Ukufulunganishiwa Ukulengwa na Macushi Kukapwa!
NALIMO mwalilwileko inkondo kabili mulaloota ifibi nelyo ukwibukisha ifibi ifimulenga ukumona kwati inkondo tayapwa. Nalimo mwalisanshilwepo icabipisha pamo nga ukupatikishiwa ukulala no muntu kabili mumfwa kwati mu mubili wenu mwalyonaike cimo ilyo icintu cabipa camucitikile. Nelyo napamo uo mwatemwa afwile mu kayofi kalengwa ne fyabumbwa nelyo mu busanso kabili ukwikala ukwabula wene kumulenga ubulanda nga nshi.
Bushe mulalanguluka nga kuti mwayalula ukumfwa kwa musango yo? Kuti twayasuka no bucetekelo bwa kuti: Ee, kuti mwayalula! Pali ino nshita, bonse abacula pa mulandu wa macushi kuti basansamushiwa ku Cebo ca kwa Lesa, Baibolo.
Ukwafwiwa Ukushipikisha Amacushi
Mupepi ne myaka 2000 iyapita, umutumwa Paulo apitile mu fintu fyayafya ica kuti apene afwe. Fimo ifyo alondolwele fyalilembwa muli Baibolo. Paulo alembele ati: “Tatulefwaya imwe ukukanaishibe ca bucushi icatuponene mu Asia. Pa kuti twafinininwe ukucilamo, ukucila amaka ya kushipikishapo, twasuka twalengwo kulopoto mutima, twatile no mwa kupokolwelo mweo mwabula: lelo ifwe twali no kuibukule mfwa fwe bene.”—2 Abena Korinti 1:8, 9.
Nangu tatwaishiba bwino icacitike pali ilya nshita, cine cine cali kayofi. (2 Abena Korinti 11:23-27) Bushe Paulo acitile shani pa kuti acimfye?
Ilyo aleibukisha icabipa icacitike mu Asia, alembele ati: “Abe uwapaalwa Lesa kabili Wishi wa kwa Shikulu Yesu Kristu, Shifwe wa nkumbu kabili Lesa wa cisansamushi conse, uuletusansamusha pali conse ica bucushi icituponena, ku kulenga ifwe tukose ku kusansamusha abali mu ca bucushi conse ku cisansamushi ico tusansamushiwako fwe bene kuli Lesa.”—2 Abena Korinti 1:3, 4.
Ca cine abapusuka utuyofi kuti bayafwilishiwa kuli “Shifwe wa nkumbu kabili Lesa wa cisansamushi conse.” Kuti mwacita shani pa kuti musansamushiwe kuli wene?
Ifya Kucita pa Kwafwilishiwa
Ica kubalilapo—lombeni ukwafwa. Nga muleyumfwa abapelelwa, ibukisheni ukuti bambi balyumfwapo ifyo fine. Abacimfya ubucushi bwa musango yo balafwaya ukwafwilisha bambi. Nge fyo cali ku mutumwa Paulo, na bo bayumfwa ukuti balekabila ukusansamushako “abali mu ca bucushi conse” nge fyo Lesa amusansamwishe. Mwishingashinga ukumona Inte ya kwa Yehova—onse uo mwabeleshanya na o—no kulomba ukwafwa ukukuma ku fyo mwingafwilishiwa na Yehova, “Lesa wa cisansamushi conse.”
Mwileka ukupepa. Nga ca kuti mulefilwa ukupepa pantu muli ne cipyu, ipusheni uwafikapo lwa ku mupashi ukupepa na imwe. (Yakobo 5:14-16) Ilyo mwalanda na Yehova Lesa, ibukisheni ‘ukubika amasakamika yenu yonse pali wene, pa kuti asakamana imwe.’ (1 Petro 5:7) Libili libili Amalembo yakomaila pa fyo Lesa asakamana umo umo pa babomfi bakwe.
Kalemba wa Amalumbo 94 afwile alipitileko mu mafya, pantu atile: “Yehova abulaba wa kwafwa kuli ine, umweo wandi nga waikalo mutalalila bwangu bwangu. Ilyo nati, Lwatelemuko lukasa lwandi, e lyo uluse lwenu lwantungilila, mwe Yehova; pa kuba ayengi muli ine amatontonkanyo ya kunsakamika, ifya kusansamusha fyenu finengo kupekwa.”—Amalumbo 94:17-19.
Bamo abacula ku kufulunganishiwa kulengwa na macushi balacushiwa maka maka ku ‘matontonkanyo yasakamika,’ ayo inshita shimo yengalenga umwenso nelyo icipyu cabipisha. Lelo, ipepo lya pa mutima kuti lyaafwa “ukumutungilila” ukufikila uko kuyumfwa kwapwa. Muletontonkanya ukuti Yehova ni shifwe wakwata ukutemwa kabili imwe muli mwana munono uo acingilila bwino. Ibukisheni ukuti Baibolo ilaya ukuti “umutende wa kwa Lesa uwapulamo mu kwiluka konse, wakulalinde mitima yenu na mapange yenu muli Kristu Yesu.”—Abena Filipi 4:7.
Ukundapa—nampo nga kwa ku mubili, ku muntontonkanya, nelyo ku mupashi—kucitwa panono panono. Kanshi te kuti cibe bwino ukwenekela ukuti ipepo likaleta umutende apo pene fye kuli balya abacushiwa nga nshi ku fya kucitika fyabipa. Lelo, ukukanaleka ukupepa kwalicindama. Kukalenga ulecula ukukanacimfiwa no kufuupulwa ku kuyumfwa kwisa ilyo mwapita mu bucushi.
Belengeni no kwetetula pa Cebo ca kwa Lesa. Nga ca kuti cilemwafya ukwangwa ku fyo mulebelenga, ipusheni umo abelengele pamo na imwe ilyashi lya kusansamusha ukufuma muli Baibolo. Kuti mwasala amalembo ayalanga ifyo Yehova asakamana nga nshi ababomfi bakwe aba cishinka, nangu bengaba shani no bulanda nelyo ukufuupulwa.
Jane, uo twalandilepo mu fipande fifumineko, asangile icisansamushi mu malembo ayengi aya mu Baibolo ayaba mu Amalumbo. Yasanshamo Amalumbo 3:1-8; 6:6-8; 9:9, 10; 11:1-7; 18:5, 6; 23:1-6; 27:7-9; 30:11, 12; 31:12, 19-22; 32:7, 8; 34:18, 19; 36:7-10; 55:5-9, 22; 56:8-11; 63:6-8; 84:8-10; 130:1-6. Mwiesha ukubelenga amalembo ya mu Baibolo ayengi pa muku umo. Lelo, pooseniko inshita ukwetetulapo no kupepa.
Ubulanda Bushatala Abubako
Ku ca bulanda, tatufwile ukupapa ukuti ukupatikisha abanakashi ukulala na bo, ukwipayaula abantu, inkondo, no lukakala nafifula ndakai. Mulandu nshi? Pantu Yesu alondolwele inshita tulipo ukuti kukaba “ukufulisha kwa bupulumushi.” Na kabili atile: “Ukutemwa kwa bengi kukashibantukila.”—Mateo 24:7, 12.
Mu myaka iyapita, ukufulunganishiwa ukulengwa na macushi kwaliseeka sana—ilingi pa mulandu wa fintu ifyo Yesu asobele. Nge fyo calembwa muli Baibolo muli Mateo icipandwa 24, Marko icipandwa 13, na Luka icipandwa 21, Yesu atile muli ino nshita ya ku mpela, kwali no kuba inkondo pa kati ka fyalo, no tuyofi tulengwa ne fyabumbwa e lyo no kufulisha kwa bupulumushi, no kubulwa ukutemwa. Lelo, nge fyo Yesu amwene, ukulubuka takwali kutali.
Ilyo Yesu alandile pa kufulisha kwa tuyofi no kutendeka kwa “bucushi bukalamba” ifyali no kukonkapo mwi sonde lyonse, umfweni ico atile e co abantu bafwile ukucita: “Inukeni, inuneni imitwe; pantu ukulubuka kwenu nakupalama.” (Mateo 24:21-31; Luka 21:28) Ca cine, ilyo ifintu mu calo filebipilako, kuti twashininkisha ukuti ubucushi bukalamba pali buno bwikashi bulenga ubulanda bukafumamo impela ya buno bwikashi bwabipa no kupyanikapo ubwikashi bupya ubwalungama.—1 Yohane 2:17; Ukusokolola 21:3, 4.
Tatufwile ukupapa ukuti ukulubuka kwesu kukesa fye ilyo ububifi no lukakala fyafika pa kalume. Lesa apingwile ubwikashi bwa kale mu nshiku sha kwa Noa na bantu babifi aba mu Sodomu na Gomora mu nshila imo ine. Kulya kwipayaula kwacitike kale pa mulandu wa kupingula kwa bulesa kulanga ifikacitika ku ntanshi.—2 Petro 2:5, 6.
Impela ya Kufulunganishiwa Kulengwa na Macushi
Nga mulacula ku kufulunganishiwa kulengwa na macushi kuti mwalanguluka nga ifintu fyabipa mwibukisha fikatala afipwa. Lelo, kuti twatila ati: Ee, fikapwa! Pali Esaya 65:17, Yehova Lesa abilisha ati: “Ndelenge myulu ipya, ne calo cipya! Ifya ntanshi tafyakebukishiwe, tafyakabukuluke mu mutima.” Nangu ca kuti ukucula kwa kufulunganishiwa ukulengwa na macushi kuti kwamoneka ngo kushingapwa, ili lembo lilatushinina ukuti bushiku bumo kukapwa ku ciyayaya no kukanacusha abantu.
Pali lelo, umwaka umo ukutula apo bapene bamupatikishe ukulala na o, Jane mutumikishi painiya (kabila wa nshita yonse) uwa Nte sha kwa Yehova. Nomba line fye ashimike ati: “Cali ni pa numa ya kupingula kabili ilyo uwansanshile akakilwe—ukucila pa myeshi 8 ukufuma apo ansanshile—e lyo naumfwileko bwino na kabili. Uyu mwaka wapwile pali ino ine nshita, nshatontonkenye pa mutende ne nsansa ifyo nakwata nomba. Ndatasha Yehova pe subilo lisuma ilya bumi bwa muyayaya ne shuko lya kwebako bambi pali lyene.”—Amalumbo 27:14.
Nga mulecula no kufuupulwa nelyo ubulanda ifilengwa no kufulunganishiwa na macushi, na imwe ili isubilo kuti lyamwafwa.
[Icikope pe bula 24]
Ukusangwa ku kulongana kwa Bwina Kristu kuti kwamwafwa ukushipikisha
[Ifikope pe bula 24, 25]
Ukubelenga Icebo ca kwa Lesa no kupepa kuti fyamwafwa
[Icikope pe bula 26]
Nomba line fye amacushi yonse yakapwa