashaba mu cifungo balyako.
5 Cine cine tulefwaya ukwafwa abafungwa bonse abali ne nsala ne cilaka ca cine, lelo tufwile ukucenjela pa kushimikila kuli balya abakakilwa pa mulandu wa kulufyanya kwabo abene.