Ilyashi lya Bakabilisha ba Bufumu

Ukutande Mbuto sha Bufumu pa Kashita Akali Konse

ICEBO ca kwa Lesa, Baibolo, cikoselesha ukubombesha. Imfumu Solomone yatile: “Ku lucelo tande mbuto shobe, ukufika na ku cungulo wileka kuboko kobe kutushe; pantu tawishibe ico cikashuka, ici napamo ici, nangu nga fyonse fibili pamo fikabe fisuma.”—Lukala Milandu 11:6.

Pa kashita akali konse akalinga, Inte sha kwa Yehova shilatande “mbuto” ukupitila mu kushimikila imbila nsuma iya Bufumu bwa kwa Lesa. Mu fyalo ukucila 230 ne fishi ifingi, batwalilila ‘ukwabulo kuleka ukusambilisha no kubila ukuti Yesu e Kristu.’ (Imilimo 5:42) Ifya kukumanya fyakonkapo filelangilila ifyo Inte sha kwa Yehova ‘tashileleka amaboko yabo yatushe’ mu mulimo wa kushimikila.

◻ Mu Republic of Cape Verde, umo uwa Nte sha kwa Yehova aleenda mupepi ne cifungo ilintu aali mu butumikishi bwa mwi bala. Mu lubansa lwa cifungo, abafungwa bamo baninine ku muti. Ilyo bamwene Nte mwi samba, abafungwa babilikishe ukuti abapeko bamagazini bamo. Nte akakile bamagazini ba Ulupungu lwa kwa Kalinda na Loleni! abafulilako ku libwe no kupoosela mu kati ka cibumba. Icafumine muli ubu buseko bwa kutendekelako ca kuti, amasambililo ya Baibolo 12 yalitampilwe. Abafungwa batatu balipeela ubumi bwabo kuli Lesa kabili balibatishiwa mu menshi. Umo uwa bafungwa alibomba bukabila bwa mbila nsuma ubwa nshita yonse, nelyo bupainiya, ukucila pa mwaka umo nomba. Nangu cibe fyo, ni shani fintu babomba umulimo wa mwi bala mu cifungo? Intanshi icifungo calyakanishiwa mu fifulo fya kubombelamo. Lyene icifulo ca kubombelamo cimo cilakanishiwa pa kati ka Nte shitatu no kubombelwamo ukukonka fye akalokoni kamo kamo. Aba bakabilisha ba Bufumu balabwelelako ukuli ubuseko mu nshila imo ine fye iyo Inte sha kwa Yehova ukushinguluke calo shicitilamo—ukupitila mu fipempu fya kubwelelamo. Nangu cibe fyo, ubupusano bumo bwaba miku ubwingi amasambililo ya Baibolo yatungululwa. Mu cifulo ca kusambilila Baibolo umuku fye umo nelyo imiku ibili mu mulungu umo pe awala limo nelyo ukucilapo, abafungwa bamo basambilila cila bushiku! Ukulundapo, Inte shalipeelwa ulusa ku mukalamba wa cifungo ukukwatila ukulongana kwa cilonganino konse mu kati ka cifungo.

◻ Umwanakashi umo mu Portugal apyene impapulo sha Watch Tower ishafulilako pa numa ya mfwa ya kwa nakulu. Apantu tali umo uwa Nte sha kwa Yehova, talefwaya ukusunga ifi fitabo. Nangu cibe fyo, talefwaya ukufyonaula. Bushiku bumo aebele umo uwa Nte sha kwa Yehova uwamutandalile mu butumikishi bwa ku mwinshi no mwinshi pa lwa ifi fitabo. Nte alimwipwishe nga ca kuti alishibe ubusuma bwa ifi fitabo. Umwanakashi ayaswike ukuti: “Ukulande cishinka, nshishibe ubusuma bwa fiko, lelo ni shani fintu ningeshiba?” Umwanakashi alisumine ukusambilila Baibolo, kabili mu kwangufyanya aishilekatamika impapulo sha kwa nakulu. Pali nomba na o wine ni Nte ya kwa Yehova iyabatishiwa. Ukulundapo, umwana wakwe umwanakashi na cibusa wakwe uwapalamisha ku lupwa lwabo na bo bene balesambilila Baibolo. Mwandi bupyani bwaumo mutengo uyu mwiina wa fitabo wali!