Abacaice Bepusha Ukuti . . .
Bushe Lesa Akomfwa Amapepo Yandi?
Andrea atila: “Ndapepela conse pantu Yehova ni cibusa wandi, kabili nalishiba ukuti akangafwa nga nakwata ubwafya.”
ANDREA uwacaice alishininwa ukuti Lesa alomfwa amapepo yakwe. Lelo, te bacaice bonse abacetekele fyo. Bamo bamona ukuti balitaluka sana kuli Lesa ica kuti te kuti balande nankwe. Limo balatwishika nga ca kuti Lesa alabasakamana ica kutila nabo basangeko inshita ya kupepa kuli wene.
Cinshi cikabilwa pa kupepa? Mu kwipifya fye, kukwata bucibusa bwine bwine na Lesa. Kemba wa malumbo apepele ati: “Kuti bamutetekela abaishibe shina lyenu.” (Amalumbo 9:10) Nga iwe? Bushe walimwishiba bwino Lesa no kutetekela ukuti akomfwa amapepo yobe? Ilyo taulakonkanyapo ukubelenga, esha ukwasuka ifipusho fili mu mukululo uleti “Bushe Walimwishiba Bwino Lesa?” Fipusho finga wingasuka?
BUSHE WALIMWISHIBA BWINO LESA? Ifyasuko fili pe bula 14
1. Ishina lya kwa Lesa nani, kabili lipilibula nshi?
2. Mibele nshi ine iya kwa Lesa iyo Baibolo isokolola?
3. Ni nshila nshi iyakulisha Lesa alangilemo ukuti alitemwa abantunse?
4. Kuti twaipakisha shani bucibusa na Lesa?
5. Mibele nshi iisuma iyo tufwile ukuba na yo ilyo tulepepa?
Bushe kuti wayasuka amepusho yamo pali nomba, ilyo ushilabelenge cipande conse? Ninshi kale kale walishiba ifingi pa lwa kwa Lesa ukucila abengi. Napamo ifyasuko fyobe kuti fyalanga ukutila ulekabila ukwishibilapo na fimbi pa lwa wene, ukumwishiba bwino bwino. (Yohane 17:3) E ico, mona fimo fimo ifyo Baibolo isambilisha pa lwa kwa ‘Komfwa wa kupepa.’—Amalumbo 65:2.
Lesa Muntu Wa Cine Cine
Intanshi, Baibolo itwafwa ukumfwikisha ukuti Lesa te maka fye iyo. Muntu, kabili ishina lyakwe ni Yehova. (Amalumbo 83:18) Mu ciHebere ilyo shina lipilibula “Uulenga Ukubako.” Kuti aba umo afwaila ukuba pa kufikilisha ubufwayo bwakwe. Nga maka fye ayene yeka te kuti yacite co! E co, ilyo ulepepa ishiba ukuti taulelanda fye ku maka ayashaishibikwa bwino nelyo ku mwela. Ulelanda no muntu, uwingomfwa no kwasuka amapepo yobe.—Abena Efese 3:20.
Ici e calenga na Diana wacaice ukusosa ati: “Ninjishibo kuti konse uko ndi, Yehova alakutika kuli ine.” Pa kuba ne citetekelo ca musango yo, Lesa afwile ukuba uwa cine kuli iwe! Baibolo itila, “Uupalamina kuli Lesa ali no kutetekelo kuti e ko ali.”—AbaHebere 11:6.
Intulo ya Mano na Maka
Lesa kuti atwafwa icine cine pantu alikwatisha amaka. Amaka yakwe tayapelela, nga fintu ubukulu no kupikana kwa bubumbo kulanga. Baibolo itila Yehova alishiba amashina ya cila lutanda lonse—nangu line kwaba imintapendwa ya ntanda! Ne cacilapo, e ntulo ya maka yonse ayaba muli ishi ntanda. (Esaya 40:25, 26) Bushe ici te kuti citusungushe? Nangula ca kuti ifi fishinka filasungusha, Baibolo itila, ‘ala fimo fimo fye pa fintu ifilanga amaka ya kwa Lesa’!—Yobo 26:14, Baibolo wa Mushilo uwa 1983.
Moneni na kabili amano ya kwa Yehova ayashapelela. Baibolo itila amapange yakwe “yalishikisha.” (Amalumbo 92:5) E wapangile abantunse, e co alatumfwikisha sana ukucila na fwe bene. (Amalumbo 100:3) Apo abako “ukufumo muyayaya no kuyo muyayaya,” ukwishiba kwakwe takwapelela. (Amalumbo 90:1, 2) Takwaba ico engafilwa ukumfwikisha.—Esaya 40:13, 14.
Bushe Yehova abomfya shani amaka yakwe na mano? Pali 2 Imilandu 16:9 patila: “Amenso ya kwa Yehova yalolo ku no ku yalabebeta mu calo conse ku kuilango kuti wa maka ku kwafwa ababa ne mitima ya mpomfu kuli wene.” Takwaba ubwafya nangu bumo wingakwata ubo Lesa ashingafumyapo nelyo ubo ashingakwafwa ukushipikisha. Uwacaice Kayla ebukisha ukuti: “Nomba line fye ilyo ine no lupwa lwandi twakwete amafya, napepele kuli Yehova, kabili ndayumfwa ukuti alitwafwa ukushipikisha ifyaletucitikila, amafya, na matontonkanyo ifyali no kutwansha nga te kupepa kuli wene.” Nga walanda na Lesa, ninshi ulelanda ne ntulo ya mano. Tapali icingakuwamina no kukwafwa ngo kulanda na Lesa!
Lesa wa Bulungi no Kutemwa
Waishiba shani ukuti Lesa alafwaya ukukwafwa? Pantu Yehova tasala ukwishibikilwa ku maka nelyo ku mano yakwe ayashika atemwa ku bulungi bwakwe ubushalukaaluka. Lelo, Yehova aishibikilwa sana sana ku mibele yakwe iya kutemwa. Pali 1 Yohane 4:8 tubelengapo kuti “Lesa kutemwa.” Kabili apo Lesa aba no kutemwa kwakulisha kuti twacetekela ukuti akaasuka amapepo yesu. Inshila yakulisha iyo alangilemo ukutemwa yali kupeela Umwana wakwe icilubula pa kuti tukwate umweo wa muyayaya.—Yohane 3:16; 1 Yohane 4:9, 10.
Apo Lesa kutemwa, taufwile ukutiina ukuti akakulekelesha no kukusunga bubi bubi. Amalango 32:4 yatila: “Imibele yakwe yonse bupingushi.” Ukutemwa uko Lesa akutemwa bushininkisho bwa kuti alakutikisha ku fyo ulesosa. Ici citulenga ukumucetekela ukutila kuti twamweba ifyo tuletontonkanya.—Abena Filipi 4:6, 7.
Bucibusa na Lesa
Na kuba, Yehova atweba ukuti tulelanda na wene. Tafwaya ukuti tulemumona ngo muntu umbi umbi. Lelo, ukufuma na ku kutendeka kwa muntu Yehova alilaalika abantu ukuba ifibusa fyakwe. Pa baipakishe bucibusa na wene, abo umutima wakwe wasenamine, pali abaume na banakashi, abanono na bakalamba. Pali aba pali abantu pamo nga Abrahamu, Imfumu Davidi, na Maria, nyina wa kwa Yesu.—Esaya 41:8; Luka 1:26-38; Imilimo 13:22.
Na iwe kuti waba cibusa wa kwa Yehova. Nalyo line, ukuba cibusa wa kwa Lesa tacalola mu kuti ufwile ukumumona ngo mupashi wakwatisha amaka uo ufwile ukulanda fye na o ilyo ulefwaya fimo nelyo nga wakwata ubwafya. Te kuti tulepepa fye ilyo tulekabila fimo. Nga tulefwaya ukube fibusa fya kwa Lesa, tufwile ukutemwa ukufwaya kwakwe—te kufwaya kwesu fye—kabili tufwile ukucita ukufwaya kwa kwa Lesa. (Mateo 7:21) E ico, Yesu asambilishe abasambi bakwe ukupepela sana ifyacindama kuli Lesa. Atile: “E ico imwe pepeni ifyo, amuti: Shifwe wa mu muulu, ishina lyenu libelwe akatiina. Ubufumu bwenu bwise. Ukufwaya kwenu kucitwe pano nse nga mu muulu.” (Mateo 6:9, 10) Mu mapepo yesu tulingile no kutootela no kulumbanya sana Lesa!—Amalumbo 56:12; 150:6.
Nalyo line, tatufwile ukutontonkanya ukuti ifyo tukabila ne fitusakamika finono sana ica kuti tatwingafipepela. Steve atila: “Nangu line ndesha ukulanda nankwe, limo ntontonkanya ukuti nshifwile ukumweba utuntu utunono.” Lyonse nga watendeka ukuyumfwa ifyo, esha ukwibukisha ifyo Yesu asambilishe abasambi bakwe, atile: “Bushe inseba shisano tashishitwamo mu tumakopere tubili? Kabili talulabwapo nangu lumo mu menso ya kwa Lesa. . . . Mwilatiina, mwacilamo umutengo ku nseba ishingi.” (Luka 12:6, 7) Bushe ico tacili bushinino?
Lyene, nacanguka ukumfwikisha ukuti nga waishiba ifingi pa lwa kwa Yehova, ukacincishiwa sana ukupalama kuli wene mwi pepo kabili ukucetekela sana ukuti Yehova kuti akwafwa. E co mibele nshi iya mutima ulingile ukuba na yo ilyo ulepalama kuli Lesa mwi pepo? Ufwile ukuba uwa mucinshi, uwaicefya kabili ukukanaba na bukaitemwe. Bushe uletontonkanya umulashi wacindama onse uwa pano isonde kuti akutika ku fyo ulelanda nga ulelombapo cimo cilumba cilumba nelyo ukwabula umucinshi? Kanshi taufwile ukusunguka ukuti Yehova na o enekela iwe ukumucindika no kucindika ifipimo fyakwe ilyo ashilayasuka amapepo yobe.—Amapinda 15:29.
Iminshipendwa ya bacaice abatiina Lesa balisambilila ukweba Lesa ifya ku mutima wabo. (Amalumbo 62:8) Brett atila: “Yehova nga ayasuka amapepo yandi, ndashininwa ukuti acili ni cibusa wandi.” Nga iwe? Kuti wacita shani pa kuipakisha bucibusa bwa musango yu na Lesa? Abacaice ba Bwina Kristu babili basosele amashiwi yakonkapo:
Rachel atile: “Pa kupalama sana kuli Yehova, mfwile ukusambilila sana Icebo ca kwa Lesa, kabili ndesha ukulundulula ukufuluka uko kusambilila.”—1 Petro 2:2.
Jenny na o atile: “Naishiba ukuti ilyo wabomba sana ubutumikishi, e lyo upalama sana kuli Yehova.”—Yakobo 4:8.
Bushe walibala autontonkanyapo pa busuma ukupepa kuleta? Umwina Kristu wacaice umo atila: “Kuti nayumfwa ukuti nalipalamina sana kuli Lesa nga alanda na ine nelyo antumina ubukombe.” Apo Yehova talanda na ifwe ilyo twapepa, bushe ipepo litwafwa shani? Ici cikalandwapo mu cipande cikafuma ku ntanshi.
[Akabokoshi pe bula 14]
Ifyasuko ku Fipusho Fili pe Bula 12
1. Yehova. Lipilibula “Uulenga Ukubako.”
2. Ukutemwa, amaka, ubulungi, na mano.
3. Atumine Yesu, Umwana wakwe uwafyalwa eka, ku kwisatufwila.
4. Pa kukanayangwa fye ifyo tukabila lelo pa kutemwa no kucita ico Lesa afwaya.
5. Tufwile ukuicefya, ukukwata umucinshi no kukanaba na bukaitemwe.
[Ifikope pe bula 13]
Ukusambilila Baibolo no kusambililako fimo ku bubumbo kukakwafwa ukwishiba bwino Lesa