Bushe Muli Cibusa ca kwa Lesa?—Fintu Amapepo Yenu Yasokolola

BUSHE mwalyumfwapo abantu babili balelanshanya? Ukwabula ukutwishika, tacamupoosele inshita ukwishiba fintu ukwampana kwabo kwaba—nga ca kuti fibusa sana nelyo iyo, abeshibishi fye, nelyo ifibusa fyapalamisha, ifyacetekelana. Mu nshila imo ine, amapepo yesu kuti yasokolola ukwampana kwesu na Lesa.

Baibolo itweba mu kushininkisha ukuti Lesa “taba kutali kuli ifwe bonse.” (Imilimo 17:27) Cine cine, alatulaalika ukuti tumwishibe. Ala kuti twaba ne fibusa fyakwe. (Ilumbo 34:8; Yakobo 2:23) Kuti twaipakisha ukwampana kwine kwine nankwe! (Ilumbo 25:14) Ukwabula ukutwishika, ukwampana kwesu na Lesa cintu caumisho mutengo cintu fwe bantunse bashapwililika twingakwata. Kabili Yehova amona bucibusa bwesu ngo bwa mutengo nga nshi. Ici ca cine pa mulandu wa kuti bucibusa bwesu nankwe bwashimpwa pa citetekelo cesu mu Mwana wakwe uwafyalwa eka, uwatufwilile.—Abena Kolose 1:19, 20.

E ico, amapepo yesu yafwile ukulangisha icitemwiko cashika no kutasha kuli Yehova. Bushe mwalitalayumfwapo ukuti nelyo amapepo yenu ya mucinshi, lelo kwati tayalefuma pa mutima? Ico caliseeka. Bushe makii nshi yengapikulula iyi milandu? Yaba kukusha bucibusa bwenu na Yehova Lesa.

Ukulubulako Inshita ye Pepo

Ica kubalilapo, cilasende nshita pa kukusha bucibusa. Kuti pambi muleposha abantu abengi cila bushiku nelyo fye ukulanshanya na bena—abena mupalamano, abo mubomba nabo, abensha amabasi, na bashitisha mu mashitolo. Nangu cingabe fyo, ici tacipilibula ukuti muli fibusa fya aba bantu. Icibusa cikula lintu mulelanda no muntu inshita iitali, ukufuma ku kulanshanya kwa patali patali ukufika na ku fyo muleyumfwa no kutontonkanya.

Mu nshila yapalako, ipepo lilatwafwa ukupalamina kuli Yehova. Lelo lifwile ukupeelwa inshita yakumanina; te pepo fye ilipi ilya kutasha pa kulya iyo. Nga mulesosa kuli Yehova ilingi, e lyo muli no kuba na maka ya kubombela pa kuyumfwa kwenu, amapange yenu, ne ncitilo shenu. Ifingapikulula amafya yakalamba filatendeka ukuilangisha ilintu umupashi wa kwa Lesa ulemwibulula ifishinte fya mu Cebo cakwe. (Ilumbo 143:10; Yohane 14:26) Mu kulundapo, ilyo mulepepa, Yehova alesa mu kuba uwa cine cine kuli imwe, kabili mulesa mu kwishibisha ukusakamana kwabamo ukutemwa no kwangwako kuntu amukwatila.

Cibe fi maka maka nga ca kuti amapepo yenu yaasukwa. Yehova kuti “[afushako] ukucila ifyo tulomba atemwa twelenganya”! (Abena Efese 3:20) Ici tacilepilibula ukuti Yehova alamucitila ifipesha mano. Lelo, ukupitila mu Cebo cakwe icalembwa, impapulo sha musha wa cishinka, nelyo amashiwi ya bamunyina ne nkashi aba kutemwa, kuti amupayanishisha ukupanda mano nelyo ubutungulushi bulekabilwa. Nelyo kuti amupa amaka yalekabilwa pa kushipikisha nelyo ukulwisha itunko. (Mateo 24:45; 2 Timote 4:17) Ifya kukumanya fya musango yu filesusha ukutasha Cibusa wesu uwa ku muulu mu mitima yesu!

E ico, umo afwile ukulubulako inshita ye pepo. Cine cine, inshita taimonwamonwa muli shino nshiku sha kutitikisha. Lelo nga ca kuti mwalitemwa umo, ilingi line mulasangako inshita ya kuba nankwe. Moneni umusango untu kemba wa malumbo aleyumfwilamo ukuti: “Ifyo insebula ifuluke mpito sha menshi, e fyo umutima wandi ufuluka imwe, mwe Lesa. Umutima wandi waikatwe cilaka ca kwa Lesa, Lesa wa mweo; nkesafika lilali no kumone cinso ca kwa Lesa?” (Ilumbo 42:1, 2) Bushe na imwe mulafuluka ukulanda na Lesa mu nshila Davidi afulukilemo? Lyene, lubuleniko inshita ya kucite co!—Linganyeniko Abena Efese 5:16.

Ku ca kumwenako, pambi kuti mwaesha ukushibuka ku macaca pa kuti mukwateko inshita ya kupepa mweka. (Ilumbo 119:147) Bushe inshita shimo ubushiku mulafilwa ukupona mu tulo? Kanshi, nga kemba wa malumbo, kuti mwamona inshita sha ifyo nge shuko lya kulanda na Lesa pa filemusakamika. (Ilumbo 63:6) Nelyo kuti caba fye ukupepa amapepo ayepi mu kasuba. Kemba wa malumbo asosele kuli Lesa ukuti: “Kuli imwe ndililako akasuba konse.”—Ilumbo 86:3.

Ukuwamyako Umusango wa Mapepo Yesu

Inshita shimo, na kabili kuti mwacisanga ica kwafwa ukulefyako amapepo yenu. Mwi pepo ilipi, kuti limbi mulanda fye pa fya munsaunte. Lelo nga ca kuti mwapepa amapepo ayatali kabili ayashika, mulalanda pa lwa fintu muletontonkanya no kuyumfwa ukwabula no bwafya sana. Yesu alipooseleko fye no bushiku bonse mu kupepa. (Luka 6:12) Ukwabula ukutwishika, muli no kusango kuti amapepo yenu yakabelako aya cikabilila kabili ayakwetemo ubupilibulo nga ca kuti mwasengauka ukuyasupawila.

Ici tacilepilibula ukubwatauka nga mukwete fye ifinono ifya kulanda; kabili tacipilibula ukulanda pali fimo na fimo lyonse ifyabulamo no bupilibulo. Yesu asokele ukuti: “Lelo pa kupepa, mwisosa cisosesose nga Bena fyalo; pantu batila ni ku fyebo fyabo ifingi bakomfwilwa. E ico mwipalana na bo; pantu Shinwe aishibe fintu mukabila, ilyo tamulamulomba.”—Mateo 6:7, 8.

Ipepo libelako no bupilibulo nga ca kuti mwatontonkanishisha libela ifintu mulefwaya ukulandapo. Ifya kulandapo tafili fya kupenda—ubuseko bwesu mu butumikishi, ubunake bwesu no lubembu, ifya kutulenga insoni, amasakamika ya fya ndalama, ukutitikisha ku ncito nelyo ku sukulu, ubutuntulu bwa lupwa lwesu, na bumupashi bwa cilonganino cesu, e fimo fimo twingalandapo.

Bushe inshita shimo umuntontonkanya wenu nga mulepepa ulalulumba? Kanshi bombesheni pa kuti mulebikako sana amano. Na kuba Yehova aliba uwaitemenwa ‘ukupeepeka ku nkuta shesu.’ (Ilumbo 17:1) Bushe tatufwile ukuba abaitemenwa ukubombesha ku kupoosako sana amano ku mapepo yesu? Ee, ‘angweni fya bumupashi,’ no kulesha umuntontonkanya wenu ukululumba.—Abena Roma 8:5.

Inshila intu tulandilamo kuli Yehova na yo ine yalikatama. Nangu ca kuti afwaya ifwe ukumusenda nga cibusa wesu, tatufwile ukulaba ukuti tulelanda na Mulopwe wa kubumbwa konse. Shi belengeni no kwetetula pa cikope ca kutiinya icalondololwa pa Ukusokolola ifipandwa 4 na 5. Apo Yohane amwene mu cimonwa ubukata bwa Uyo tupalaminako mwi pepo. We shuko lintu twakwata ilya kuba na maka ya kupalamina no kumfwana no “waikala pa cipuna ca bufumu”! Tatulefwaya insoselo shesu ukumfwika kwati twalimubelesha ukucila mu cipimo nelyo ukumfwika ishabulo mucinshi. Mu cifulo ca ico, tufwile ukubombesha na maka pa kulenga ‘fibe ifyasuminishiwa ku cinso ca kwa Yehova ifyebo fya tunwa twesu na matontonkanyo ya mu mitima yesu.’—Ilumbo 19:14.

Tufwile ukwishibo kuti tatutemuna Yehova na mashiwi yakalamba. Alatemunwa ne nsoselo shesu isha mucinshi, ishifuma pa mutima, te mulandu na fintu shisoselwe mu kwanguka.—Ilumbo 62:8.

Icisansamushi no Kulangulukilako mu Nshita sha Kubulisha

Nga ca kuti tulekabila ubwafwilisho ne cisansamushi, ilingi line tulolesha kuli cibusa wesu uwapalamisha nga tulefwaya ukutungilila no bwafwilisho. Takwaba cibusa uuli onse untu twingapalamako ukwabulo bwafya ukucila Yehova. Ni ‘kaafwa apakalamba mu fya kumanama.’ (Ilumbo 46:1) Pamo nga “Lesa wa cisansamushi conse,” alomfwikisha fintu tulepitamo ukucila uuli onse. (2 Abena Korinti 1:3, 4; Ilumbo 5:1; 31:7) Kabili alikwata ukulangulukilako kwine kwine ne cililishi kuli abo abali mu mibele ya kumanama. (Esaya 63:9; Luka 1:77, 78) Ukwishiba Yehova nga cibusa uulangulukilako, tulayumfwa abantungwa ukulanda na wene mu kufumaluka, kabili mu kubilima. Tulaseshiwa ukusosa ifitutiinya icibi na masakamika. E ico tulaimwena fwe bene ‘ifya kusansamusha fya kwa Yehova ifitulengo kupekwa.’—Ilumbo 94:18, 19.

Inshita shimo, kuti twayumfwa abashilingile ukupalamina kuli Lesa pa mulandu wa filubo fyesu. Lelo ni shani nga ca kuti cibusa wenu uwapalamisha amulufyanya kabili alomba ubwelelo? Bushe te kuti museshiwe ukumusansamusha no kumusumbamo? Nomba mulandu nshi mwingenekela ukuti Yehova te kuti acite icacilapo? Aleleela apakalamba ifibusa fyakwe ifibembuka pa mulandu wa kushipwililika kwa buntunse. (Ilumbo 86:5; 103:3, 8-11) Pa kwishibe ci, tatukwinda ukumweba imembu shesu; kuti twacetekele fyo akatwalilila ukututemwa no kutubelela inkumbu. (Ilumbo 51:17) Nga ca kuti twapopomenwa pa mulandu wa kufilwa kwesu, kuti twakoseleshiwa na mashiwi ya pali 1 Yohane 3:19, 20 ayatila: “Kabili muli ici e mo kuti twaishibilo kuti tuli ba mu cine, no kuteke mitima yesu ku cinso cakwe lyonse ilyo imitima yesu ituseka; ico Lesa alikula acile mitima yesu, kabili aishiba fyonse.”

Nangu ni fyo, tatulekabila ukuba mu mibele ya kumanama pa kuipakisha ukusakamana kwa kwa Lesa ukwa kutemwa. Yehova alankulako kuli conse icingambukila bumupashi bwesu nelyo inkuntu. Ee, tatulekabila ukutontonkanya ukuti ukuyumfwa kwesu nelyo amatontonkanyo yesu, ne filetusakamika tafili ifyakatama ukulandapo mwi pepo. (Abena Filipi 4:6) Bushe nga muli na cibusa wenu uwapalamisha, mulanda fye pa fintu fikalamba ificitika mu bumi bwenu? Bushe tamulanda fye na pa fintu ifinono? Mu nshila imo ine, kuti mwayumfwa abantungwa ukulanda fye pa lubali ululi lonse mu bumi bwenu kuli Yehova, ukwishibo kuti “asakamana imwe.”—1 Petro 5:7.

Kwena bucibusa te kuti butwalilile nga ca kuti muilandapo fye pe. Mu kupalako, amapepo yesu tayafwile ukuba fye pa lwa fwe bene. Tufwile no kulanda pa citemwiko no kusakamana kuntu twakwatila Yehova ne fintu afwaya. (Mateo 6:9, 10) Ipepo talyaba fye kashita ka kulomba ubwafwilisho kuli Lesa iyo, lelo na kabili kashita ka kulumbulula ukutasha no kulumbanya. (Ilumbo 34:1; 95:2) Ukunonka ‘ukwishiba’ ukupitila mwi sambililo lya pa lwesu ilya lyonse kukatwafwa muli ulu lubali, nga fintu kutwafwa ukwishibisha bwino Yehova ne nshila shakwe. (Yohane 17:3) Kuti mwacisanga ica kwafwa sana ukubelenga ibuuku lya Amalumbo no kumona fintu ababomfi ba kwa Yehova aba busumino balesosa kuli wene.

Bucibusa na Yehova bwaba bupe ubwa mutengo nga nshi. Lekeni tulangishe ukuti tulabutesekesha ukupitila mu kulenga amapepo yesu ayacishapo ukuba aya cikabilila, ayacishapo ukufuma pa mutima, kabili ayacishapo ukuba aya pa lwesu. Lyene, tukaipakisha insansa shintu kemba wa malumbo alandilepo lintu asosele ukuti: “Alishuka uo mwasala no kupalamika.”—Ilumbo 65:4.

[Ifikope pe bula 28]

Kuti twapepa kuli Lesa akasuba konse ilyo kuleisa ukukabila