Ishina lya kwa Lesa Lyaleta Ifikansa

UULEMBA LOLENI! MU NETHERLANDS

BAKAPILIBULA ba Baibolo mupya uwa ciDutch baleta ifikansa pa basoma Baibolo na bantu yaweyawe. Mulandu nshi? Ni pa mulandu wa kuti basalapo ukupilibula ishina lya kwa Lesa mwi shiwi lya kuti Heer nelyo “Shikulu.”

Mu December 1998, ilyo papitile fye imilungu inono ukutula apo aba bakapilibula bafumisheko iciputulwa cimo ica Baibolo, ibumba lya banamayo aba mwi calici lya Kerk en Wereld (Icalici ne Calo), akabungwe ka baProtestanti, batendeke kampeni wa kuilishanya muli bakalata. Mulandu nshi? Balemona ukuti ishiwi lya kuti “Shikulu” lya “bwaume sana.” Mu kwangufyanya, amabumba yambi—baKatolika na baProtestanti—bailundile kuli uyu kampeni wa kuilishanya. Mu February 1999, abasoma batatu baliilundile kuli uyu kampeni pa kusosa ukuti cawama ukupilibula fye filya filembo fine ifya ciHebere ifye shina lya kwa Lesa, ukuti YHWH. Tapakokwele, abasoma Baibolo, bakapilibula, na basoma ifya mipepele balikumene mu Amsterdam ku kulanshanya pali uyu mulandu. Pa mpela ya kulanshanya, bonse abali muli uku kukumana balaalikwe ukuvota ukulingana ne fyo balefwaya ifi filembo ukupilibulwa.

Pa mutwe wa lyashi lyaleti “Pa mulandu wa kwa Lesa, Twikansanina pe Shina lya kwa Lesa,” inyunshipepala ya Nieuwsblad van het Noorden yalembele pa fyatumbwikemo ukuti: “Abavotele ukuti ifi filembo fipilibulwe ati SHIKULU bali fye 7. Nalyo line te bengi bavotele amashiwi yambi: (umo) fye e wavotele ukuti bakapilibule ati Ishina, (batatu) e bavotele ukuti bakapilibule ati Uwa, (6) bavotele ukuti bakapilibule ati Uwa Nkumbu, (7) bavotele ukuti bakapilibule ati Uushilumbulwa, abali (10) e bavotele ukuti bakapilibule ati Uwa Mweo, kabili abali (15) bavotele ukuti bakapilibule ati Uwa Ciyayaya. Kabili abengi bavotele ukuti . . . pabe fye filya fine filembo fine, e kuti YHWH!” Pa March 15, 2001 Komiti wa Bwangalishi uwa uyu Baibolo mupya apingwilepo ukubomfya HEER (SHIKULU) mu filembo ifikulu lelo ifimonekako ifinono ukuti e fyakulaimininako ishina lya kwa Lesa.

Ifi fikansa filangilila ukuti te mulandu no kukanaumfwana pa fyo bengapilibula ishina lya kwa Lesa mu ciDutch, abasoma balisumina ukuti Lesa alikwata ishina. Mu ciHebere ili shina lyakwata ifilembo fine ifya ciHebere, e kuti, יהוה, nelyo YHWH. Bushe amaBaibolo yambi aya ciDutch yapilibula shani YHWH?

Umwina Holland uwitwa Nicolaas Goetzee afumishe icitabo pa lwa Baibolo wa Staten mu 1762. Ibula pali ishina lya ici citabo lyatile: “Imilandu ikalamba kabili iyaishibikwa bwino e yalenga ukuti na ifwe twipilibula Ishina lya kwa Lesa ilya Cibukisho, YEHOVA.” Abena Holland bambi abasoma kabili abaishibikwa—pamo nga Profesa Nicolaas Beets na Petrus Augustus de Genestet—na bo balibomfya ishina Yehova.

Ica kupapusha ca kuti Baibolo wa New World Translation of the Holy Scripturesa wena alabomfya ishina lya kwa Yehova apo lifwile ukuba. Ifyebo na fimbi muli New World Translation wa ciDutch fitila iyi Baibolo “yatwalilila ukubomfya ishina ‘Yehova’ pa mulandu wa kuti abantu balibomfya ili shina pa myaka iingi nga nshi. Na kabili, ibakilila . . . ifilembo fine ifye shina lya bulesa, YHWH.” E co Baibolo wa New World Translation alyafwa iminshipendwa ukwishiba icine pa lwe shina lya kwa Lesa.

[Futunoti]